Read Mayangna Génesis 26 Bible Online

Génesis 26 - Mayangna bible

Génesis 26

¹Kidika mani balna yakat di kasnin dini balna dis kalna dai kidika sauni yakat, Abraham sangka dai kidika mani balna yakat yuhlakna dai kidika minit yakat. Kidika bahang Isaac kidika Gerar yakat kiuna dai, bahang kidika yakat filisteo balna kingni Abimelec kidika sakdai.

²Kidika yakat Dawan kidika lāih kalahwi kalyulna: “Man Egipto yak kiwinih, bahang watma yang lawik mayulki pāni yakat,

³dawak waradika laih adika sauni akat ban yalahta awah. Yang mankarak awaki dawak bik blisin maki, kat man dawak sulama balna bitik yakat adika sauni diaki. Kaput laih papangma Abraham kau pramis yamnayang yakat yamki.

⁴Yang lawik yamting kat sulama balna kidika kisang kau yala balna mahni kaput kalwarang, dawak adika sauni bitik diaki. Dawak bik sau akat nisan balna bitik laih blisin diana karang, man sulama balna munah,

⁵kat Abraham kidika yang yulki dakana, dawak yang ais yulnayang yakat yamna, yang laki balna, sumalnayang balna kidika bitik.”

⁶Kaput laih Isaac kidika Gerar yakat watna,

⁷kidika pāni yakat yalalahwa balna kidika yaklauwi yulwi dakakawakat Rebeca kidika, Isaac witing yamaduna dai yulna atnin; “Yang yalki”, bahang diyulna dai: “Kidika laih yang wirahki.” Rebeca laih uba nuhni yaksihni dai bahang Isaac kulna, Rebeca yulni witing yakat ihiwarang kulna.

⁸Ma balna bayakna dawak witing kidika pāni yakat watna. Kaunah ma as kat Abimelec kidika windar yakat talwasakdai, bahang witing talna Isaac kidika yalni yakat laihwi umwasakkat.

⁹Kaput dawak kalyulna kiuna dawak kalyulna: —Kaput bahang witing kidika man yalma, ¿rahm-awas yah? Kaput dawak ¿man ais yamta yulnamandaih witing kidika man wirahma? —Yang kulnayang laih witing yulni yaihiwarang —Isaac yaklauwi kaput kalyulna.

¹⁰Kaunah Abimelec kalyulna: —¿Ais yamta adika yanayamtamahn? Baisa apis dai katlaih tawan muihni balna adika as kalahwi man yalma karak kalalangwitdai, bahang man lawa yanayamtang kat dutni yamtanatitikdai.

¹¹Kaput laih Abimelec yaklauwi witing tawanni muihni bitik yakat dipakna dai: —Muih as yaklauwi adika alni akat uswarang kat, kidika awas bik yalni yakat uswarang kat, kidika muihni laih daunin yakat wirlana karang.

¹²Kidika kurihni Isaac witing di dahna dai, dawak di minik yamni yakna dai, kat Dawan yaklauwi blisin kalana dai bahang.

¹³Dawak witing di duyang kalna, dawak di manas bik witing duna dai.

¹⁴Dawak sīp balna kidika mahni palni dai, tuniruh yayal balna bik, kaput bik dini yamyang balna bik mahni palni duna dai, bahang filisteo balna tutumna dai.

¹⁵Witing papangni Abraham kidika baisa sangka dai yakat, Abraham dini yamyang balna kidika pa as kukuhrna dai was laihnin, kaunah usnit kat filisteo balna yaklauwi watwi sau kuhrwi pupuna dai pāni kuhrna pasyakat.

¹⁶Witni kat Abimelec yaklauwi Isaac yakat kalyulna: —Akaupak alahwa yawah, kat yangna karak dawak man laih tanitna di duyang kalnaman.

¹⁷Kaput laih Isaac witing kalahwi kiuna Gerar sauni langni yakat, bahang kidika yakat watwi yalahna.

