Read Mashami New Testament 2 Yohane 1 Bible Online

2 Yohane 1 - Mashami New Testament bible

2 Yohane 1

¹Yeny mmiku, shareiya kwa mama na vana vakwe shivakunndye dede deny; nta nshi yeny shimuni-da-fo, kyaindi ni ando amwi na yewo woose vaishi dede yeyo;

²kyeendwa ni dede yeyo ikee nnang'ani yeeru, nayo mmbo ishekaa neese fika llung'anu.

³Isarya na ilyillyo, na unapwe, fyuukye efo kwa Iruva Nde na kwa Yesu Kristo Mwana yeto wa Nde, fikae neese lukee na dede na ukundi.

⁴Mmbo shilefura nnu llya shilelollya vana vafo maata vakeenda na dede, kiinani na shaasa lulewarya ivavaso lyuuka kwa Nde.

⁵Kyasia ulaalu, yewe mama, mmbo shakutereva, nta nshi ivavaso iiya shakureiya-fo, ni lyilya lwetiri uka mapookyony lyeyaamba, lukundani.

⁶Na elu llo ukundi: Lweende lwisoraa mavavaso akwe. Na elyi llyo ivavaso elyo, shaasa muleita uka mbee naambo mulyilatye.

⁷Mashika ni vandu veengyi velembaa valensha-fo kunu ulaniny, valashiirikyaa sheelyi Yesu Kristo mmbo akeesha ekee na mwiili. Yeto mmbwe llembi na mwilema Kristo.

⁸Kwiiseny muveni mulashereta filya muletana, naambo mukooye iwarya isina lyisumani.

⁹Yeto ailanya kyeeso nalasoraa ufundo lwa Kristo, we nnyatiri Iruva nnang'ani yakwe-fo. Lyo yeto akaa nnang'ani ya ufundo yelo, yeto mmbo atiri Nde na Mwana kiwo.

¹⁰Kwakooya nndu asha kwany nalarye ufundo yelo, mulashemwaambya kyeny kwany-fo, nta imwiidikira-fo.

¹¹Shamashika yeto amwiidikiraa mmbo aakana na mashora akwe maravi.

¹²Kimmba shitiri mbony shiingyi, na yeny shilakundye itireiya na kalamu yaa karatasiny, mmbo shivikye nsia wa isha kwany nsherera neeni kana kwa kana, naambo na ifura lyeru lyikooye iinutywa.

¹³Vana va mwanamau akee nsauwe, vakwiidikira.