Read Mayangna Génesis 41 Bible Online

Génesis 41 - Mayangna bible

Génesis 41

¹Kurih bu bayakna dai. Ma as kat Fero witing amana talna, bahang witing kidika Nilo wasnikung yakat yaklauna sakdai,

²dawak was paskaupak turuh salalani tiaskaubu kalalahna, dawak dibasta kakasna junco walsah yakat.

³Kidika balna usnitna yakat turuh dutni ararakni tiaskaubu waspa kaupak kil'kalalahna waskung yakat, as balna kidika yaihnitna yakat uina.

⁴Usnit kat turuh dudutni ararakni balna kidika yaklauwi turuh yamni salalani tiaskaubu balna yakat kasmumukna. Dawak Fero witing sahmuhna,

⁵kauna watwi kamana dawak amana ūk talna: witing talna plawar minik tiaskaubu yayamni bararakna panan aslah kidika kaupak.

⁶Kidika balna dangnitna kaupak plawar minik tiaskaubu kusulana balna kat kalalahna, kidika laih ma kilwa wingni daihni kidika yaklauwi busna dai,

⁷dawak adika plawar minik kusulana balna kidika yaklauwi plawar minik yayamni balna yakat kakasna. Fero witing sahmuhna, dawak witing amanglana kidika laih amana talna dai.

⁸Kaunah mapiris yakat witing kulnin kidika bahna palni dai, dawak pakna sukia balna kidika bitik uina atnin witing yakat, dawak Egipto kau sins duyang balna bitik. Fero yaklauwi diyulna amana talna kidika, kaunah witingna as bik tanka yakwi kalyuyulwas dadana.

⁹Kaput dawak wain sutak yakat utuhyang tunan muihni kidika yaklauwi Fero yakat kalyulna: —Waradika amanglatayang yang dutni yamnayang kidika.

¹⁰King, man plawar busyang balna tanina tuna nining yakat kulnam daukalnaman kat dawak man dima yamyang adika bik, albupak silak yakat yanasihnaman dai, kalbauyang balna tanina tuna kau silak ūni yakat.

¹¹Pukta as kat plawar busyang balna taninatuna kidika amana as talna dai, dawak yang bik amana ūk talnayang, dawak amana talnayangna kidika tannika duwadai bupak.

¹²Kidika pāni yakat hibru wahma as sakdai, bahang kidika laih kalbauyang balna taninatuna dini yamyang dai, dawak witing yakat kalyulnayangna dai amana talnayangna kidika, dawak witing yaklauwi tanka lāih yakwi yanayulna dai.

¹³¡Dawak, witing amput yanayulna dai yakat kalahna! Yang wattik warkki kidika dunayang, dawak as kidika laih wah kau sitwi ina.

¹⁴Kaput dawak Fero yaklauwi José yakat yulna kiuna atnin witing yakat, kaput laih kidika minitni silak kaupak yayakna. Kaput laih José kidika basni dadakna, prakni ūk ahana, dawak Fero muhni yakat kiuna.

¹⁵Dawak Fero yaklauwi kalyulna: —Yang amana as talnayang kaunah muih as bik diski tanka lāih yakwi yayulnin, kaunah yang dakanayang, man amana as dakama kat tanka lāih yakta yulnin sipman.

¹⁶José biriwi kalyulna: —Kidika laih yang kaupak laih awaski; kaunah Papang yaklauwi king yakat tanka lāih yakwi kalyulna karang man yamni atnam kidika yulni.

¹⁷Dawak Fero yaklauwi José yakat kalyulna: —Amana talnayang kidika laih, yang Nilo wasnikung yakat lawana sakyang dai,

¹⁸dawak was paskaupak turuh salalani tiaskaubu, nunuhni salalani yayamni kalalahna dawak dibasta kakasna.

¹⁹Kidika balna usnitna yakat turuh ūk tiaskaubu, dutni ararakni palni kalalahna. ¡Yang kaput palni yang talas yang dai Egipto yak!

²⁰adika turuh yayal ararakni wayakani balna kidika yaklauwi turuh salalani balna yakat kasmumukna;

²¹kasmumukna kaunah muih as bik amanglawasdai kat ararakni kidika bandai bahang sihm muhnilau dai kapat. “Sahmuhnayang,

²²dawak wat amana ūk talnayang, kidika laih plawar minik tiaskaubu nunuhni yayamni bararakna sihm panan aslah yakat.

²³Kidika usnit yakat plawar minik ūk bararakna kaunah kususuni dai, kidika laih makilwa wingni daihni kidika yaklauwi busna dai.

²⁴Adika planiwar minik kususuni balna kidika yaklauwi kakasna plawar minik yayamni balna tiaskaubu yakat. Adika yang lawik sukyah balna yakat diyulnayang, kaunah witingna as bik sip adika tanka yayulwas dadana.

²⁵Kaput laih José yaklauwi Fero yakat nangnitlana: —King man amana bu talnaman kidika laih sihm dini yakauna ki. Papang yaklauwi mayulna, witing di balna yamwarang kidika.

²⁶Turuh yayal yayamni nunuhni tiaskaubu talnaman kidika laih kurih tiaskaubu ki. Dawak plawar minik yayamni talnaman kidika bik sihm dini kidika ki. Amana talnaman kidika laih sihm aminin kidika kauna ki.

²⁷Turuh yayal ararakni dawak wayakakani as balna dangnitna kaupak kilwi kalalahna kidika bik kurih tiaskaubu ki, dawak plawar minik kusuni talnaman kidika bik sihm kaput ki, makilwa wingni daihni yaklauwi busna dai kidika. Kidika laih kurih tiaskaubu di dis karangki.

