Read Masana 1 SAMUEL 9 Bible Online

1 SAMUEL 9 - Masana bible

1 SAMUEL 9

¹Sa mara hay jafna vi Benyamin kep yum Kis, nam mi goora vi Abiyel, goora vi Seror, goora vi Bekorah, goora vi Afiyak, goora vi sa ma hay jaf na vi Benyamin. Nam mi sa ma dono'o, dikam manjuf ŋolo kaw.

²Goora valam ma juf ka kep yum ala Sawul, joriyo'o, jifiy kaw, sa ma Israyel ma jifiyam ŋray hiɗi nam mayɗi, yalam kulo suwsi hiɗi fiyokka kaf kaw.

³Kuro ma boyna vi Kis bum Sawul viy goyo hay fat tara'a, nala Kis di tam goora valam Sawul ala: Fokaŋ kulo'o, vaŋ sa ma sunda mara kuɗaŋ kepe, tuɗaŋ garaŋ kurona.

⁴Nisi jik hay gal hiɗiyt Efrayim, purat hay nagat Salisa, may fi kuronɗi; nisi jik hay nagata Saalim; nisi may fi kuronɗi lay; nisi jik hay nagata vi Benyamin, may fi kuronɗi kaw.

⁵Hay li ma nisi co hay nagata Suf, Sawul di tam sa ma sunda ma ka kuɗumna ala: Naŋaya hotay vo'o, la naɗi, bun ɗawn yalam ma jok kuron bugolomu, ma tun caw garayt si naya.

⁶Sa ma sunda di talamu: Hay hoyok-ziyn tani sana vi Lawn ka kepe, mi sa ma sumun yum selemu, la nam di va'a, va namna lop bay liɗi. Nay tuɗay talamu, la nam as ɗekay kay hagata ta nay ma sla'ta klasige.

⁷Sawul di tam sa ma sunda valamu: Wulin kayni la nay tuɗayawa, nay ma naram mi sana vi Lawn ɗawn mi mige, kay va may hini hay birimna vayɗi? Va ma nay as vulum mi sana vi Lawn mayɗi. Va ma ka hay ɓaya mi mige?

⁸Sa ma sunda sli ditiya di tam Sawul: Humaŋu, gurjut ka hay ɓanu ir gal ma fiɗina vi sikel* kep; nan ma vula' mi sana vi Lawna, nala nam ma ɗekay kay hagata vaya.

⁹Jew ɓa-ɓat hay Israyel kayni, hay li ma sumun tuɗ job Lawna, nisi di ala: Nigiyaya, tuɗay kuɗ sa ma wi vokomna kay sum sa nisi yisi vaydi ala «sa jobta» kayni, hay ɓa-ɓat nisi yisi ala sa wi voksina.

¹⁰Sawul di tam sa ma sunda valamu: Naŋ di hay liyamu, naŋaya, tuɗaya nisi kali hay hoyok-ziyn ma sana vi Lawn ka hayna.

¹¹Hay li ma nisi ka jik kulo hay hoyok-ziyn kayni, nisi ŋaf hiɗi guro-boyna, sa cuki goyo kay go niyna. Nisi di'e: Sa ma wi vokomna ka tani su?

¹²Nisi hot dit ala: Awa, nam ka vokaŋu; may tuɗaŋis gosoyo, vaydi nam ka coy hay hoyok-ziyna kay li ɗifin kulo kay hiɗiyna kay por sumuna.

¹³Hay li ma nigi kalawa kulo hay hoyok-ziyna, nigi ma ŋaf hiɗi namu jew a nam jik kulo kay hiɗiyna kay ti'e; kay la nam bay co'o, sumun as tiɗi, jew a sum sa yiyn ti kayni, nam as gi bol kay ɗifinna tuwa. Tuɗgisa, kay nigi ma fum wulini.

