Read Mashami New Testament Yohane 7 Bible Online

Yohane 7 - Mashami New Testament bible

Yohane 7

¹Naasa numa ya vayo Yesu kava mwiireera kulya Galilaya, Nyeeli nalekunndye iireera kulya Yudaya mashika elyi Vayuda vesiaa immbwaa.

²Na mikonu ilya miniini lya Vayuda ikee kufii, ilya yeemanya matengo.

³Naasa vanavamaye vakammbia, “Wara shia kwakwiipoo kunu kundefika kulya Yerusalemu, na vakiloshyony vafo nawo-da vakooye ilola mashora yoo afo kwatana.

⁴Mashika nkwiifo nndu atana kindo kirika kakunda nawe amanyike urukeny-fo. Kwakooya mmbo kwakunda itana mashora a ngata yeyo, enda kooreny na va ulana-te.”

⁵Mashika naakwa ni vanavamaye mmbalemwiirikya-fo.

⁶Naasa Yesu kavavia, “Kyeeri kyakwa nkyalefika-fo. Indi yeni kyeeri kyany mmbo kiifo nkonu simu.

⁷Nta ulana llushiidimaa imusua yeni-fo Mmbo lushisuuye yeny mashika a ukureeki lwakwa shivikye kimaruma kya vayo shaamba, mashora a vayo mmeesi.

⁸Kweengyeny yeni mundelya suku-kuu. Yeny nshiderwaa nafo indelya suku-kuu-fo, kimmba kyeeri kyakwa kilandefika.”

⁹Amaamba indo, kakukaya kulya Galilaya.

¹⁰Naasa elyi vanavamaye vameenda irwa nafo kya mikonu ilya miniini iifo, nalyo we muni nawe-da kanderwa nafo kirika.

¹¹Naasa Vayuda vakava vannduuya elyi lya mikonu ilya miniini. Vakaamba, “A we nkwi akai?”

¹²Nalyo efo vanduny valya vasasangi-fo nkuka kukakaa-fo kusu-kusu shiniini kimaruma kyakwe. Valya maata vakaamba, “Mmbo akee nndu nsha, maata vakaamba, ode mmbo aretaa vandu.”

¹³Kikeeny indo lyo kulakae-fo nndu arera kyakwe, paa-fo kimaruma kyairyaa Vayuda.

¹⁴Naasa mikonu ilya miniini yamfika yoo nnang'ani kavii, Yesu karwa na efo mmba ya Iruva kaloshya-fo.

¹⁵Naasa Vayuda vakasongololo vakaamba, “A kyavaany inda elyi nndu yeu aishi indo nta nalakee lloshe?”

¹⁶Naasa Yesu kaallwa kaamba, “Kya ufundo kwakwa nshi lwakwa shimuni-fo ni lwa yeto aleshiruma.

¹⁷Kwakooya nndu akunda itana ekyo kikundywa mmbwe, mmbo akooyaa imanya kya ufundo yelo lwakwa, kwakooya sharera kyuuka na shila yakwa shimuni.

¹⁸Yeto mwiirera kyuuka na shila yakwe mmbo asia ando asheng'anisywa we muni. Indi nndu asiiya yeto aleshiruma ando asheng'anisywa mmbwe nndu wa toki, nalakee na findo fya mwiiri nta.

¹⁹A nshi Mose ammuniingye mavavaso? Na kunu nnang'ani yaany nta umwi aifo atana fya uvavaso yelo-fo. A kimaruma nkikyi elyi mukunndye ishiwaa?”

²⁰Vandu valya vakuumbye-fo vakaallwa, “Ako! Kulwee nrwe? A ni vi akunndye ikuwaa?”

²¹Yesu kaallwa kavavia, “Mmbo shiletana ishora lyimwi neeni mukasongololo moose.

²²Mose mmbo amuniinngye nndumwa weerinwa. Nta kilakee ni kwakwe uukye-fo, ni kwa vakuu valya va mbee. Nalyo mukava veerina nndu naakwa ni elyi lya nkonu wa Sabato.

²³Naasa kwankooya nndu ashewonisaa irinwa elyi lya Sabato, na uvavaso lwa Mose lulakooye ifuluwa, a ni inda mwashitirya unyafi elyi shileallwa nndu moose kava nsha nkonu wa Sabato?

²⁴Nta mularummbwe mwaandu kya ilola fisangu. Rummbweny kya usumanu.”

²⁵Naasa vandu va kulya Yerusalemu veefo valya maata vakaamba, “Akwa: Nshi we yeto vansia vammbwae?

²⁶Nawe akakau aifo areraa paa, valammbie nta kindo. Kulakooye vandu yewo va nrwe ni dede valekooya imanya yeu mmbwe Kristo ndesa?

²⁷Kya indi nndu yeu lumwiishi kundo aukye, lyo kyeeri Kristo asheshaa nkushekaa-fo nndu amanyaa kundo ooka nafo-fo.”