¹⁸Witing papangni sangka mani balna yakat pa kuhrwak filisteo balna kuhrwi nununa balna dai kidika witing dauna usnit kat, bahang watwi kuhrwi apahna, papangni yaklauwi ayangni balna amput paknadai kaput watwi paknadai.

¹⁹Ma as kat Isaac dini yamyang balna kidika sau langni yakat was pāni as kuhrwa bangdai, dawak was burhwa as yayakna.

²⁰Kaunah Gerar sauni langni yakat sīp maintalyang balna kidika yaklauwi, Isaac sīpni maintalyang balna karak kalbabauna, kat witingna yaklauwi yuyulna, kidika wasni laih witingna dinina. Kidika bahang Isaac yaklauwi kidika pāni kuhrna ayangni pakna “Kalbauna”, kat kidika yulni kalbabauna dai bahang.

²¹Kidika usnit kat Isaac dini yamyang balna yaklauwi was pāni ūk kukuhrna. Dawak watwi kidika yulni kalbabauna, dawak Isaac yaklauwi kidika pāni kuhrna ayangni pakna “Kalwaihla”.

²²Isaac kidika kaupak naikau kiuna, dawak pa ūk kuhrna. Dawak kidika pa kuhrna yulni watwi kalbabauwas dadana bahang, ayangni pakna dai “Pri lani”, kat yulna dai bahang: “Waralaih Dawan yaklauwi pri maidana adika pāni akat barakna atnin.”

²³Kidika kaupak Isaac Beerseba yak kiuna.

²⁴Kidika puknita Dawan lāih kalahwi kalyulna: “Yang kuduh man papangma AbrahamPapangni yang. Yamaduwinih, yang man karak yang. Yang diki yamyang Abraham yulni blisin maki dawak, sulama balna kidikamahni yamna awaki.”

²⁵Kaput laih kidika pāni yakat Isaac yaklauwi walapni busnin pāni as yamna, dawi Dawan ayangni kidika yulna dai, kidika pāni yak uni labanni pakna dawi pa as kukuhrna.

²⁶Ma as kat Abimelec Gerar kaupak kiuna Isaac karak yulbaunin. Witing karak kaltalyang yamni Ahuzat dawak Ficol kidika balna minikdawi uina, bahang kidika balna laih kalbauyang balna taninatuna nunuhni dai.

²⁷Dawak Isaac yaklauwi diyulna: —Manna yang adika dukih manawaski, bahang sauma kaupak yakangta yaknamana, ¿bahang ais yamta yatalna aiwamanah?

²⁸Witingna biriwi nangnitnalalana: —Yangna talnayangna Dawan kidika man karak ki, yangna man karak pramis as yamnin kultik aiwayangna. Bahang pramis kidika laih adika karang:

²⁹man dutni as bik yangna akat yanayamtas awama, kat yangna man yakat maustasyangna bahang. Nawatkauh laih, man yakat yamni mayamnayangna, maparistik datiningkat alahwa yawaman, waradika laih Dawan yaklauwi blisin mawi.

³⁰Kaput laih Isaac yaklauwi alasna nuhni as yamna, dawak witingna kakasna dawak didina.

³¹Ma payahlawak mapiris kat yaklauwi witingna Papang ayangni kau yakwi yuyulna biri. Usnit kat Isaac yaklauwi diyulna Papang karak yawanauh, dawak witingna bik kulninna yamni kapat diparaswa dawi kalahwi uina.

³²Sihm kidika mani Isaac dini yamyang balna aiwi yul wisamni as kalalana, witingna pa kuhrwa bangdai kidika, was burhwa as yayakna.

³³Dawak Isaac kidika pāni kuhrna ayangni Seba[36] pakna. Kidika bahang warmani kat kidika tawanni nuhni ayangni duwi Beerseba.

³⁴Esaú kidika kurih 40 duwakat Judit karak kalduduna, kidika Beri walanibis dai, hitita kaupakdai kidika. Kaput bik laih Basemat karak bik kalduduna, kidika laih Elón walanibis hitita muihni ūk dai kidika.

³⁵Adika yayalni balna bu adika Isaac dawak Rebeca witingna sangninaka yakat tapalhni diayana dai.