Read Mayangna Génesis 28 Bible Online

Génesis 28 - Mayangna bible

Génesis 28

¹Kaput laih Isaac yaklauwi Jacob yakat kalyulwak kiwak blisin kalawi aput kalyulna: “Adika Canaán sauni akaupak yalni as karak bik duwinih.

²Yawah, Padan-aram yakat, man kukungma Betuel uni yakat, dawak kidika yakat man kanma Labán walanibis yayal kidika dutah.

³Papang parasni bitik duwa kidika blisin mana karang, dawak sulama balna bik mahni mana karang, dawak man kaupak nisan manas kalahwarang.

⁴Man yakat mawarang, dawak sulama balna yakat bik, Abraham yakat blisin kalanin pramis yamna dai kidika, kaput laih adika sauni akat pa ūk muihni kapat yalahda adika mayang madiki karang, kat witing yaklauwi Abraham yakat pramis yamna dai bahang.”

⁵Kaput kuduh Isaac yaklau Jacob kidika Padan-aram yakat sihna kidika, Jacob laih Labán ūni yakat kiwikana, kidika laih Betuel walanibis dai arameo muihni, dawak Rebeca wirahni al, Jacob dawak Esaú balna nanangnina.

⁶Esaú witing talna dai Isaac yaklauwi Jacob yakat blisin kalawi dawi Padan-aram yakat sihwakat, kidika pāni yakat kiwi yal duna atnin yulni. Dawak bik talna dai, papangni yaklauwi blisin kalawi dawi kalyulna dai kidika Canaán yalni dunin-awas,

⁷dawak Jacob kidik kiunadai Padan-aram yakat, papangni nanangki karak kalyuyulna dai kaput.

⁸Kaput laih Esaú amanglana dai witing papangni kidik Canaán yalni balna karak yamni kulwasdai kidika;

⁹kaput bahang witing Ismael Abraham walanibis yakat kiwi kaltalna dawak walanibis yal as Mahalat kidika duna, kidika laih Nebaiot wirahni yal dai, Canaán kaupak yayal duna kidika minit yakat ūk duna dai.

¹⁰Jacob witing Beerseba kaupak kalahwi Harán tani kidika duwi kiuna.

¹¹Kiwi pa askat watwi yakat payahna, kat ma kidika uman kawi kiunadai bahang. Dawak witing kalangwi tunan āna kidika kipala as kat duna dai, dawak mahka kamana.

¹²Yakat amana as talna; witing talna ta kilitna as sakdai sutni kidika sau yakat taihna dawak makau kisang kat kil'kana sakdai, dawak kidika munah Papang innisal balna kidika aiwi yaklakwi iluiwi ahawadai.

¹³Dawak bik talna dai witing yaihnit yakat Dawan yaklauna sakkauna aput kalyulna: “Yang kuduh Dawan yang man kukungma Abraham Papangni dawak papangma Isaac Papangni. Man dawak sulama balna yakat bik diaki ki pa alangwana tusman pāni kidika.

¹⁴Witingna laih mahni palni kakalwarang sihm sau yahamni kapat, dawak kalrata yawanama tingpal nining yakat dawak wadah niningyakat, ma kilwa kaupak ma kawa kat, dawak sau akat nisan balna kidika blisin duduna karang man munah dawak sulama balna munah bik.

¹⁵Yang man karak yang, bahang mainmatalki angkat yawama yakat, dawak wattik mating kat adika sauni akat aiwama. Yang marumhtik datas awaki adika pranimis yamtasyang kat.”

¹⁶Jacob witing amana kaupak sahmuhwi aput kulna: “Rahm palni adika pāni akat Dawan sakki, kaunah yang amanglatasyang dai.”

¹⁷Witing uba yamaduwi, dawi kulna: “Adika pāni holi kulna ki. Akat Papang ūni sakki; ¡makau kisang dūrni kidika!”

¹⁸Payahlawak Jacob mapiris palni yaklauwi, witing tunan āna kinipala kidika duwi rahni as kapat dulauna, dawak kidika minit yakat dia wasni utuhna.

¹⁹Tanit mani kau kidika pāni yakat tawan nuhni as pakdai ayangni laih Luz,[38] kaunah Jacob yaklauwi ayangni satuk pakna, kidika laih Betel.[39]

²⁰Kidika yakat Jacob pramis yamna: “Papang yaklauwi mikdawarang kat adik yawayang adika witing di yabayahwarang dawak asna bik yahawarang kat,

²¹dawak sangka yamni papangki ūni yakat nawattik yawaki kat, kaput laih Dawan kidika yang Papangki karang.

²²Bahang adika kinipala ū rahni kapat ānayang adika laih Papang ūni karang; Papang yang ban mata awaki, di yataman bitik kidika sahyakna salap kidika.”