¹⁴Nisi kali kulo hay hoyok-ziyna, hay li ma nisi co kulo way hoyok-ziyn kayni, nisi ŋaf hiɗi Samuel, nam ka jik kulo kay hiɗiyta.

¹⁵May buur kep jew cota vi Sawul kayni, Ma-Vatɗin di goy jew tam Samuel ala:

¹⁶Jifini, hay fatta ki vaydi nala, nan ma gi sa kep taŋu, mi sa ma hay nagata vi Benyamin, naŋ ma ɦok mul kalamu kay tunum mulu kay sumuna van sa Israyella. Nam ma suɗ sumuna van goy hay ɓam sa Filistina; kay nan cuk iranawa kay sumuna vanu, kay tiyta visi coowa ta-ta kulo tanu.

¹⁷Hay li Samuel iram cuk kay Sawul, Ma-Vatɗin dumu: Kilani mi sa ma nan daŋ kalamna; ma ti mul kay sumuna van ɗawn mi namu.

¹⁸Sawul co goboy tam Samuel hay vun-ziyna, nam jobomu: Nan siɗawaŋu, naŋ ma ɗekan kay ziyna vi sa ma wi vokomna ɗekge.

¹⁹Samuel hot dit tam Sawul, sa ma wi vokomna mi nanu. Jikaŋis kulo vokom kay jiŋiliŋŋa, kay vaydi nigi ma ti fun hiɗi nanu. Nan ma hinaŋ kal jifin tuwa, kay nan min daŋ kay slen ma ka li hay dikaŋ kafna tuwa.

²⁰Kurona vaŋ ma viy goyo wulin ir buur ɦidina, naŋ ma yor tuwaŋ kuɗumɗi, kay nam fiy kafe. Humaŋu, slen ma ŋaana hay Israyel kaf nam vi gige? Nam vaŋ naŋu hiɗi ziyna vi buŋ kaf ɗisu?

²¹Sawul hot dita: Nan mi sa ma hay jafna vi Benyamin. Jafna vi Benyamin kayni mi ma kiɗayna jar jafna vi Israyel kafɗi su? Jafna vanu mi ma kiɗayna jar jafna vi Benyamin ɗisu? Naŋ dan slen ki kayn nala kay mige?

²²Sawul hiɗi sa ma sunda valam kaw Samuel yawsiya, nam cuksi kalaf hay ziyna, nam vulsi liyn kulo vok sa yiyna kaf, nisi ka ir ki dok-ɦidi nala.

²³Samuel di tam sa ma kot tina: Maran gal ma nan vulaŋgina, ma nan daŋ ala naŋ burum goy gal tuɗoŋo na.

²⁴Sa ma kot tina vul bigiyta hiɗi sliw ma ŋuyi ta'na, nam vulum mi Sawul, Samuel di'e: Kayni mi sliw ma ŋayay goyna; burum gaa vokaŋu, naŋ ma ti'e, kay nan ŋom gal namna kayn ir vaŋu hay li ma nan yi sumuna. Ki kayn nala, Samuel ti fun hiɗi Sawul hay buur na'ta.

²⁵Kulo kay hiɗiyna nisi jikay gaa hay hoyok-ziyna, nala Samuel kus yoboyn hiɗi Sawul kulo kay yam-ziyna.

²⁶Bugol kayni nisi yaway kulo'o hay graw culum culum; hay ŋarpita pa, Samuel yi Sawul kulo kay yam-ziyda, nam di'e: Naŋaya, nan min hinaŋ tuɗa. Sawul fokay kulo'o, nam hiɗi Samuel kali goy kuɗ tuwsiya.

²⁷Hay li ma nisi co goy hay vun hoyok-ziyn ma vatay goyna, Samuel di tam Sawul: Naŋ ma di tam sa ma sunda vaŋu kay nam ma tuɗis voko. Sa ma sunda kal voko. Samuel di'e. Wulin kayn colaŋ yo, nan min daŋ labara vi Lawna.