Read Mashami New Testament Yohane 4 Bible Online

Yohane 4 - Mashami New Testament bible

Yohane 4

¹Naasa Yesu eekimanya Vafarisayo vamiita we mmbwe akee iwonisa vakiloshyony veengyi na ibatisa vandu veengyi ngota Yohane.

²(Kya indi lyo Yesu we muni nnyalebatisa vandu-fo, ni valya vakiloshony kyakwe).

³Kooka kulya Yudaya kawara shia kaenda lyingyi kulya Galilaya.

⁴Naasa kalollya kuti naire shia yeerummbwa kulya Samaria.

⁵Naasa kafika muriny umwi wa kulya Samaria uvaangwaa ni Sikari ukee kufii na irema llya Yakobo aleniinga mwana ulya wakwe Yosefu.

⁶Nafo kweifo usoka llwa lwa Yakobo. Naasa Yesu kakooya amaariswa nkyaaro kakaa-u rembo indo yoo usokeny, kyeeri mwi usimbiki.

⁷Kukasha nafo nndu nka wa Kisamaria isheraa mura. Yesu kammbia, “Shirita mura shini.”

⁸Mashika valya vakiloshyony kyakwe veengye kulya murin vanderuuya-fo shoonga.

⁹Nka ulya wa Kisamaria kammbia, “Kyavaany inda yewe nndu wa Kiyuda kwashitereva mura neeny shikee nka wa Kisamaria? Nyeeli Vayuda kulaore veshiidikiranaa na Vasamaria.”

¹⁰Yesu kaallwa kammbia, “Kwee kweeshi simbo ya Iruva iifo, na nndu yeto akuvia, shirita mura shini, kukooye kweemwiishi mmbo kweenterevaa nawe eekuniingaa mura utiri muu.”

¹¹Nka ulya kammbia, “Nndumi, a elyi kulatiri nta kindo kyeeraa mura na kirori eki kya mura kyoolokye si, nkwi kwauta mura yeto utiri muu?

¹²A mmbo kukee nniini kwairya nde ulya weeru Yakobo, yeto aleluniinga kirori eki kya mura? Nawe nng'u aleva mwiina mura we muni na vana vakwe na findo fyakwe amasye.”

¹³Yesu kaallwa kammbia, “Wo nndu ana mura yeu mmbo awuyaa yaakuka-se.

¹⁴Indi nndu kana mura yeto shinningaa yeny nnyakyaakukaa-se-fo na kafika llung'anu. Indi mura yeto nshenniinga efo nnang'ani yakwe mmbo ushaalukaa usoka lwa mura wiishwe muu wa llung'anu.”

¹⁵Nka ulya kammbia, “Woi Nndumi shiniingaany mura yeto, shilakooye itirwa nnyura nta ikwaarisa isha iraa mura kunu.”

¹⁶Nawe kammbia, “Endevaanga mmi wafo kuwuye na yaa!”

¹⁷Nka ulya kaallwa kaambia, “Nshitiri mmi-fo.” Yesu kammbia, “Mmbo kwaamba songosiny, elyi kwaamba, Nkutiri mmi-fo.

¹⁸Mashika kweeriwa mmbomi varaanu na yeu akurie ulaalu nshiwe mmi wafo-fo. Elyi kwaamba indo ni kya dede.”

¹⁹Nka ulya kammbia, “Nndumi shilollye mmbo kukee nndu nkisuku.

²⁰A vande valya veru mmbo valeindya Iruva kunu ifumbuny elyi. Neeni mukaamba, kulya Yerusalemu mfo kundo kusumani iindya Iruva.”

²¹Yesu kammbia, “Nka shiirikya. Mmbo kukaa kushe kyeeri mulasheindyaa Nde kunu ifumbuny elyi ao nta kulya Yerusalemu.

²²Yeni mmbo mwiindyaa kindo mulakiishi, neese lukaindya kindo lukiishi. Kimmba efo kwa Vayuda mfo kundo kuukye ukiro lwa vandu.

²³Kya indi kukaa kushe kyeeri naakwa na ulaalu kiveefo-da, elyi veindya Nde va toki vashemwiindyaa kikee kya ngata ya Mumuyo kiveva kya dede. Mashika Nde mmbo akee iruuya vemwiindya va ngata yeyo.

²⁴Iruva mmbo akee wa ngata ya Mumuyo na yewo vamwiindyaa nkuti vamwiindye kikee kya Mumuyo kiveva kya dede.”

²⁵Naasa nka ulya kammbia, “Shiishi mmbo kusheshaa Mesiya yeto avaangwa ni Kristo. Nawe meendi asheshaa mmbo ashelwoongoyaa findo efyo fyoose shaasa fikai.”

²⁶Yesu kammbia, “Yeny sharera neewe mmbwe yeto.”