²⁸Naasa Yesu kaonisa unyanga eeloshaa efo mmba ya Iruva kaamba, “Ee-da na muveshiishi na kundo shuukye nafo muveishi-da. Neeny nta nshisheye kikee kya shila yakwa shimuni-fo. Mmbo kwiifo wa dede aleshiruma, nawe nta mulamwiishi yeni.

²⁹Yeny mmbo shimwiishi kimmba ni efo kwakwe shyuukye. Nawe mmbwe ashirummyi.”

³⁰Naasa vakava vasiaany mwaanya weentira, nta kulakae-fo nndu amooroya woko; mashika kyeeri kyakwe nkyemfika-fo.

³¹Naasa efo mamwiinginy wa vandu veengyi vakauta-u ikusirya nawe. Vakaamba, “Kyeeri Kristo asheshaa mmbo asheengeraa itana fya ngyende fiingyi ngota efyo nndu yeu aletana?”

³²Naasa Vafarisayo vakaita ironda lilya lya vandu lyiikunung'unaa indo kyakwe, nalyo vakohani valya vaniini vakasanga na Vafarisayo, vakaruma vasoro va efo poo vandentira.

³³Naasa Yesu kaamba, “Ni ando a kyeeri kidu nsindi neeni, shekweenngyeny kwa yeto aleshiruma.

³⁴Llyo musheshisiaa mulasheshikooyaa, na kundo nshekaa mulashiidimaa ifika-fo.”

³⁵Naasa Vayuda vakarera wo veni na veni, “A nndu yeto nkwi afikaa neese lute lulankooya-se? A mmbo afikaa kulya kwa valya vanyanyakye masangeny a Vagriki, nandeloshya-fo Vagriki yewo?

³⁶A kikeeny inda elyi arera indo kaamba, musheshisiaa mulasheshikooyaa na kundo nkaa yeni mulashiidimaa ifika-u yeni?”

³⁷Naasa elyi kwamfika nkonu yeto nniini weemarisya, nato ukee nniini kitoro ya ingyi, nalyo Yesu kashesalala-u kaonisa unyanga kaamba, “Kwakooya nndu aakuka nakusheye na kwakwa nashe ina!

³⁸Nndu akusirye neeny, kyakwe mmbo kivaa shaasa kikee kireiye kyeamba, ‘Nndu yeto efo nyaminy takwe kusherukaa-fo ngyusoka ta mura wa muu!’ ”

³⁹Na elyi arera indo, ni mbony ta Mumuyo Mweele, mmbue vandu vakusirye nawe vakaa vambwarye, mashika kyeeri kilya Mumuyo Mweele nalandeshe-fo, neelyi Yesu nalandeanga neefo itumbeny lyakwe.

⁴⁰Naasa efo mamwiinginy ulya wa vandu kukakaa-fo vandu vaita arera indo, vakaamba, “Yeu ni dede mmbwe nkisuku ulya akee nteerye nashe.

⁴¹Vengyi vakaamba, mmbwe Kristo. Vengyi vakaamba, A mmbo Kristo asheshaa nauke kulya Galilaya?

⁴²A nshi kikee kireiye kyeamba, Kristo asheshaa aukye efo ukuuny lwa Davidi na efo Betilehemu efo muriny wa Davidi.”

⁴³Naasa mamwiingyi ulya wa vandu ukakumanya kavii kimaruma kyakwe.

⁴⁴Kukavekaa-fo na vaangu vakunndye intira, indi nndu alleesya woko nalawonike.

⁴⁵Naasa vasoro valya va efo poo vakawuya na kulya kwa vakohani vaniini na vafarisayo. Nawo vakavavia, “A nkiki kyaima mulamweende?”

⁴⁶Vasoro valya va efo poo vakaallwa, “Mmbo kulandewonike nndu arera shaasa nndu yeu arera-fo.”

⁴⁷Vafarisayo vakaallwa, “A mmbo neeni mwallembika?

⁴⁸A mmbo kwiifo nndu wa nrwe naakwa ni umwi tupu akusirye nawe, ao wa efo kwa Vafarisayo?

⁴⁹Lyo mburwa yei ya vandu ilaishi uvavaso mmbo vadenge.”

⁵⁰Nikodemu karera ulya emweengya kio, nawe ni wa efo nnang'ani yaawo, kaamba,

⁵¹“A mavavaso a kikweru mmbo autye nndu uvingo kulaore amaarannywa mbele mbony tauka kwakwe kamanyika kindo aletana?”

⁵²Nawo vakaallwa vakammbia, “A mmbo neewe kuukye kulya Galilaya? Soma mbony ntere kumanyi, Kulya Galilaya nkushekwiipoo-fo nndu nkisuku-fo.” [

⁵³Vakawara shia wo nndu kaenda kyeny kwakwe.