Read Mayangna Génesis 18 Bible Online

Génesis 18 - Mayangna bible

Génesis 18

¹Dawan Abraham yakat lāih kalahna, Mamre kau kirah asangnipas yakat, Abraham kidika witing yalahna sakdai, ūni labanni dūrnikung yakat, bahang kidika laih matunak kapatdai.

²Abraham witing muhdawi talwak ahal bās yaklauna rau kat talna witing muhni yak. Witing talwi sirihni palni yaklauwi diduna dawak muhni kidika sau kat lakwi kat bukwi

³aput yulna: —Yang papangki kalma dinit yakat buktik yultayang, mahka kiwinih.

⁴Man yamni talaman kat, yang was apis yulting duaiwi manawak kalmana suhtanama, usnit kat pan dinit sanniyak urupdanama.

⁵Kat uman manna dimana yamyang pāni munah aiwa bayaktamana bahang yang di apis duaitik manating kasta parasmana dutanama, baisa yawasmana tanit kauh. —Yamniki kalatwadai —witingna yaklauwi.

⁶Abraham witing uni labanni yakat kawi kiwi Sara yak kalyulna: —¡Sirihni! Plawar tanit yamni kidika paun 40 duta laihta bustah.

⁷Usnit kat Abraham witing kiri kiuna tinglau balna bangyakat, turuh wahmabin tanit yamni kidika laihwi dukiwi, witing dini yamyang as kau kalana, bahang mahka laih ridi yamna dai, di kasnin kidika.

⁸Turuh muihni diana minit yakat baisa, tāwas dawak turuhtawas yaklakna bik diana dai, dawak witingna di kaswabangkat pan dinityakat, witing laih kidika balna yakat manah tapayu sakdai ais yuyulwak yamna atnin

⁹Dikaswi dahn dawi, kaltalna uina muihni balna kidika Abraham yak kalyulwi dakakana: —¿Man yalma Sara kidika angkat sak yah? Dawak witing biri nangnitnalana: —Ū labanni yakat sakki.

¹⁰Kaput laih witingna pas kaupak as yaklauwi kalyulna: —Kurih ūk kaiwa yakat yang wattik aiwik matalki, dawak kidika yakat man yalma Sara laih walanbis al as duwakarang. Dawak Sara laih Abraham dangnit yakat witingna yulbabauwa kidika bitik dakawa sakdai, ū labanni dūrni kungyakat.

¹¹Abraham dawak Sara kidika laih witing muihbararak dai, dawak laih witing wainiku sikninis bik talwasdana dai.

¹²Kidika bahang Sara witing karinin kidika sip laihwatwas dai, dawak kulna: “¿Amput kidika auhni dakakiyah, waradika yang alki dawak yang bik muihbarak palni kalnayangna adika?”

¹³Kaunah Dawan yaklauwi Abraham yakat kalyulna: —¿Ais yamwi Sara kidika kārih? ¿Witing rahm walanibis as duwas karang kulwih, kaput muih barak kalnakarang bik?

¹⁴¿Di as yamnin sip-awas kidika sakkatapah Dawan niningyakat? Kurih as yakat aiwik matalki, bahang kidika yakat Sara walanbis as duwakarang.

¹⁵Kidika dakawi Sara yamaduwi witing malnin kulna. Bahang witing aput yulna: —Yang ārasyang dai. Kaunah Dawan biriwi nangnitlana: —Yang amanglatayang man aranaman.

¹⁶Usnit kat uiwi kaltatalwa ahalni balna kidika yaklauwi Sodoma niningyak uina. Bahang Abraham laih witing miniknadawi kiuna mahka diparaswak uina atnin.

¹⁷Kaput laih Dawan aput kulna: “Yang ais yamnik kidika Abraham yakat kalyulnik ki,

¹⁸kat witing laih nisan as nuhni dawak bik parasni karang kidika papangni kalahwarang bahang. Witing yakat pramis yamnayang, witing munah blisin diana atnik sau akat nisan balna bitik yakat.

