Read Mashami New Testament Yohane 15 Bible Online

Yohane 15 - Mashami New Testament bible

Yohane 15

¹“Yeny ni nsabibu wa dede na Nde-yaakwa kava mmbwe nremi.

²Wo iramba lyikulunngye neeny lyikara lyilavika ndunda mmbo alyiammbwaa-fo. Na elyo lyiiyo lyoose lyivikaa ndunda kalyilyisa lyeengere ivika ndunda.

³Neeni mmbo mukee vailyise kimaruma kya ndera yakwa shammeemuvia.

⁴Kekaeny-fo mukulunngye neeny, neeny shivekaa-fo shikulunngye neeni. Kikava shaasa iramba lyilashiidimaa ivika ndunda lyikee kyaanya kya vayo kwakooya kulaore lyikulunngye na nsabibu, neeni ni kiwo-da, kwakooya kulaore mwakaa-fo mukulunngye neeny.”

⁵“Yeny ni nsabibu neeni mukava ni maramba a vayo. Yeto akaa-fo akulungye neeny, neeny shavekaa-fo shikulunngye nawe, mmbwe avikaa ndunda shiingyi. Mashika kwakooya muraukani neeny mmushiidimaa itana kindo nta-fo.

⁶Kwakooya kulaore nndu akaa-fo akulungye neeny mmbo asheerwaa poo sha iramba nandeuma. Nang'u akasanyiryo andeerwa murony akorwa.

⁷Kwakooya mwakaa-fo mukulunngye neeny na marero yoo akwa kwakooya mwakaa nang'u efo nriminy, mmbo muningwaa wo kindo mwankunda ikitereva-u.

⁸Kindo Nde-yaakwa akooya ing'aniswa nakyo ni elyi mwavika ndunda shiingi, mukashiviiya vakiloshyony vakwa.

⁹Shaasa Nde aleshikunda yeny neeny shavemukunda yeni, kyekaeny na ukundi yelo lwakwa.

¹⁰Kwakooya mwaringa mavavaso akwa llyoo-ny mushekaa na ukundi lwakwa. Shaasa na yeny shiriingye mavavaso a Nde-yaakwa shavekaa na ukundi lwakwe.

¹¹Akakakyo shammeemuvia indo naambo nsia yeto ushitiri yeny ukooye imwaanga yeni na nsia yeto wany weende ing'ana.

¹²Ivavaso lyakwa mmbo lyikee indi, kundaniny muveni na veni shaasa shilevemukunda yeni.

¹³Nta nkwiifoo nndu atiri ukundi uniini ngota elyi areka muu wakwe kimaruma kya mbuya takwe-fo.

¹⁴Naasa yeni mmuvaa mbuya takwa, kwakooya mwatana kindo yeny shilemuvavasya.

¹⁵Nta nshikimuvaangaa-se mashinga-fo, mashika nndu ishinga nnamanyaa kindo nndumi yeto wakwe ee-fo atanaa-fo, mmbo shammeemuvaanga ni mbuya, kimmba efyo shileita fyuuka kwa Nde mfyo shilemusununndya fyoose.

¹⁶Nta shi yeni muleshisauwa-fo. Ni yeny shilemusauwa yeni, shamuruma mweende mundevika ndunda. Na ndunda yeto tany muvikaa tikooye ikaafo llung'anu. Na wo kindo mwankitereva Nde kikee kya irina lyakwa naambo naidimi imuniinga.

¹⁷Naasa ivavaso lyakwa lyikava llyo elyo lyeamba, Kundaniny!”

¹⁸“Kwakooya ulana yelu lwamusua, manyiny mmbo lulelava ishisua yeny kulaore lwammusua yeni.

¹⁹Kukooye mwekee vakyuulana, ulana yelu mmbo lwemukundaa lwiishi mukee va vayo. Indi elyi mwanra mulava vakyuulana neeny shamusauwa shimuuta ulaniny, nkyo kimaruma ulana lukamusua yeni.

²⁰Kekummbweny kirero kilya shilemuvia shaamba, nkwiifo nndu kishinga airye nndumi wakwe-fo. Kwankooya mmbo valeshuumbuta yeny, neeni-da mmbo vashemuumbutaa kukooye veeringaa ndera yeyo yakwa, mmbo veeringaa na yeyo yaany.

²¹Kya indi efyo fyoose mmbo vashemutannyaa kimaruma kya irina lyakwa kimmba valaishi yeto aleshiruma.

²²Kukooye kulaore shilesha neesherera nawo mmbetiri uvingo lwa ulyamari-fo. Indi ulaalu mmbatiri kindo kyeekuringa kyeekuuta ulyamari yelo lwawo-fo.

²³Nndu kashisua yeny, mmbo avesua na Nde-yaakwa.

²⁴Kukooye kulaore shiletana mashora alya efo nnang'ani yaawo alya nndu ungyi nalandeetani, mmbeetiri uvingo lwa ulyamari-fo. Indi ulaalu mmbo valollye-da vakaveshisua yeny na Nde-yaakwa vakavensua.

²⁵Mmbo kileenda indo naambo kirero kilya kiinukye kilya kikee kireiye efo uvavasony lwawo kyeamba, ‘Mmbo valeshisua kikee kyaa ruu parany.’ ”

²⁶“Indi Mweekyi yeto shinrumaa auka kwa Nde, akee Mumuyo asheendee mbony ta dede, kwakooya ansha, mmbo asheshivikyaa ukureeki.

²⁷Na yeni ni kiwo-da mushevikaa-u ukureeki kimmba muvandami neeny uka elyo mapookyony.”