Read Mashami New Testament Yohane 18 Bible Online

Yohane 18 - Mashami New Testament bible

Yohane 18

¹Naasa elyi Yesu ammaa irera indo kakwiipoo-fo aryani na valya vakiloshyony kyakwe. Kandefika kulya kwakulya ya imungo lya Kedroni kulya nndeny. Nalyo kaira nafo aryani na valya vakiloshyony vakwe.

²Naasa na Yuda ulya anndiinngyaa eishi ando alya mashika mfo kundo Yesu na valya vakiloshyony kyakwe valeva vesasanngyaa-fo keengi.

³Naasa Yuda kandoondwa itorito lyilya lyeefo lya vasikari na vasero va poo maata va efo kwa vakohani vaniini na Vafarisayo. Kasha nafo aryani nawo varie fimishamisha na taa na fisha.

⁴Naasa Yesu emmanya filya fishenkooyaa fyoose. Kasomuka na efo shia kavavia, “A nndu mwiinnduuyaa ni vi?”

⁵Vakanndouwa, “Ni Yesu wa kulya Nasareti.” Yesu kavavia, “Mmbwe yeny.” Naasa kusalalye-fo na Yuda ulya mwiinndinngya aryani nawo.

⁶Naasa elyi avavia, “Mmbwe yen”, nawo vakawuya na numa vakawa sumbai.

⁷Naasa kawuya kavavesa lya kavii, “A nndu mwiinnduuyaa ni viiny?” Nawo vakaamba, “Ni Yesu wa kulya Nasareti.”

⁸Yesu kavavia, “Shammeemuvia, mmbwe yeny. Kwakooya ni yeny mushiruuyaa lekeyeny yeva-te vakweenngye!”

⁹Kikaenda indo naambo kilya alerera kindeinukya indo kyeamba, “Valya kuvashiniinngye nshilereta-u nta umwi-fo.”

¹⁰Naasa Simon Petro etiri usu, kalusommwa kakapa nalo kishinga kya nkohani nniini kammashwa kuri ka woko usha, irina lya kishinga kilya ni Maliko.

¹¹Naasa Yesu kavia Petro, “Viira usu efo kipony kya vayo. Upata yelu Nde ashiniinga mmbo kukundye shire shilaluna ndesa?”

¹²Naasa itorito lyilya lya vasikari lyiryani na vaniini vawo na vasoro valya va poo va Vayuda vakatira Yesu vakamfinga.

¹³Vakanrwaa kulya kwa Anasi, mashika we eekee ndeyaanka wa Kayafa ulya eekee nkohani nniini mwaaka ulya.

¹⁴Na Kayafa mmbwe ulya aleniinga Vayuda irero llya ashaambaa, mmbo kyamuviiya kisha nndu umwi nafwe ando a vandu va uruka loose.

¹⁵Naasa Simon Petro eefo alaatyaa Yesu, na ungyi wa vakiloshyony nawe-da. Naasa nndu ulya wa kiloshyony aishivani na nkohani ulya nniini. Kaira na efo poo kwa nkohani ulya nniini ando amwi na Yesu.

¹⁶Naasa Petro kairisha yoo ngiriny yoo kimbengeny. Nalyo ulya ungyi wa kiloshyony ulya aishivani na nkohani ulya nniini kasomuka na mbengeny. Karera na nka ulya kishinga mwiringa ngiri kaita Petro na efo kari.

¹⁷Nalyo nka ulya kishinga mwiiringa ngiri kavia Petro, “Na yewe-da nshi kukee nndu wa kiloshyony kya nndu yeto?” Nawe kaamba, “Nshiwe yeny-fo!”

¹⁸Naasa kusalalye-fo mashinga na vasoro valya va efo poo vaatye muro wa makaa mashika kwee-fo mbeo, vakaora muro.

¹⁹Naasa nkohani ulya nniini kavesa Yesu kya vakiloshyon kyakwe na kya miloshye yakwe.

²⁰Yesu kamwaallwa, “Yeny mmbo shirerye paa ulana lukaita. Yeny nkonu simu shileva mwiilosha efo mmba teeterevya na efo mmba ya Iruva efo kundo Vayuda woose vakwaanannya. Nta shilarere kindo kirika-fo.

²¹A elyi kwashivesa yeny nkiki? Kyevesa yewo valeita kindo shilerera! Yewo mbo vaishi kindo yeny shileamba.”

