Read Mayangna Génesis 37 Bible Online

Génesis 37 - Mayangna bible

Génesis 37

¹Jacob Canaán yakat watwi yalahna dai, witing papangni kidika pāni yakat ma as as yalahwādai yakat.

²Adika kuduh Jacob sulani balna yulnina. José witing kurih 17 duwa kat wirahni balna karak kalpakwi sīp maintatalwadai, dawak witing wirahni balna kidika laih papangnina Jacob yalni binina Bilha dawi Zilpa kaupak yakna dai kidika. Dawak José witing papangni yakat kiwi kalyulwadai wirahni balna dutni yayamwa kidika.

³Israel kidika witing walanibis José yakat tanit dalani talwadai walanibis as balna kidika karak dawakat, kat witing kidika muihbarak kalwakat José kidika batahndana dai kidika bahang. Kidika bahang parakni yaksihni as yamwi kalana dai.

⁴Kaunah wirahni balna tatalwak witingna papangnina kidika José yakauh tanit dalani talwadai, witingna karak dawakat, kaput bahang dutni kalkukulna, dawak bik pararaswasdai.

⁵José witing ma as kat amana talwi wirahni balna yakat diyulna; kaunah witingna baisa dutni kalkukulna,

⁶kat aput diyulna dai bahang: —Dakanauh, amana talnayang kidika manayulki ki.

⁷Amana kau talnayang, mayang bitik yamak yakat bangmayang dai, dawak plawar minik kidika wirdi sitda dai, dawak yang wirtik sitnayang kidika sirihni yaklauna, kaunah manna wirta sitnamana kidika laih yang wirtik sitnayang yaihnit yakat aiwi awai dawi rispik sainni yayamna.

⁸Kaput dawak wirahni balna yaklauwi nangnitlalana: —¿Yulnin kultaman, man kidika yangna kingkina awamayah, dawak yangna akat yanataihmayah? Dawak baisa dutni kalkukulna, amana talwi diyulna kidika yulni.

⁹Usnit yak José amana ūk talwi wirahni balna yakat diyulna. Aput diyulna: —¿Manna amanglana manah yang amana, yang talnayang kidika laih, ma, waiku dawak yala 11 yang akat rispik sainni yayayamna kidika?

¹⁰José yaklauwi amana talna kidika papangni dawak wirahni balna yakat bik diyulwak, papangni yaklauwi bilwi aput kalyulna: —¿Ais tanka yulnin kultaman amana talnaman kidika balna karak? ¿Kaput laih nanangma, wirahma balna dawak yang bik man yakat rispik matanakiyah?

¹¹Dawak wirahni balna laih kaltutumwadai, kaunah papangni laih uba kulwa dai adika yulni.

¹²Mani as kat José wirahni balna kidika Siquem yakat uina, papangnina sīp balna kasninna sihrsihr walwi uina.

¹³Dawak Israel yaklauwi José yakat kalyulna: —Talah, man wirahma balna kidika Siquem yakat sīp maintalwa bangki. Dukih yawi wirahma balna yakat yawa ditalna atnam. José yaklauwi nangnitlana: Yang yawik ditalki.

¹⁴—Yamniki —kalatna Israel yaklauwi—, yawatalah wirahma balna ampat bangyah dawak sīp balna bik, dawak usnitkat aiwa yayultah yulni kidika. Israel yaklauwi José kidika sihna Hebrón sauni langni kaupak, dawak José witing Siquem yakat kiuna,

¹⁵dawak kidika yakat ta disna. Kaput laih muih al as kalpakwi kalyulwi dakana: —¿Ais waltalikmahn?

¹⁶—Wirahki balna waltalikyang —kalatna José yaklauwi—. ¿Sipmahn yayulnam angkat sīp maintalwa bangpa?

¹⁷—Akaupak uman kalahwi uina —kalatna al dai kidika yaklauwi—. Dotán yakat mawi atwi yuyulwak dakanayang. José witing wirahni balna kidika walwi kiwi Dotán kat.

