Read Mashami New Testament Matayo 8 Bible Online

Matayo 8 - Mashami New Testament bible

Matayo 8

¹Naasa elyi eefo asholookaa auka kulya ifumbu-u vandu vakallatya matorito meengyi.

²Nalyo kasha nang'u nndu alwee ivave kamoolokya ng'undeny kaamba, “Woi Nndumi kwankunda kushiidimaa isheeremuta.”

³Yesu kaorwa woko kampaana kaamba, “Shankunda, eremukany.” Nalyo yeni keeremuka ivave lyilya lyentiri.

⁴Naasa Yesu kammbia, “Nta kulavie nndu! Mmbo kusheenda kundekoora efo kwa nkohani, kundevika kyaanu kwa Iruva kilya Mose avavasye, kive nkyo ukureeki kwawo.”

⁵Kikasia, elyi afika kulya Kapernaumu, kasheywa ni nshilyi wa vasikari iyana, kamooshora,

⁶kammbia, “Woi Nndumi shitiri ishinga lyakwa lyilele kyeny lyikee yuumu malungo, lyiifo lyivavywaa kyuumu.”

⁷Nawe kammbia, “Nsheendaa shindenkira.”

⁸Nshilyi ulya wa vasikari iyana kaallwa kammbia, “Woi Nndumi yeny nshimaa kutani kwafika efo si ya kai ka mmba-kwa-fo. Ammba irero lyimwi nsi na ishinga lyakwa lyisheshiaa.

⁹Shamashika neeny mmbo shikee kwasi ya ushilyi lwa vengyi shivetiri na vasikari vakwa, neeny ni nniini waawo; naasa shavia eto umwi, ‘Enda’, mmbo asheenda, shavia eto ungyi, ‘Osho’ nawe mmbo aveshaa. Shavia ishinga elyo lyakwa, ‘Tana kindo kive! Lyikavekitana.’ ”

¹⁰Naasa Yesu ekiita indo kikantamba kavia valya veeiyo vevandami nawe, “Ni kya dede shamuvia, nta kunu Israeli nshindelollye kikusiryo king'ani indo-fo.”

¹¹Na yeny shamuvia, “Kusheshaa vandu vengyi wooka taari ya ngama na ya nkwaany vashelya shoonga vasasangyi na Abrahamu na Isaki na Yakobo efo umangyi ny lwa Iruva.

¹²Na veni umangyi wo vandeerwa poo efo kuwoye ireema na ikwaalala na irafunnya mayoo.”

¹³Naasa Yesu kavia nshilyi ulya wa vasikari iyana, “Kweenngye! Kivekuviiya indo shaasa kukusirye-u!” Nalyo ishinga lilya lyakwe lyikashia kyeeri kilya kyeni.

¹⁴Nalyo Yesu kandefika kulya kyeny kwa Petro kalollya maye-a-nka alele kitareny elwee iseng'u.

¹⁵Nawe kampaana woko, iseng'u lyilya lyikammbuka. Kakwiipoo kapooka infurukannya.

¹⁶Na elyi kwammiila vakamweenngye vandu vengyi vellyiswa ukiva mmimuyo mikasha. Nawe kaanta mimuyo ilya mikasha eshaambaa kirero kyeni. Na valya veeiyo valwee kavakira woose;

¹⁷Naambo kirero kilya kindekooya iinukya shaasa kilererwa ni nkisuku ulya Isaya kikaamba, “Mmbwe aleipoo ngyunana teru neekurika ndwari teru.”

¹⁸Naasa Yesu ekilollya nsemu wa vandu vansha ikummbya-fo vakanndingitya nawe kavavasya vanderuuka mbai ilya ingyi.

¹⁹Nalyo mwaarya wa fitabu umwi kamweengya kammbia, “Llori shikundye ikulatya wo ando koose kusheenda.”

²⁰Na Yesu kammbia, “Maparwe mmbo atiri mbanga ta vayo na ndeye ta nginiiu tikavetira fifuri fya vayo. Indi mwana yeto wa nndu nnatiri ando asheekeryaa nrwe wakwe-fo.”

²¹Na ungyi akee nnang'ani ya valya vakiloshyony kyakwe kasha kammbia, “Nndumi shiniinga mumu mbele shikweengye inderika nde wakwa.”

²²Indi Yesu kammbia, “Shilatya, kureeye vafu varike vafo vawo.”

²³Naasa Yesu kasaama ngalaveny valya vakiloshyony kyakwe vakasaamafo nawe.

²⁴Naasa elyi veefo kukasha uraato uniini. Ngalava ilya ikatana yasikywa ni matundulu. Nawe eelele rony.

²⁵Vakanserikya vakamwaanta vakammbia, “Woi Nndumi lwaauwe lwiifo lusiaa.”

²⁶Nawe kavavia, “A nkikyi elyi mweereiye indo? Mmbo mukee va kikusiryo kyaangu nnu.” Nalyo kasalala kakyeemmya uraato lulya na yeeve ilya kukava kimammya sau.

²⁷Naasa vandu valya vakatambiswa vakaamba, “A nndu yeu ni wa kwi, kutani uraato lwamwiirikya na yeeve yeyo!”

²⁸Naasa ekifika kwakulya ya uruka lwa Vagerasi kakwaanannya-fo na vandu vavii vatirwa mmimuyo mikasha vauka fifuny vakee vanyaasi nnu, nta nndu nalaidimi iira shia ilya.

²⁹Nawo akakawo vakoongora vakaamba, “Yewe mwana wa Iruva nkyikyi lutiri na yewe? A mmbo kulesha kunu kushelusisya kulaore kyeeri kyeru kyamfika?”

³⁰Naasa kwaasha na yoo ando vekai kweifo ironda lya nguve lyishiiswa-fo.

³¹Nalyo mimuyo ilya mikasha ikantereva ikaamba, “Kwakooya kwalwaanta lurumi lundeanga irondeny lya nguve yeto.”

³²Nawe kaivia, “Kweenngye!” Nato akakato tikapufuka-fo tikandekweera efo waangeu. Tikasiiya efo yeeveny tikafiiya efo mureny.

³³Naasa veesi valya vakarisha vakatana vafika kulya muriny. Vakandeongoya-fo mbony tilya toose na ta vandu valya vatirwa mmimuyo mikasha.

³⁴Nalyo akakava vandu va kulya muriny vakakuruka-fo woose vakasha ikwaananya na Yesu. Vekillolya vakantereva naambo nauke efo myuungony yaawo.