Read Mayangna Génesis 25 Bible Online

Génesis 25 - Mayangna bible

Génesis 25

¹Abraham yal ūk duna, ayangni laih Cetura.

²Witing kidika yal karak walanbis ahal yakna dai Zimram, Jocsán, Medán, Madián, Isbac dawak Súa.

³Jocsán kidika laih Seba dawak Dedán papangni dai. Dedán sulani balna kuduh asureo, letuseo dawak leumeo.

⁴Madián walanbis balna dai kuduh Efa, Efer, Hanoc, Abida dawak Elda. Adika balna bitik laih Cetura sulani balna dai.

⁵Abraham ais duwa dai kidika bitik laih Isaac duna dai.

⁶Walanbis balna yal ūk kaupak yakna kidika yakat laih, prisant dini manah diana dai, bahang baisa sangka kau walanbis Isaac kidika dakwi yakwi ma kilwa niningyakauh sihna dai.

⁷Abraham sangka dai kurih 175,

⁸dawak witing dauna, muih barak kalwi. Kaput laih witing muihnibararak balna karak kiwi kalpakna.

⁹Walanbis ahal balna Isaac dawak Ismael karak witingna nununa Macpela kinipala pāni sulihni yakat, kidika laih Mamre kaupak masar niningyakat pakki, hitita muihni Zohar walanibis Efrón sauni yakat.

¹⁰Kidika sauni kuduh hitita balna kaupak Abraham bakanna dai kidika. Kidika yakat Abraham nununa, witing yalni Sara karak libitni.

¹¹Abraham dauna usnit kat Papang yaklauwi Isaac yakat blisin kalana, witing watwi yalahna dai kidika was pāni kuhrna “Sangka kidika dawak bik yatalwi” yaihnit yakat.

¹²Adika Ismael walanbis balna, Abraham walanbis al as Agar Egipto yal kaupak yakna dai kidika, bahang kidika yal laih Sara dini yamyang dai,

¹³witingna batanh dadanadai kidika: Nebaiot kidika laih witing walanibis tatuna dai, kidika kaupak Cedar, Adbeel, Mibsam,

¹⁴Misma, Duma, Massa,

¹⁵Hadar, Tema, Jetur, Nafis dawak Cedema.

¹⁶Adika Ismael walanbis balna 12 dai kidika, sihm kidika ayangni kau, witingna saunina balna kidika papakna dai. Bahang witingna laih tatuna muihni balna dai sulanina pasyakat.

¹⁷Ismael kidika kurih 137 laihwi dauna, bahang kaput laih witing muihni bararak balna karak kiwi kalpakna.

¹⁸Witing sulani balna kidika laih Havila dawak Shur kidika balna walsah yakat pa dudunadai, Egipto muhni tani yakat, Asiria kau kiwa tani yakat, bahang kidika yakat wawatna, wanaihnina balna kidika niningnakauh dai kaunah.

¹⁹Adika kuduh Isaac yulni umani balna, Abraham walanbis.

²⁰Isaac kurih 40 duwa dai, Rebeca kidika duna kat, bahang kidika laih Betuel walanibis yal, dawak Labán wirahni yal, arameo balna Padam-aram yakat yalalahwa balna dai kidika.

²¹Rebeca laih witing sip walabis yakwas dai, bahang Isaac witing Dawan kalni dinit yakat bukwi yulna dai yalni yulni. Dawak Dawan witing dakana bahang Rebeca kidika muih karuk danadai.

²²Kaunah sūtki balna kidika witing bāni pasyak kalbauwa bahang witing kulna: “Bahang adika ban kaput karang kat, ¿ais yulni sangka atnin yah?” Bahang kaput laih Dawan yakat kiwi kalyulwi dakana,

²³dawak witing yaklauwi nangnitlana: “Man bama pasyakat nisan bu rauki, tawan bu kalbauwa rauki baisa batahndadawas tanitkauh. As kidika baisa tanit parasni karang ki, dawak barakni kidika laih wanaihni bikkalni dinit yakat karang.”

²⁴Bahang Rebeca walanbis dunin mani kidika kana kat, bahang sūtki duna.

²⁵Tatuna batahndana kidika laih basni papauni dai, dawak muihni bitik laih butuni manah duwadai, bahang ayangni laih Esaú papakna.[33]

²⁶Usnit yak wirahni kidika batahndana, bahang wirahni Esaú kalnitung yakat tingni kau laihna, kidika ayangni paknadai Jacob.[34] Isaac witing kurih 60 duwa kat Rebeca walanibis balna duna.

²⁷Walabis balna kidika bararakna. Esaú laih witing asangpas warkni kalahyang dai, dawak bik di iyang tanit yamni dai; dawak Jacob laih nawatkauh, muih al as isning yamni, dawak ū yakat manah sak-awakih kalawadai.

²⁸Isaac laih Esaú yakauh tanit dalani talna, kat witing di iwa kidika kaskih kalawadai bahang, kaunah Rebeca laih Jacob yakauh kulwadai.

²⁹Ma as kat Jacob di lahwa sakdai, dawak Esaú laih asangpas kaupak kalsuh dawak kaikalahna

³⁰dawak kalyulna: —Plisma di lahnaman wasni pauni sakkidika apis yatah, kat uba yuh daunayang bahang. (Kidika bahang Esaú kidika amangnilana ki sihm Edom kapat.)[35]

³¹—Tatuna yatah, walanbis tatuna rahmni dutaman kidika —kaltadai Jacob yaklauwi.

³²Kaput dawak Esaú yulna: —Man yatalaman yuh daunayang, bahang walanibis tatuna rahmni kidika laih yang yakat ilp as diski.

³³—Papang ayangni kau yakta yultah —Jacob yaklauwi kalyulwadai wat wat. Esaú yaklauwi Papang ayangni kau yakwi yulna, dawak kaput yamwi Jacob yakat walanbis tatuna rahmni kidika kalana dai.

³⁴Kaput laih Jacob yaklauwi Esaú yakat kalana sinak satni as wasni kidika dawak plawar busna karak. Kaput laih Esaú kaswi diwi dana usnit kat, yaklauwi mahka kiuna, witing di dauh kulna, walanbis tatuna rahmni kidika.