Read Mayangna Génesis 13 Bible Online

Génesis 13 - Mayangna bible

Génesis 13

¹Abram witing Egipto kaupak kalahwi kiuna kat, yalni, di balna ais duwa balna dai kidika bitik, duwi kiuna, bahang witing Néguev sauni yak nawatwi kiuna, aniwalas Lot bik kiuna dai witing karak.

²Abram laih witing di duyang dai, gol duwadai, lalah duwadai, dawak tinglau bik mahni duwadai.

³Néguev kaupak tani nawatwi kiuna Betel tawanni kat kiwi kana, kidika kaupak witing nawatwi kiuna muhnilau Betel dawi Hai kidika walsah kau ūni labanni pakna dai yakat.

⁴Kidika pāni yak dai kuduh, muhnilau sakripais busnin pāni as yamna dai kidika Dawan yakat minit yulnin yulni.

⁵Lot bik di duyang dai, witing papani karak kapat dai, sīp, turuh yayal dawak witing karak muih balna bang kidika bik mahni dai;

⁶kaunah witing sakkidika pāni kidik aitani awasdai, tinglau mahni kidika kasninna dianin. Witingna baisa sip-awas dai ban albu yalahninna.

⁷Kat Abram tingnilau maintalyang muihni balna kidika dawak Lot tingnilau maintalyang muihni balna karak kalbabauwa dai. Dawak bik kidika mani balna yak cananeo muihni balna, ferezeo balna kidika yakat yalahwa dai.

⁸Dawak kaput bahang ma as kat Abram yaklauwi kalyulna Lot yak: “Man yang karak kalwanaih mayang, kidika bahang yamni awaski mapasking yakat kalbilnin lani kidika sakkarang kat, dawak bik yang tingkilau maintalyang muihni balna dawi man tingmalau maintalyang muihni balna pasyak bik kalbilnin kidika sakkarang kat.

⁹Yakat sau bitik kidika sakki, man walyakta dutah. Plisma yang kaupak naikau dakta alahwah. Man tingpal nining yakat yawama kat, yang wadah nining yakat yawaki; kidika awaskat man wadah nining yakat yawama kat, yang tingpal nining yakat yawaki.”

¹⁰Lot witing bitik lakwi talna sau langni balna kidika Jordán wasni kung balna kidika bahang witing talna Zoar tawannibin kat, bahang kidika sauni langni laih was manas duwa dai, dawak bik dipulu dahna sauni as[19], kapat dai. (Dawan yaklau Sodoma dawak Gomorra balna kidika dismukwas tanit kau dai yakat, pāni kidika sihm kapat dai.)

¹¹Dawak Lot witing Jordán wasni kung langni dai kidika bitik duna, dawak, masar nining yak witing kiuna, sakdai yakaupak kalahwi. Kaput laih Abram dawi Lot karak kaldakwi kalalahna.

¹²Dawak Abram witing bik Canaán sauni yak kiwi yalahna, dawak Lot laih sau langni kau tawan nunuhni balna yaihnitna yakat kiwi yalahna, Sodoma tawanni nuhni yaihnit yakat,

¹³kidika pāni muihni balna bitik laih dudutni palni dai, Dawan yakat di dutni yamyang palni dai.

¹⁴Lot mahka kalahwi kiuna usnit yak, Dawan yaklauwi Abram yakat kalyulna: “Sakman pāni kidika kaupak, tingpal niningyak yamni talah, dawak wadah nining yak, makilwa nining yak dawak ma kawa nining yak talah;

¹⁵yang lawik adika sauni talaman kidika bitik man yak māki ban kaput atnin dawak sulama balna dinina bik karang.

¹⁶Yang lawik yamting kat witingna kidika mahni palni sau yahamni balna kaput kakalna karang; sau yahamni kulnin sip-awas kapat, man sulama balna bik sip-awas karang kulnin.

¹⁷¡Lawah, dawak adika sauni pāni naini, dawak pirihta panuhni kidika īra awaihta talah, kat yang lawik manyak maki bahang!”

¹⁸Kaput Abram witing uni labanni dutwi duwi kiuna kirah asangnipas yakat al as ayangni Mamre yaihnityak, kaput bik Hebrón tawanni nuhni yaihnit yak. Kidika yakat sakripais busnin pāni as yamna Dawan risnipik kau.