²²Na elyi arera indo nndu umwi wa vasoro valya vapoo kakapa Yesu woi kaamba, “A niindo kwakara irouwa nkohani nniini?”

²³Yesu kanndouwa, “Kwakooya mmbo sharera kikasha oraany ukasha lwavayo! Indi kwakooya ni kisha, a ekyo kwashikapya nkyoki?”

²⁴Naasa Anasi kanrika akee mfinge nafitwa kulya kwa nkohani ulya nniini muni, mmbwe Kayafa.

²⁵Naasa Simon Petro karewa asalalyi-fo ashooraa muro. Nalyo vakammbia, “Na yewe-da, a nshi kukee wa kiloshyony kyakwe?” Nawe kalema-fushu, kaamba, “Nshiwe yeny-fo!”

²⁶Naasa mashinga a nkohani nniini ulya umwi waawo akee mfyari wa ulya Petro alemmaswa kuri kammbia, “A nshi shakulollya alya nndeny kuryani nawe?”

²⁷Naasa Petro kalema-fushu lyingi. Nalyo yeni oro ya nguku ikakapa.

²⁸Nalyo vakauta Yesu kulya kwa Kayafa vakanrwaa efo mmba ya ushilyi ya Pilato. Naasa kyeeri kikava kya ngoma. Nawo veni nta valaange efo mmba ya nshilyi wa Kaisari naasa valakooye itefuka naambo vaidimi ilya Pasaka.

²⁹Nalyo Pilato kasomuka na poo ando vakai kaamba, “A kyo kikumbo ki mweende kya nndu yeu?”

³⁰Vakaallwa vakammbia, “Kwee nndu yeu kulaore ekee mwiitana makasha nta llweshaa ishenrambikya maakony afo-fo.”

³¹Nalyo Pilato kavavia, “Mwiipoony yeni-te munderummbwa kyakwe kisumani na mavavaso a ki-kwany.” Nalyo Vayuda vakammbia, “Llutiri muumu wewaa nndu-fo.”

³²Nakyo kikaenda indo naambo kirero kilya kya Yesu kindeinukya kilya aleamba kya ufu ashefwaa llwa ngata ingai?

³³Nalyo Pilato kawuya yaanga na efo mmba ya ushilyi. Kavaanga Yesu kammbia, “A yewe mmbo kukee mangyi ya Vayuda?”

³⁴Yesu kaallwa, “Elyi kwarera indo mmbo kwakyuuta kwafo ku muni, ao ni vandu vengyi vakuvia indo kyakwa?”

³⁵Pilato kaallwa, “A yeny mmbo shikee Myuda-ro? Ni vandu va uruka lwafo sanda na vakohani vaniini mmbo vakurambikya kunu maakony akwa. A ekyo kuletana nkyoki ndesa?”

³⁶Yesu kaallwa, “Kya umangyi lwakwa, nshi luukye kunu ulaniny-fo. Kwee ni kunu ulaniny umangyi lwakwa luukye, vasoro vakwa mmbo veshikapanyaa, shilashe irammbikywa maakony a Vayuda yewo. Indi ulaalu shaasa kyikai, umangyi lwakwa nshi lwa kunu-fo.”

³⁷Nalyo Pilato kammbia, “A kwavevaany mangi-ro?” Yesu kaallwa, “Ni yewe kwakyaamba kumuni mmbo shaveva mangyi-da. Kimaruma shawonika na kimaruma shasha na kunu ulaniny ni indevikya ekyo kyikee dede ukureeki. Na wo nndu aparikyeny efo dedeny mmbwe ashaaranyaa unyanga lwakwa.”

³⁸Pilato kammbia, “A yekyo kyikee dede nkyoki-ro?” Ekyaamba indo kawuya isomuka lyingyi na poo kundo Vayuda vakai, kavavia, “Nshekooya kindo kya uvingo lwakwe nta kyimwi-fo.”

³⁹“Neeni mmbo mwiishivie ishitereva shimuporomuye nndu umwi nkonu yeto wa Pasaka. Naasany mwakunda shimuporomuye mangyi yeyo yaany?”

⁴⁰Nalyo vakakapa kyoorongye lyingyi vakaamba, “Nshi yeto-fo, ni Baraba! Nawe Baraba eekee nndu mwaala shia.”