²⁷Naasa kikeeny yoo, nalyo valya vakiloshyony kyakwe vakasha vakasongololo elyi vakooya ereraa na nndu nka. Indi kulakae-fo nndu ammbesa nkikyi kwasia kwakwe ao nkikyi kwarera nawe.

²⁸Naasa nka ulya katiiya-u nungu ilya yakwe. Kaenda kulya muriny, kandevia vandu,

²⁹“Oshony mushelola nndu ashoongoya findo shitannyi fyoose. Kulakooye mmbwe Kristo ndesa?”

³⁰Vakakwiipoo vauka kulya muriny vakamweengya.

³¹Kikeeny yoo nnang'ani yeu, valya vakiloshyony vakantereva vakaamba, “Llori lyaan-te!”

³²Nawe kavavia, “Yeny shitiri shoonga yeelya yeni mulaiishi.”

³³Naasa valya vakiloshyony vakaviana, “A mmbo kwiifo nndu ammweenngye kindo kyeelya ndesa?”

³⁴Yesu kavavia, “Indetana kindo kikundywa ni yeto aleshiruma na indeinutya mashora akwe nkyo kyava shoonga yakwa.

³⁵A yeni nshi mwaamba kusaa-u miiri iina kufike yoo mailullyony? Manyiny kindo shamuvia, ‘Ipoony miso mulole, marema shaasa evereye yuululwa.’

³⁶Mwiilula ni ulaalu-da aifo awarya isina lyakwe na yuumbya fimu fyeendesanyirya efo muuny wa llung'anu. Na yeto mweera mbeu kusande na yeto mwiilula vafure kimwi.

³⁷Mashika kyaaso kilya ni yoo kyamanyikya mmbo kilererwa dede kyeamba, ‘Mweera mbeu ni ungyi na mwiilula kava ungi’.

³⁸Yeny mmbo shamuruma mundeilula kindo mulavinnyi. Ni vengyi vavinnyi-u neeni mukandesamdwa neewo vavinnyi-u.”

³⁹Naasa vandu va Samaria veengyi vakapooka ikusirya nawe kimaruma kya marero a nka ulya elyi avika ukureeki ashaambaa, “Ashoongoya fyoose shaasa shiletana.”

⁴⁰Naasa elyi Vasamaria vafika kulya akai vakantereva nakae nawo. Kakaa-fo ando a mikonu ivii.

⁴¹Nalyo veengyi kilanya vakapooka ikusirya nawe kimaruma kya ndera yakwe.

⁴²Vakavia nka ulya, “Kyaluniinga lukakusirya-u nshi kilya kwaambau yewe-fo. Mmbo lwamiita luveni lukamanya yeu mmbwe dede Nkira wa ulana.”

⁴³Naasany kwemiira-u mikonu ivii, kakwiipoo-fo kandefika kulya Galilaya.

⁴⁴Mashika Yesu muni alekureeka-u kyeamba, “Nndu nkisuku nshi efo urukeny lwakwe akooya iindywa-fo.”

⁴⁵Naasa elyi afika kulya Galilaya vandu va Galilaya vakammbwarya valollye fyoose shaasa aletana kulya Yerusalemu nkonu ulya nniini. Mashika nawo-da vesheye nafo kya nkonu ulya nniini.

⁴⁶Naasa kavefika-se kulya Kana ya Galilaya kulya aleallwa mura ulya ukava mfinyo. Naasa kweefo nndu umwi nshilyi eetiri mwana wakwe wa kyuumi elwee kulya Kapernaumu.

⁴⁷Nawe elyi amiita mbony ta Yesu ansha na kulya Galilaya auka kulya Yudaya, kawara shia yeenda kafika kulya akai. Kantereva nandesoka nafo, nakire mwana ulya wakwe; mashika ekee rengeny yefwa.

⁴⁸Naasa Yesu kammbia, “Kwakooya kulaore mwalollya ngyende na findo filandelollyo lyingi, mmushekusiryaa-u-fo?”

⁴⁹Nndu ulya nshilyi kammbia, “Woi Nndumi, soka-dwa, mwana ulya wakwa kulaore annutuka.”

⁵⁰Yesu kammbia, “Kweenngye-da, mwana wafo eefo na muu.” Naasa, nndu ulya kakusirya na kirero kilya Yesu ammbia, kavekweengya.

⁵¹Arie shia yeenda na kyeny, mashinga akwe akasha imwaammbya, akaamba, “Mwana wafo eefo na muu.”

⁵²Naasa kavasununda kyeeri alepooka iva ng'waana. Vakammbia, “Ni ukwau kumfika saa mfungare, llyo muro ulya ulemmbuka.”

⁵³Naasa nndu ulya kamanya ni sa ilya sheni llya Yesu alemmbia, “Mwana wafo eefo na muu.” Kava nndu akusirye-u, na va kyeny kwakwe woose.

⁵⁴Nakyo nkyo kindo kya wende kya kavii Yesu aleengera itana llya aleuka Yudaya kasha na kulya Galilaya.