Read Mashami New Testament 1 Yohane 5 Bible Online

1 Yohane 5 - Mashami New Testament bible

1 Yohane 5

¹Wo nndu airikye sheelyi Yesu ni Kristo mmbo awonikye kyuuka na Iruva. Na wo nndu akundye Nde, mmbo akundaa na yeto aleirwa mmbwe.

²Kimmba ni indo mmbo lukundye vana va Iruva, elyi lukundye Iruva, na ilatya mavavaso akwe.

³Mashika elyi llyo ikunda Iruva, ni ilatya mavavaso akwe, na mavavaso akwe nta nshi maroo-fo.

⁴Mashika wo kindo kyikee kyiire ni Iruva mmbo kivingaa ulana yelu, na elu llo uvingi lwa ivinga ulana, ni kikusiryo ekyo kyeru.

⁵A mwiivinga ulana mmbwe ungau, kulaore ni yeto akusirye sheelyi Yesu ni Mwana wa Iruva?

⁶Yeu mmbwe alesha na mura na samu, Yesu Kristo, nshi alesha na mura da-fo, mmbo alesha na mura na samu da.

⁷Na Mumuyo mmbwe avikau ukureekyi, mashika Mumuyo yeto ni dede,

⁸Shamashika vaiyo vararu vakee ikureeka-u [iruveeu, ni Nde, na Irero na Mumuyo Mweele, na yeva vararu mmbo vakee vamwi.

⁹Kukavekaa-fo vararu-se vakakureeka yaa ulaniny], ni Mumuyo, na mura na samu; na eva vararu mmbo vairikyani kya mbony imwi. Kwakooya lwawarya ukureekyi lwa vandu, ukureekyi lwa Iruva ni uniini mmwasi; mashika ukureekyi lwa Iruva llo elu, llya alekureekya Mwana wakwe.

¹⁰Yeto akusirye na Mwana wa Iruva mmbo atiri ukureekyi elo nnang'ani yakwe. Yeto nalairikye Iruva mmbo amwaallwa mwoongo, mashika elyi ara nalairikya ukureekyi elo Iruva alekureekya Mwana wakwe.

¹¹Na ukureekyi weni le, llo elu, ni Iruva aluniinga muu wa llung'ani, na muu yeu mmbo ukee efo nnang'ani ya Mwana yeto wakwe.

¹²Yeto atiri Mwana wa Iruva mmbo atiri muu, yeto nalatiri Mwana wa Iruva nnyatiri muu-fo.

¹³Mmbo shamureiya findo efi naambo mumanyi na yeni mmbo mutiri muu wa llung'anu, yeni mukusirye na Irina lya Mwana wa Iruva.

¹⁴Na elu llo ukaari lutiri efo kwakwe, kya yaamba, kwakooya lwatereva kindo kiinani na shaasa akundye we, mmbo ashelwaaranyaa.

¹⁵Na lukammanya alwaaranyaa, ekyo kyoose lwatereva mmbo lwiishi sheelyi lutiri findo filutinnyi lukantereva.

¹⁶Kwakooya nndu alollya mwanamaye etanaa ulyamari lulakee yeende ufu, natereve, na Iruva asheningaa muu yewo vatana ulyamari lulakee yeende ufu. Kwiifo ulyamari lusheende ufu. Nshaleamba natereve kimaruma kya elo-fo.

¹⁷Wo kindo kilakee kya usumanu ni ulyamari, na ulyamari lwiifo lulashendee ufu.

¹⁸Lwiishi sheelyi wo nndu yeto akee mwiire ni Iruva nnyatanaa ulyamari-fo; mashika awonikye kyuuka na Iruva mmbo akwiisaa, nta yeto nravi nnyampaanaa-fo.

¹⁹Mmbo lwiishi sheelyi yese mmbo lukee va Iruva, na ulana loose lo lukakaa kwa nravi yeto.

²⁰Lukavemanya sheelyi Mwana wa Iruva alemmaa isha, kaveluniinga na wiidimi lwemanya yeto akee wa dede, neeseny mmbo lukee nnang'ani ya yeto akee wa dede, mmbwe Mwana yeto wakwe we Yesu Kristo. Yeu mmbwe Iruva wa dede, na muu wa llung'anu.

²¹Vana vakwa vadu, kwiiseny na maruva a wongo.