¹⁸Witingna kaltatalna naikaupak, José kidika kaiwak, dawak baisa yaihnitna yakat kiwi kawas yakau witing yulbabauna īna atnin.

¹⁹Dawak witingna biri biri yuyulna: —¡Talnauh, amana talyang muihni dai kidika kaiwi!

²⁰Aiwanang kat idanang; usnit kat pa kudungni as kau apamdarang, dawak yuldarang asangpas dini anyang as kaspamna. ¡Dawak taldarang amana talna balna dai kidika karak ais kalahwarangpa!

²¹Adika yulni Rubén dakawi witing wirahni kidika laihwi yaknin kulna bahang, yulna: —Īdas kawang.

²²Ā ututuhwinih. Kauhmak wanilang paskau pa kudungni as sakkidika yakat apamtanauh, kaunah manna tingmana maisihni laih yayamwinih. Rubén witing dukih lanadai wirahni José kidika laihwi yakwi papangni yakat watwi uiwi kalana atnin;

²³kaunah José witing wirahni balna bangyakat kiwi kana kat, witingna laihwi parakni kidika yayakna,

²⁴dawak witingna laihwi pa kudungni pas yakat ahana bahang pāni kudungni kidika laih pāni manah dawak buhni sakdai.

²⁵Usnit kat witingna yalahwi di kakasna. Kidika yakat, witingna tatalwak ismaelita balna kidika Galaad kaupak aiwabang dai, dawak kianinamil minit yakat ilwi duahaina pan yani walapni satni balna, bahang kidika laih Egipto yakat duwi uiwadai.

²⁶Dawak Judá yaklauwi wirahni balna yakat diyulna: —¿Mayang mawirahki idi ais as minit dudarangyah, dawak usnit kat dauna kidika yulni malna atnin?

²⁷Tanit yamni karang ismaelita balna yakat bakanpamdarang kat, īdarang karak dawakat, kat adika laih mayang mawirahki bahang. Wirahni balna laih yamni dakakana yulwa kidika,

²⁸dawak Madián muihni balna kidika munah bayayakwak, José wirahni balna yaklauwi witing kidika pa kudungni kaupak yakwi bakanpapamna lalah 20 minit. Kaput laih José kidika Egipto yakat duwi uina.

²⁹Rubén nawatwi kaiwi talna pa kudungni yakat, bahang José kidika disdai, dawak parakni iswi bisna kulnin dalani duwa kidika yulni.

³⁰Usnit kat wirahni balna bangyakat kaiwi diyulna: —¡Muih albin dai kidika diski! ¿Waralaih ais yamkiyah?

³¹Kaput laih José parakni kidika duwi kuts as ihina kidika āni kau kakahna;

³²usnit kat papangni yakat sisihna adika yulni karak: “Adika yaknayangna. Yamni laihta talah, man walambis parakni pa, kidika awas kat ūk pa.”

³³Jacob witing amanglawi yulna: “¡Agha, adika ki walakibis prakni! Asangpas dini anyang as kaswi biswi dawi kaspamna.”

³⁴Dawak Jacob witing parakni iswi biswi dawi kulnin bukna parakni kidika kana, dawak ma mahni kaidana walanbis dauna kidika yulni.

³⁵Walanbis ahal dawak walanbis yayal balna kidika bik witingna walaniānin yayamna, kaunah witing dukih kalawasdai, walaniahawa kidika; nawatnikauh laih, walanbis dauna kidika yulwi kaidi, aput yulwadai: “Walakibis yulni kulnik bukna adika ban awaki, mampat yawik witing karak kalpakki kat, dauna balna pasyakat.”

³⁶Madianita balna José kidika Egipto yakat duwi uiwi wauhwi bakanpapamna, al as ayangni Potifar yakat, bahang witing laih fero dini yamyang[68] dai, Egipto kingni, dawakat kalbauyang balna taninatuna dai.