¹⁹Yang lawik walyaktik dunayang walanbis balna dawak sulanina balna bitik kau dipakwak sumalnayang balna yakat dakana atnin, dawak di barangni balna, yamni balna bitik kidika yama atninna, kaput laih yang yamki kalatnayang balna kidika bitik yamki.”

²⁰Kaput laih Dawan yaklauwi kalyulna: —Sodoma dawak Gomorra muihni balna laih ayangnina dutni palniki, dawak dutnina balna bik dutni palni ki,

²¹bahang waradika kidika niningyak yawayang, talna atnik rahm witingna dutnina nuhni palni pa, yuyulwa. Kaput laih yang amanglaki.

²²Ahal bu kidika mahka uina Sodoma yakat, kaunah Abraham laih baisa Dawan muhni yak yaklauna sak dai.

²³Dawak baisa apis yaihnit yak kiwi kalyulwi dakana: —¿Dutni yayamwas balna kidika, dawak dutni yayamwa balna karak bahata dismukmayah?

²⁴Sipkat muih 50 bangki tawan nuhni yakat dutni yayamwas balna kidika. Kaput karang bik, ¿tawan nuhni kidika dispammayah, dawak muih 50 dutni yayamwas balna yulnina, tawan nuhni dutni datang diswas karangyah?

²⁵¡Sip awas ki man kidika yamnam, muih dutni yayamwas balna kidika dutni yamyang balna karak ita disnam, witingna bupak dutni yayamna kapat! Man kidika Wihta nuhniman sau bitik yakat, ¿la kat yamtas awamayah?

²⁶Kaput laih Dawan yaklauwi nangnitlana: —Sodoma tawanni yakat muih dutni yayamwas balna kidika 50 yakki kat, witingna yulnina, kidika yakat yalalahwa balna bitik dutnina dating diswarang.

²⁷Kaunah Abraham yaklauwi watwi kalyulna: —Dutki datang diswang yang aput mayultayang kidika yulni, kat man laih Papangman dawak yang laih dauh muih al as yang;

²⁸kaunah baisa muih dutni yayamwas balna kidika singka diskarang kat, 50 laihnin. ¿Baisa singka dis kidika yulni manah tawanni nuhni kidika bitik daukalta dispammayah? Dawak Dawan biriwi nangnitlana: —Muih dutni yayamwas balna kidika 45 yakki kat daukaltik distas awaki.

²⁹Abraham baisa watwi yulwi dakana: —¿Kaunah 40 manah bang karang kat? Dawan biri kalyulna: —40 bangkidika yulnina dismuktas awaki.

³⁰Kaunah Abraham watwi kalni dinityakat bukwi yulwi dakana: —Man kulnam daukalwinih yang wattik kalma dinityakat buktik yultik dakayang kidika sihm kidika dini manah, bahang 30 manah yakma kat... Dawak Dawan yaklauwi watwi nangnitlana: —Kidika 30 yulnina tawan nuhni kidika dutni dating diswarang.

³¹Abraham watwi yulwi dakana: —Yang Dakiwan, yamadutas kapat aput wat wat mayultayang, kaunah, ¿ais kalahwarang dutni yayamwas balna kidika 20 manah yakma kat? Dawak Dawan yaklauwi nangnitlana: —Kidika 20 balna yulnina, tawan nuhni kidika dispamtas awaki.

³²Abraham baisa watwi yulwi dakana: —Plisma Dakiwan, yang karak kulnam daukalwinih, waradika manah mayultik dakakiki, dawak watlaih maustas awaki: ¿ais yammayah, 10 manah yakma kat? Dawak Dawan yaklauwi kalyulna: —Salap manah yulnina bik dispamtas awaki tawan nuhni kidika.

³³Dawan Abraham karak yulbauwi dana usnitkat mahka kiunadai, kidika pāni kaupak; dawak Abraham laih ūni labanni yakat nawatwi kiuna.