Read Mayangna Génesis 38 Bible Online

Génesis 38 - Mayangna bible

Génesis 38

¹Kidika mani balna yakat Judá laih witing wirahni ahal balna kaupak dakwi kalahwi muih al as ayangni Hira kidika ūni yakat kiwi yalahna, bahang kidika alni laih Adulam tawanni kaupak dia.

²Kidika yakat cananeo kaupak al as ayangni Súa, kidika walanibis yal kidika duna. Kaput laih witingna kalduduwak,

³yal kidika muih karukdana, dawak witing walanbis al as yakna, bahang kidika ayangni laih Er paknadai.

⁴Dawak watwi witing muih karukdana, bahang walanibis ūk yakna, bahang kidika laih ayangni pakna dai Onán.

⁵Baisa watwi walanbis ūk duna, dawak kidika laih ayangni pakna Sela, bahang Judá laih witing Quezib yakat likkat batahndana dai.

⁶Judá witing walanbis Er yakat yal kalana, kidika yalni ayangni laih Tamar.

⁷Kaunah Dawan yamni talwas dai Er dutni yamwa kidika, bahang sangnika dakna.

⁸Kaput laih Judá yaklauwi Onán yakat kalyulna: —Man tingmamak karak kaldutanauh, bahang kaput laih wirahma bahaka tingnimak pranimis kat yamma, kaput laih man wirahma kidika sulani duna karang man munah.

⁹Kaunah Onán amanglana, walabis yakwarang balna kidika laih witing walanbis balna awas karang kidika. Kaput bahang witing tingnimak yal yakarak kalalangwa bitik kidika yamwadai yal kidika muih karuk danin-awas, kat witing kulna dai bahang wirahni kidika sulani dunin-awas witing munah.

¹⁰Dawan witing dutni talna, Onán yamwa kidika, bahang witing bik sangnika dakna.

¹¹Kaput dawak Judá yaklauwi unisah yal Tamar yakat kalyulna: —Tingmak papangma uni yakat yawa sak-awah, angkat mani walakbis Sela kidika muihbarak kalwarang kat. Rahm kidika laih, Judá kulwadai walanibis Sela bik sihm kaput dauwarang, wirahni balna dadauna kaput. Kaput laih Tamar kidika papangni ūni yak kiwi yalahna dai.

¹²Ma balna bayakna dawak Judá yalni dauna, Súa walanbis yal dai kidika. Judá witing kulnin bukna balna kidika bayak dawakat, Timnat tawanni yakat kiuna, witing warkni kalahyang balna kidika Timnat pāni yakat sīpni balna butuni kakahrwa bangdai, dawak witing karak kaltalyang muihni yamni as duwa dai Adulam kaupak ayangni laih Hira, bahang witing minikdawak uinadai.

¹³Tamar witing dakana unisah kidika Timnat yakat kiuna atwak sīp balna butuni karhna,

¹⁴dawak Tamar, tingmak asnina kawa dai kidika yakpamwi dawi tunan yakat asna as suruhmna muih amangnilanin awas yulni, dawi kiwi Enaim tawanni kiwi kawa yakat yalahna bahang kidika laih Timnat tani kiwa yakat ki. Kat witing laih amanglana dai Sela kidika uman wahma kalnadai bahang, kaunah baisa witing karak kalawak kalduduwas dai bahang.

¹⁵Judá witing talwi kulna, kidika yal laih tapas yalni kulna, kat witing laih muhni asna kau putna bahang.

¹⁶Kaput laih witing ta kaupak kalahwi yal kidika yaihnit yakat kiwi kalyulna, dawak witing amanglawas bahang unisah yal kidika, kalyulna: —¿Yadatang kat man karak alangwakuh? —¿Man karak alangwing ais yāmayah? —yal kidika yaklauwi kalyulwi dakana.

¹⁷Yang kutski balna kidika paskaupak as yaktik masihki, —Judá yaklauwi kaput kalyulna. —Yamniki —kaltalna yal kidika yaklauwi—, kaunah man dima as yatah kuts kidika yasihma kat biritik maki.

¹⁸Judá yulwi dakana: —¿Ais kat dukih mawih yang manik kidika? —Man tampma kidika wahni kauna yatah, dawak tingma kau tulmanah kidika bik —yal kidika yaklauwi nangnitlana. Dawak Judá witing yaklauwi kalana dawak witing karak kalangna, kaput laih yal kidika muih duna.

¹⁹Usnit kat Tamar witing kiwi asnina dai kidika yakpamwi watwi tingmak asnina dai kidika kana.

²⁰Kidika usnit kat Judá yaklauwi kuts dai kidika sihna Adulam kaupak al dai kidika karak, kaput laih witing dini balna kidika biriwi sihna atnin yulni, kaunah yal dai kidika walwi yakwasdana.

²¹Kaput laih kidika pāni muihni balna yakat diyulwi dakana: —¿Angkat sakyah kidika tapas yalni Enaim kaupak ta kung yakat yalahna sakdai kidika? —Akat, tapas yalni as bik diski —kaput kalyuyulna.

²²Kaput laih witing nawatwi kaina Judá sakdai yakat, dawak kalyulna: —Yalni kidika waltik yaktas danayang, dawak kidika pāni muihni balna bik taldaski atwi tapas yalni as kidika pāni yakat.

²³Dawak biri kalyulna: —Kaput kat kidika di balna dai kidika duwang, kaput laih muih as bik sarahni maiyulwas karang; kaunah amanglanin ki yang kuts bin kidika sihnayang kaunah man yaktas danaman.

²⁴Waiku bās bayakwakat Judá yakat aiwi kalyuyulna: —Tamar, man umasah yal kidika ahal ūk karak kalangna, dawak muih karukdana. —¡Yaktanauh dawak bustanauh! —kaput Judá laih parasni sarahwi yulna.

²⁵Kaunah witingna mahka laihwi yayakwa kat, yal kidika unisah al yakat adika yulni sihna: “Adika dini balna daniwan kidika yaklauwi muihkaruk yayamna. Man yamni talah, adika tamp wahni kauna, dawak tulninah adika bik.”

²⁶Judá dini balna kidika talwi amanglana dawi yulna: “Witing yamni yamna, kaunah yang laih dutni yamnayang, kat yang walakbis Sela karak kalating duwas dana bahang.” Dawak watwi witing karak kalangwasdana.

²⁷Tamar muihbin duna kat sūtki dai.

²⁸Batahnwak minitni yakat as laih tingnipas yakna. Dawak yal maintalwa sakkidika yaklauwi trit pauni kau sitna dai dawak yulna: “Adika tatuna kalahna.”

²⁹Kaunah kidika minitni yakat muihbin kidika tingni apamna, dawak wirahni as kidika kauh tatuna batahnna. Kidika bahang maintalwasak yalni kidika yulna ayangni Fares,[69] pakna, kat yulna: “¡Kat man lawa ta apahnaman bahang!”

³⁰Usnit yak muihbin al ūk kidika batahnna, tingni yakat trit pauni sitnadai kidika, dawak ayangni pakna Zara.