Read Mayangna Génesis 22 Bible Online

Génesis 22 - Mayangna bible

Génesis 22

¹Ma as as bayakwakat, Papang yaklauwi Abraham kasak kulnin lani duwa kidika laihwi talna. Bahang witing ayangni kau yakwi kalyulna, dawak, witing yaklauwi nangnitlana: —Akat sakyang.

²Dawak Papang yaklauwi kalyulna: —Man walanbis al aslah Isaac kidika dutah, man dalani talaman kidika, dawak Moriah sauni yakat yawah. Man kidika yakat yawa karauni kauna sakripais bustah, yang lawik namangkaki asangni tuna yakat.

³Kidika payahwak, Abraham witing mapiris yaklauwi biriniku dangni ilna; dawak sakripais yamnin kuhni dakwi dawi kiuna Papang yaklauwi kalyulna pāni dai yakat, bahang walanibis Isaac karak uina dai, kaput bik laih dini yamyang bu duwi kiuna.

⁴Ma bās laihwak, Abraham witing naikaupak talna dai Papang yaklauwi kalyulna pāni kidika.

⁵Dawak dini yamyang balna yakat diyulna: —Manna laih akat wattanauh biriku balna karak. Yang dawak muihbin al adika karak manah baisa takitna yakat yawanaki, dawak Papang yakat mikitna yultik datik, wattik nawattik aiwanaki.

⁶Kaput laih Abraham witing karauni kauna sakripais busnin kuhni kidika duwi Isaac salahni yakat ilwi; usnit kat kuhbil dawak kuhpau duna, dawak albu uina.

⁷Kidika usnitkat Isaac yaklauwi Abraham yak kalyulna: —¡Papang! —¿Ais dukih mawih walakbis al? —Abraham yaklauwi kalyulna. Isaac yaklauwi kalyulna: —Talah, mayang kuh sahna dawak kuhpau bik dudi, kaunah ¿angkat sak yah sakripais karauni kauna busnin sīpnibin kidika?

⁸—Papang yaklauwi yakwi mayawarang karauni kauna busnin sakripaisni kidika, yang walakibis bin —papangni yaklauwi kaput kalyulna. Dawak witingna albu ban lapakwi uina.

⁹Papang yaklauwi diyulna pāni yakat uiwi kakawakat, Abraham witing sakripais busnin pāni as yamna dawak kuh sahna bik mahka minit yakat ilna, usnitkat witing walanibis yakat sitna, dawak sakripais busnin pāni yakat ilna, kuh minit yakat;

¹⁰kaunah kidika minitni yak kuhbil walanibis witing walanibis kidika sakripais busnin yamwak,

¹¹Dawan innisal kidika makau kisang kaupak kalyulna: —¡Abraham, Abraham! Abraham yaklauwi biri nangnitlana: —Akat sakyang.

¹²Insal yaklauwi kalyulna: —Muihbin al yakat dutni as bik kalyamwinih, kat amanglatayang man Papang yamanidutaman, kat walambis aslah kidika yanin yultas-awasman dai.

¹³Abraham witing yamni talwak sīp almuk as tamni balna kidika damasni yakat diwitna sakdai; kaput laih witing kiwi sīpni almuk kidika duwi sakripais karauni kauna buswa kidika yamna dai, witing walanibis busnin dai pāni yakat.

¹⁴Adika usnit kat Abraham yaklauwi adika pāni ayangni pakna: “Dawan yaklauwi dukih dini kidika yuwi.” Kidika bahang warmani kat bik baisa aput yulwi: “Asang yakat dukih dini kidika Dawan yaklauwi yuwi.”

¹⁵Dawan innisal kidika makau kisang kaupak watwi kalyulna Abraham yakat,

¹⁶bahang aput yulna: —Dawan yaklauwi aput yulna: ‘Man adika yamnaman bahang, walambis al aslah kidika yang kau yanin yultas-awasman dai bahang, yang alas ayangki kau yaktik yultayang

¹⁷blisin mahni māki. Yamting kat man sulama balna kidika makau kisang yala balna mahni kapat karang, dawak bik kuma kungkau kauhnimak balna mahni kapat bik karang. Baisa minit yakat, witingna yaklauwi waihninala balna yakat tataihwa kidika laih ban kaput karang,

¹⁸nisan balna bitik sau akat bangkidika blisin duduna karang witingna munah, kat yang yulki daka yamnaman bahang.’

¹⁹Dawak Abraham wat nawatwi kiuna dini yamyang balna wawatna pāni yakat. Usnitkat witingna bitik kalpakwi Beerseba yakat uina, kidika yakat Abraham watwi yalahna dai.

²⁰Ma as as bayakwakat, Abraham yul dakana, Milca bik walanbis ahal kalana Nacor yak. Nacor kidika laih Abraham wirahni al dai.

²¹Tatuna batahnna kidika laih Uz dai; usnit batahnna kidika laih witing wirahni Buz, kidika kaupak batahnna Kemuel, bahang witing laih Aram papangni dai.

²²Kidika usnityak batahnna kidika laih Quesed, Hazo, Pildas, Jidlaf dawak Betuel.

²³Dawak Betuel lāih Rebeca papangni dai. Adika walanbis ahal tiaskaubās adika Milca yaklauwi Nacor yakat kalana dai, Abraham wirahni yakat.

²⁴Baisa minit yakat Nacor laih walanibis yakna dai Reúma kaupak walaninabis yayakna, kidika laih witing ialni kaupak. Bahang kidika balna laih adika ki: Teba, Gaham, Tahas dawa Maaca.