Read Mashami New Testament Yohane 16 Bible Online

Yohane 16 - Mashami New Testament bible

Yohane 16

¹“Na kyashiniinga shamuvia indo nnaambo mulaoni nsindara. Mmbo vakaa vamwaante efo ikwaanuny lyawo.

²Eeda, kushaa kyeeri wo nndu amuwaa naambe mmbo atana kindo kyeeinndya Iruva.

³Na kivaniingaa vatani indo, nyelyi valaishi nta Nde, nta yeny valashiishi.

⁴Na kimaruma shamuvia indo, kyeeri ekyo kikamfika naambo mumanyi ni yeny shimuni shilelava imuvia indo.” “Nta nshilemuvia indo uka elyo mapookyony-fo, mashika llyo shekee neeni ando amwi.

⁵Ulaalu mmbo shiifo nkweenngyaa kwa yeto aleshiruma. Naasa nta umwi wa kunu nnang'ani yaany ee-fo ashivesaa naambe, ‘Kwi kusheendaa-fo.’

⁶Indi elyi shamuvia indo, na yeni mukaishwa fyoova shapu efo nriminy.

⁷Na yeny shamuvia kya dede, elyi nsheendaa, yeni mushuutaa-u iviiri. Mashika shanra shilaenda, yeto Mweekyi yeto nnyashaa kwany-fo. Indi kwakooya shameenda llyo nshenrumaa kwany.

⁸Nawe elyi asheshaa ashesununndyaa ulana yelu kya ulyamari na kya usumanu na kya mwaandu.

⁹Kya ulyamari nnyelyi valema ikusirya neeny.

¹⁰Na kya usumanu nyeelyi shiifo nkweenngyaa kwa Nde, na yeni mulakishilollyaa-se.

¹¹Na kya mwaandu nyeelyi nniini wa ulana yelo ammaa yuutwa uvingo.”

¹²“Mmbo shetiri-se mmbony shiingyi shekundye imuvia kya indi nyeeli mulashiidima itifita ulaalu.

¹³Indi kyeeri we asheshaa, we Mumuyo mmbo asheendee mbony ta dede, mmbwe ashemooraa shia mumanyi findo fya dede fyoose. Nawe nta nnashereraa afyuuta kwakwe muni-fo. Ni mbony yeto amiita nto ashetyaambaa toose, na findo fikaa fishe nfyo ashemoongoyaa.

¹⁴Nawe ni yeny asheshing'anisaa kimmba mbony yeto ashemoongoyaa ni kunu kwakwa ashetuutaa.

¹⁵Na findo fyoose Nde atiri mfyakwa. Nkyo kimaruma shamuvia, mbony ashemoongoyaa ni kunu kwakwa ashetiutaa.”

¹⁶“Kwiirishe kinnywa mmushekishilollyaa-se. Kuveirisha-se kinnywa muvewuya ishilollya.”

¹⁷Naasa valya vakiloshyony maata vakaviana wo veni na veni. “A ekyo aluvia nkyoki ndesa? Kwiirishe kinnywa mmushe kishilollyaa-se-fo. Kuveirisha-se kinnywa muwuye ishilollya. Kaveamba, ‘Shiifo nkweenngyaa kwa Nde?’ ”

¹⁸Naasa vakaamba, A ekyo aamba kya iirisha kinnywa nkyoki ndesa? Llwiishi kindo aamba-fo.

¹⁹Naasa Yesu kamanya mmbo vakunndye immbesa, kavavia, “Kindo mwiifo mushuumburanaa nyelyi shaamba, ‘Kwiirishe kinnywa mmushekishilollyaa-se-fo. Kuveirisha kinnywa muwuye ishilollya.’ ”

²⁰Ni dede kya dede shamuvia, “Yeni mmbo mushefuaa na ikapa kiiyo lyo ulana yelu lo lushefuraa-dwa. Na yeni mushesokywaa mfyoova. Kusyeny-do fyoova efyo fyany fikaa fyaaluke nsia mweni.

²¹Nndu nka kafika kyeeri kyakwe kya iira mwana mmbo ating'wa kimmba kyeeri kyamfika. Indi kamaa iira mwana nnakikummbwaa-se ngatara ilya-fo kimaruma kya nsia untiri kya nndu amiirwa aendwa kunu ulaniny.”

²²Na yeni ni kiwo-da, “Kyeeri kya ulaalu mwiifo musokywa mfyoova. Indi nshemulollyaa-se lyingi, na mirima yaany ifure, na nsia yeto wany nkwiifo nndu ashemusokaa-fo.

²³Na nkonu yeto ukamfika, mmusheshivesaa-se kindo-fo. Ni dede kya dede shamuvia, kwakooya mwatereva Nde kindo na kikava ki ashemuniingaa kikee kya irina lyakwa.

²⁴Fyeeri efi fika ulaalu mulandetereva kindo kikee kya irina lyakwa-fo. Ketereveny, nalyo musheniingwaa, na nsia wany wiishwe shapu.”

²⁵“Marero yoo shammeerera neeni mmbo ekee a fyaaso. Indi kyeeri kiifo kishaa shilakireraa-se neeni fikee fya fyaaso-fo. Llyo nshemoongoyaa mbony ta Nde paa.

²⁶Na nkonu yeto ukamfika llyo musheterevaa kikee kya irina lyakwa. Nta nshamuvia ni yeny nshemuterevyaa Nde-fo.

²⁷Mashika we Nde amukunndye muni, kimmba mwammeeshikunda yeny mukavekusirya kwakwa mwiishi mmbo shilesha shyuuka kwa Nde.

²⁸Shilesha shyuuka kwa Nde, shakusheya na kunu ulaniny. Na ulalu shiifo mmbukaa-se kunu ulaniny, shiwuye ikweenngya kwa Nde.”

²⁹Naasa valya vakiloshyony vakaamba, “Ate ulaalu kwarera paa, kulakirere-se na fyaaso-fo.

³⁰Na yese lwammeekumanya ulaalu mmbo kwiishi findo fyoose nta kulatiri kivesyo ni nndu. Nkyo kimaruma lukakusirya neewe lwiishi mmbo kusheye kuuka kwa Iruva muni.”

³¹Yesu kavaalwa, “Ulaalu mwammbaany vandu vakusirye-u indo?

³²Llen-te, kukaa kufike kyeeri na isha kyammeesha neeni mundenyanyatwa, wo nndu na kyeny kwakwe muni mushireeye-u shimuni. Nta nshakaa-fo shimuni-fo, mashika ni Nde wakwa akaa-fo neeny.”

³³Marero yoo mmbo shammaarera mukooye itira ufoo mukulunngye neeny. Mukee kunu ulaniny mmbo mukee na fimusisiraa. Kaaryeny, yeny mmbo shammbinga ulana elo.