Read Mayangna Génesis 40 Bible Online

Génesis 40 - Mayangna bible

Génesis 40

¹Adika usnit kat, king yakat wain utuhwi kalawa muihni, dawak bik plawar busyang dai kidika, daninawan yakat dutni kalyuyulna, Egipto kingni yakat.

²Fero, king kidika, adika dini yamyang balna niningna yakat kulnin daukalna, sutak kau wain utuhwi ilyang tunan muihni yakat, dawak plawar bubuswa tunan muihni yakat,

³dawak kalbauyang balna tunanina ūni yakat sihwak silak āna, kat kidika yakat silak ūni kidika sakdai bahang. Sihm kidika pāni yakat José kidika silak kau tusdai.

⁴Kalbauyang balna taninatuna kidika yaklauwi José tingni yakat danadai kabamint warkni yamyang muihni balna bu kidika, bahang witingna laih ma mahni silak yakat bangdai.

⁵Pukta as kat silak muihni balna bu kidika, sutak kau wain utuhyang dawak plawar busyang kidika balna amana tatalna, dawak amana tatalna kidika laih tannika duwadai.

⁶Mapiris José kaiwi ditalwak, witingna uba kulninna bukna dai;

⁷dawak diyulwi dakana: —¿Ampat dawak manna muhmana dutni dutamanah?

⁸—Amana talnayangna kaunah muih as bik diski tanka lāih yakwi yanayulnin kidika —witingna kaput yuyulwadai. —¿Papang yaklauwi kidika tanka balna lāih yakwi yulwaskatpah? —José yaklauwi kaput yulwi dakana—. Yayultanauh manna amana talnamana kidika.

⁹Kaput laih sutak kau wain utuhyang amana talna dai kidika kalyulna José yakat aput: —Amana kau wain pana as talnayang,

¹⁰tingni rahni bās duwadai. Wain panan kidika udungwi kalahna dawak bik puluna, dawak puluni balna kidika wain minik upuna lalahna kakalna.

¹¹Dawak yang tingki yakat dutasakyang dai Fero sunitak kidika, dawak wain minik kidika dutik tingki kau kataknayang sutak pasyak. Usnit kat yang lawik sunitak kidika Fero tingni yakat ānayang.

¹²Dawak José yaklauwi kalyulna: —Man amana talnaman kidika laih aput ki: tingni rahni bās dai kidika laih ma bās ki,

¹³dawak ma bās kat man yulma kidika Fero laihwi talwarang ki, dawak watwi warkma yakat mahawarang ki, dawak man lawa fero yakat sunitak kidika kalama, muhnilau yamtaman dai kapat.

¹⁴Adika kalahwarang kat, yang akat yakulta-awama, dawak plisma yang yulki kalyulma fero yakat, adika pāni kaupak yāyaknin yulni. ¡Yang kat mikun yatalah!

¹⁵Yang adika hibru balna saunina kaupak yamamalna, yang silak yakat sak-atnik kidika laih yang diki awaski, kat yang laih di as bik dutni yamtasyang bahang.

¹⁶Plawar busyang taninatuna kidika witing talwak José yaklauwi tanka balna kidika lāih yakwi kalawak, kalyulna: —Yang nikingkauh laih talnayang tunaki yakat uslun binina bās plawar busna kidika dutalikyang dai.

¹⁷Uslun bin makau kidika laih pastel satni balna yamna kat puna dai fero dini, kaunah tunaki kau sakkidika uhu binina aiwi uhukna.

¹⁸Kaput laih José yaklauwi biriwi nangnitlana: —Man amana talnaman kidika laih aput ki: uslun binina bās kidika laih ma bās ki,

¹⁹dawak ma bās pasyakat man yulma kidika Fero yaklauwi laihwi talwarang ki, dawak witing yaklauwi pakwak pan yakat masitwi mamurilna karang, dawak man muihma kidika laih kusma balna kakaswarang.

²⁰Ma bās laihwakat fero witing batahndana mani dai, bahang alasna nuhni yamna kabamint warkni yamyang tunan muihni balna karak. Muih yulwak uina balna muhnina tani yakat king sunitak yakat wain utuhyang tanituna dai kidika dawak plawar busyang balna tanituna dai kidika bik yakwi duwi kiuna.

²¹Dawak wain utuhyang dai kidika watwi warkni kalana, dawak witing yaklauwi Fero yakat sunitak kidika kalana, muhnilau dai kapat;

²²kaunah plawar busyang balna tanituna dai kidika laih sihwak pan yakat sitwi murihilna, José yaklauwi kalyulwa dai kaput.

²³Kaput kaunah king sunitak laihyang dai kidika watwi José yakat kulwas dinitkahna dai.