Read Mayangna Génesis 12 Bible Online

Génesis 12 - Mayangna bible

Génesis 12

¹Mani as kat Dawan yaklauwi Abram yakat kalyulna: “Sauma kidika datah, wanaihma balna, dawak papangma ūni data yawah bahang yang sau as namangkaki.

²Man sulama balna karak nisan nuhni as yamkiki, dawak blisin maki, ayangma nuhni mayamki, bahang man laih blisin as awama muih ūk balna nining yakat.

³Wais man yak yamni mayamwarang kidika yang lawik witing yak blisin kalaki; dawak wais man yak dutni mayulwarang kidika, yang lawik witing yak la kaltuhki; dawak man munah muih balna bitik blisin diaki.”

⁴Abram kalahwi kiuna Harán kaupak, Dawan yaklauwi pakna dai kaput. Bahang witing kalahna kidika Canaán yakat kiuna atnin witing uman kurih 75 duwadai.

⁵Witing yalni Sarai kidika duwi kiuna, dawak āniwalas Lot bik duwi kiuna, di duwa balna bitik dawak Harán yakat witing muih duna dai kidika dini yamna atnin, kidika dini yamna, kidika balna bitik duwi kiuna. Dawak Canaán yakat uiwi kakana kat,

⁶Abram witing, kidika sauni kidika bitik yakat bayakna dawak Siquem kat kiuna, kidika yakat More kirahni panan holi kulna sakkidika. Kaput laih Cananeo balna kidika, kidik sauni yakat yalalahwa dai.

⁷Kidika yakat Dawan laih kalahwi kalyulna: “Adika sauni man sulama balna yak diaki.” Kaput laih sakripais busnin pāni as yamna Dawan risnipik kau, kat kidika pāni yakat laih kalahna dai bahang.

⁸Usnit kat Betel tawanni nuhni kaupak ma kilwa niningkauh asangpas yakat kiuna, dawak kidika yakat ūni labanni pakna. Witing ūni labanni pakna kidika kaupak ma kawa niningyakat pakdai Betel kidika, dawak Hai tawanni nuhni laih ma kilwa niningyak pakdai. Kidika pāni yakat Abram witing sakripais yamnin pāni as yamna.

⁹Usnit kat tani tani laih Néguev sauni nining yakat kiuna,

¹⁰Kidika mani, balna yuhlakna dai, kidika sauni yakat dai, dawak Abram Egipto yak kiuna dai ma as kidika yakat yalahna atnin, kat witing yalahwa pāni yakat kasnin dini balna kidika dis kalna dai bahang.

¹¹Mahka Egipto yakat uiwi kakawakat, Abram witing yalni Sarai kat kalyulna: “Talah, yang yamni amanglatayang, man kidika yal as nuhni yamni man,

¹²bahang Egipto muihni balna matatalwarang kat, witingna yuyulwarang: ‘Adika yalni laih kidika alni kidika yalni.’ Kaput laih yang akat yaihiwarang, dawak man laih sangka madadawarang madunin yulni.

¹³Kaput bahang, yang yamni atnik dawak yaīwas atnin man yulma, bahang diyulma man laih yang wirahki man.”

¹⁴Dawak Abram Egipto yak kiwi kana kat, Egipto muihni balna tatalna Sarai kidika yal as nuhni yaksinh dai.

¹⁵Dawak fero, Egipto kingni ahalni balna bik tatalna, dawak uiwi kalyuyulna kidika yalni laih nuhni yamni yaksihni ki. Kaput laih fero ūni yakat duwi uina.

¹⁶Sarai yulni fero yaklauwi Abram yak yamni palni prisant kalana dai, sīp turuh yayal, dini yamyang ahal, yayal, biriku dawak kiamil.

¹⁷Kaunah kaput bik Sarai yulni Dawan yaklauwi fero yak wah kalana, dawak fero wanaihni balna yak bik wah nuhni diana.

¹⁸Kaput dawak fero yaklauwi Abram yakat yulwak kiwak kalyulna: “¿Ais adika kaput yayamna manh? ¿Dawak ais yamta yayultasman daih, adika yal laih man yalma?

¹⁹Man yayulna man adika yal laih man wirahma yal, bahang yang sip yang dai yalki dunik. Aduh akat sakki. ¡Duta mahka yawah!”

²⁰Dawak fero yaklauwi ahalni balna yak diyulna, Abram kidika Egipto sauni kaupak mahka yakpamna atnin, yalni karak, dawak di duna balna dai kidika bitik bik.