Read Mayangna Génesis 2 Bible Online

Génesis 2 - Mayangna bible

Génesis 2

¹Kisang, sau dawak kidika pasyak di balna bangkidika bitik laih yamwi dana dai.

²Ma tiaskaubu yakat, Papang di balna kidika bitik yamwidana dawak urupna.

³Bahang ma tiaskaubu kidika Papang yaklauwi blisyamna, dawak kidika mani laih holi kulna, kat kidika mani witing urupdana di balna bitik yamna usnit kat.

⁴Adika kuduh kisang dawak sau yamna yulni balna kidika. Papang witing Dawan kidika, sau balna kidika yamna kat,

⁵baisa dibasta, dawak pan balna kidika ukuswasdai, kat Papang witing Dawan kidika yaklauwi sau minit yakat kalawak was lauwasdai bahang, dawak bik muih as bik disdai wark yamna atnin.

⁶Kaput kaunah, sau kaupak was kalahwi pāni kidika bitik suihwadai.

⁷Bahang Papang witing Dawan kidika yaklauwi muih al[4] kidika yamna sau kaupak, dawak nangnitak yak puhwi sangnika kalana. Kaput laih muih al kidika sangnika duna sau akat.

⁸Kidika usnit kat, Papang witing Dawan kidika yaklauwi Edén sauni pīsni yakat pa yamni as yamna dai, dipulu satni balna dahna dai, kidika laih makilwa niningyakat dai, dawak kidika yakat muih al yamna dai kidika āsakna.

⁹Kidika yakat Papang yaklauwi pan yayamni mahni kalawak ukusna, dawak minik balna bik yayakna, bahang kasnin yayamni dai. Dawak kidika pāni papus yakat sangka atnin panan bik dahna dai, kidika panan laih dutni dawak yamni karak tanka amanglanin panan dai.

¹⁰Edén sauni kaupak was as kalahwadai, bahang kidika wasni laih kalawak Papang pa yamni yamna yakat suihwadai, bahang kidika wasni laih arungka rarahwi kalahna.

¹¹Bahang rarahwi kalahna tatuna kidika ayangni laih Pisón pakna dai; bahang kidika kuduh Havila sauni pīsni bitik yakat awaihwi bayakna kidika, kaput bik kidika pāni laih gol manas duwi.

¹²Kidika pāni yakat gol duwa kidika laih yamni palni ki, dawak pan yāni walapni yamni balna duwi, dawak ónice kinipala bik duwi.

¹³Was rarahwi kalahna bu kidika ayangni laih Gihón, kidika kuduh Cus sauni bitik yakat awaihwi yaklana kidika.

¹⁴Was sahyakna bās kidika ayangni laih Tigris, bahang kidika wasni kuduh, Asiria sauni masar munah awaihwi bayakna kidika. Dawak sahyakna arungka kidika ayangni laih Éufrates.

¹⁵Papang witing Dawan kidika yaklauwi muih al kidika Edén sauni kau pa yamni yamna yakat āsakna dai, witing kidika yakat di dahna atnin dawak bik maintalna atnin yulni,

¹⁶dawak kaput laih adika yulni kalyulna: “Adika pāni akat pan balna bang-adika bitik minik balna kidika sipman kasnam,

¹⁷kaunah aslah laih sip-awasman kasnam, pan yamni dawak dutni karak kidika. Kidika panan minik laih kaswinih, kasma karang kat rahm palni laih dauma.”

¹⁸Kidika usnit kat Papang witing Dawan kidika yaklau yulna: “Yamni awaski muih al adika alas sak-atnin. Bahang witing wanaihni yamni as yamtik kalaki.”

¹⁹Papang witing Dawan kidika yaklauwi sau kaupak di minikratni balna, tinglau balna, lawani duwa balna bitik yamwi muih al yakat duwi kiuna, witing yaklauwi ayangnina pakna atnin yulni. Dawak al kidika yaklauwi tinglau balna bitik dawakat lawani duduwa balna kidika bitik, dawak di minikratni balna bitik ayangnina pakna, bahang kaput laih ayangnina kidika duduna. Kaput kaunah kidika balna bitik laih witing yakat minikdanin yamni awasdai.

²¹Bahang Papang witing Dawan kidika yaklauwi muih al yakat kalawak yamni kamana dawak suluni yakat kurahwi wakalni as yakwi dawi, watwi muihni kidika libitwi yamni pāni kat āna dai.

²²Kidika suluni wakalni kaupak Papang witing Dawan kidika yaklau yal yamna dai, dawak muih al yakat duwi kiuna,

²³bahang muih al kidika talwi yulna: “¡Adika laih yang wakalki kaupak kalahna dawak muihki kaupak kalahna! Bahang ayangni laih ‘yal’ karang, kat Papang yaklauwi muih al kaupak yakna bahang.”[5]

²⁴Kidika bahang muih al kidika papangni, nanangni dawi kalahwi kiwi yalni karak aslah kalalahwarang, bahang kaput laih witingna kidika muih aslah kaput kalalahna karang.

²⁵Muih al kidika dawak yal kidika bik, albupak witingna wahdis raudai, kaunah witingna wahdis rau kidika yakasasaldas dai.