Read Mayangna Génesis 35 Bible Online

Génesis 35 - Mayangna bible

Génesis 35

¹Papang yaklauwi Jacob yak kalyulna: “Lawa yawa Betel yakat yalahtah. Dawak kidika pāni yakat sakripais busnin pāni as yamma Papang yakat, witing man yakat lāih kalahna kidika, man wirahma Esaú yamaniduta iranaman mani dai yakat.”

²Kaput laih Jacob yaklauwi wanaihni balna dawak witing karak minikdawi uina balna kidika bitik yakat diyulna: —Manna pasmangna kau dawan dauh wayani balna dutamana kidika bitik yaktanauh, kalsuhta asmanana balna bik ūk awanauh.

³Sirihni mawanang Betel yakat, kat kidika yakat sakripais busnin pāni as yamkiki Papang risnipik kau kat yang kulnik bukna mani kat witing yaklauwi ilp yana dai bahang, dawak bik yang karakdai bahang angkat angkat pāni lik-atnayang balna yakat.

⁴Witingna yaklauwi Jacob yakat kalalana dai dawan dauh wayani balna bitik duduwadai kidika, dawak tapanina kau di tuyulni alalahwadai kidika bitik yakwi kalana, dawak Jacob yaklauwi kirah panan as saryakat nuna, kidika laih Siquem yaihnit ulah yakat dai.

⁵Witingna kalahwi uina kat, Papang yaklauwi yamna muih balna yaihnit kau balna bitik yamaduna atnin, kaput bahang Jacob walanbis balna yakat uiwi uiwas dadana.

⁶Jacob dawak witing karak muih balna uiwadai kidika bitik laih Luz yakat uiwi kakana, kidika tawanni nuhni kidika laih ayangni ūk bik duwadai kidika laih Betel duwak kidika laih Canaán yakat pakki.

⁷Dawak yakat sakripais busnin pāni as yamna, dawak ayangni pakna kidika pāni El-Betel,[63] kat witing wirahni kaupak kirana dai yakat, Papang kidika lāih kalahna dai witing yakat.

⁸Dawak yakat bik Débora dauna, yal as Rebeca yakat maintalna dai kidika, dawak kirah panan dinit yakat nununa dai, Betel yaihnit ulah yakat. Jacob yaklauwi kidika pāni ayangni pakna “Kaidana kirah panan dinit yakat”.

⁹Dawak Jacob witing Padam-aram kaupak nawatwi kaiwak, Papang watwi witing yakat lāih kalahna blisin kalana

¹⁰aput: “Man ayangma laih Jacob timan, kaunah waralaih baisa kaput mayulnaawaskarang; warmani kaupak man ayangma laih Israel.” Papang yaklauwi ayangni satuk wirlana usnit kat,

¹¹dawak kalyulna: “Yang kuduh Papang paraski bitikdutayang kidika; man walamabis mahni dutah. Man kaupak nisan as kalahna karang dawak bik tawan manas kalahna karang, dawak man sulama balna kaupak king kalalahna karang.

¹²Yang sau dianayang kidika Abraham dawak Isaac yakat bik, sihm man yakat bik matayang, man kaupak usnit yakat diana awakisulama balna yakat.”

¹³Papang Jacob karak yulbabauna pāni kaupak mahka kiuna kat,

¹⁴witing kipala as dungsakna, kidika laih ū rahni as kapat, Papang yulkalbauna pāni yakat; usnit kat witing yaklauwi Papang dini yakna, minit yakat dia utuhna dawak wain bik utuhna dai,

¹⁵dawak kidika pāni laih ayangni pakna Betel.

¹⁶Usnit kat Betel kaupak uina; kaunah baisa apis naikau dai Éfrata kidika bahang yakat Raquel laih muihbin duna, muihnibin dunin awarni kana kat dutni palni dai.

¹⁷Kidika minitni yak dadasni palni dai, bahang maintalyang yalni kidika kalyulna: “Yamaduwinih, man muihbin al ūk dunaman.”

¹⁸Kaunah witing kidika daunin manah danadai, dawak witni yak wingnita puhna kidika yakat yulna Benoni[64] kalatna muihnibin al yakat, kaunah papangni laih ayangni paknadai Benjamín.[65]

¹⁹Kaput laih Raquel kidika dauna dai, dawak Éfrata tani yakat nununa, waradika laih ayangni Belén.

²⁰Jacob yaklauwi sauniū minit yakat ūni kapat paknadai, kidika sauniū minit yakat ū kapat paknadai kidika warmani kat Raquel sauniū kidika lāihki.

²¹Dawak Israel witing mahka tani yak kalahwi kiuna, ban kiwi makau kilwi talnin pāni ayangni Edar kidika tanit yakat kiwi ūni labanni yamna.

²²Israel kidika pāni duna usnitkat kidika pāni yakat, Rubén laih kiwi Bilha karak kalalangna, kidika yal laih papangni yalni bin dai. Dawak adika yulni dakana kat, kasak kulnin daukalna dai.[66] Jacob walanbis balna kidika laih 12 dai.

²³Lea karak walanbis balna yakna kidika laih Rubén, witing walanbis barakni kidika; Simeón, Leví, Judá, Isacar dawak Zabulón.

²⁴Raquel karak yakna kidika laih José dawak Benjamín.

²⁵Raquel dini yamyang Bilha karak yakna dai kidika laih balna laih Dán dawak Neftalí;

²⁶dawak Lea dini yamyang yal Zilpa karak yakna kidika balna laih, Gad dawak Aser. Adika balna kuduh Jacob walanbis balna dai kidika, Padam-aram yakat batatahnna dai kidika.

²⁷Jacob witing Mamre yakat kiunadai papangni Isaac yakat talna atnin, kidika tawanni nuhni laih ayangni Arba, kidika awaskat Hebrón. Kidika yakat Abraham dawak Isaac, witingna yalalahna dai.

²⁸Isaac kurih 180 duwa kat dauna dai.

²⁹Witing muihni bararak balna yakat kiwi kalpapakna muih barak kalna mani kat, dawak witing walanbis Esaú dawak Jacob karak nununa.