²⁸Mayultikda kidika kaput ki: Papang yaklauwi king yakat kalyulna witing ais yamwarang kidika.

²⁹Egipto sauni bitik yakat kurih tiaskaubu kaiwarangki di manas palni kalahna karangki,

³⁰dawak kidika usnit yak yuhlakna nuhni kalahwarang kurih tiaskaubu. Egipto sauni yakat di manasdai kidika muih as bik isning aiwas karang ki, kat yuh lakna kidika yaklauwi sauni kidika bitik daukalpamwarang bahang.

³¹Di dis kalahna kidika laih nuhni palni karang ki, bahang muhnilau di manas dai kidika sainni as bik dis kalna karang.

³²King man amana bu talnaman kidika laih sihm dini yakauna ki, kat Papang laih adika dini yamnin ridi kalahna bahang, dawak sirihni palni yamna karang ki.

³³“Kaput bang waradika yamni karang king, man lawa muih al as sins duyang muihni kat walmakat, bahang witing kidika adika sauni bitik witing tingni yakat duna karang.

³⁴Bahang king man aput yamtah: kabamint balna atah dawak witingna uiwang, pa balna bitik yakat, dawak Egipto akat di minik kalahwa balna kaupak sahyakna singka kidika ududuhwang, kurih tiaskaubu di minik manas kalahwarang kidika yakat.

³⁵Plawar minik balna kidika bitik ududuhwang, kurih balna yamni kaiwa kidika yakat; dawak pa as kau uduhta, king man maintalah, dawak tawan nunuhni balna yakat uduhwi duwi dawi muih balna yakat bayayahna atnin.

³⁶Kaput laih plawar minik kidika apakna karang, adika sauni bitik yakat, kaput laih kurih tiaskaubu di diskarang yakat muih balna kidika yuh dauna atnin-awas, Egipto akat.

³⁷Kaput yamnin kidika yamni kapat talwadai Fero, dawak witing yaihnit kau wark kalahyang balna kidika bik,

³⁸kaput laih, fero yakluwi diyulna: —¿Muih al ūk witing apat yaknin sipyah, Papang spiritni duwa kidika?

³⁹Dawak José yakat kalyulna: —Muih sinsni sirihni ūk diski man kapat, Papang yaklauwi mana adika balna bitik amanglana atnin.

⁴⁰Yang ūki adika man tingma yakat karang, dawak yang tawanki bitik man yulma dakakana karang. Yang manah man mamat yakat awaki, kat yang laih king yang bahang.

⁴¹Talah, yang lawik man kidika Egipto sauni bitik yakat kabamint mahatayang. Kidika yulwi,

⁴²Fero witing tingni yakat ting-ānin tamp duwadai kidika yakwi, José tingni yakat āna. Usnit kat witing yaklauwi pakna José kidika linin asnina tanit yamni kidika āna atnin, dawak dinimak yakat gol alahni kidika alahna atnin.

⁴³Usnit kat pakwak witing kārni usnit yakat kar ūk kiwa yakat kilna atnin: “¡Tanipas kaupak lāwanang bayakwang!”[70] Kaput laih José kidika Egipto sauni bitik yakat witing tunan kana dai.

⁴⁴Usnit kat Fero yaklauwi kalyulna: —Egipto sauni akat muih as bik tingni dulauwas karang man kalyultas man kat.

⁴⁵Fero yaklauwi José yakat Egipto yulni kau ayangni paknadai: Zafnat-panea, dawak Asenat karak kalawak kalduduna, Potifera walanbis yal kidika karak, kidika laih On sumalniyang dai. Kaput laih José kidika Egipto tani tuna kana.

⁴⁶Dawak José laih kurih 30 duwa kat Fero Egipto kingni muhni yakat duwi uina. Kaput laih José witing Fero kaupak kalparaswa dawi mahka kalahwi kiuna, dawak Egipto sauni bitik yakat awaihwi talna.

⁴⁷Sau kidika di minik mahni palni yakna, kurih yayamni tiaskaubu pasyakat,

⁴⁸dawak José witing plawar minik kidika sauni yakat kalahna kidika bitik uduhna kurih 7 kidika pasyakat; dawak tawan nunuhni balna yakat apakna, dawak tawan nunuhni yaihnit kau di minik balna uduhna kidika, sihm kidika tawanni nunuhni balna yakat uduhna dai.

⁴⁹José witing plawar minik uduhna kidika laih sihm kuma kauhnimak kapat mahni uduhna dai. Plawar minik kidika uba mahni bahang witing sip kulwas danadai, kat ampus bang kidika sip-awas dai kulwi talna atnin, uba mahni.

⁵⁰Yuh lakwas tanit kauh José witing walabis bu duna dai yalni Asenat karak.

⁵¹Walambis tatuna kidika laih ayangni paknadai Manasés,[71] kat aput yulna dai bahang: “Papang yaklauwi yāyamwak wauhnayang balna kidika bitik dating dikitkahna, dawak kaput bik wanaihki balna bik dikitkahna.”

⁵²Dawak kidika kaupak usnit yakna kidika laih ayangni pakna Efraín,[72] kat yulna dai bahang: “Papang yaklauwi yāwak walakibis as dunayang dalani wauhnayang sauni yakat.”

⁵³Egipto yakat kurih tiaskaubu di manas kalahna mani balna dai kidika bayakkiuna,

⁵⁴dawak kurih tiaskaubu di dis atnin dai kidika uman tunan bahna, José yulna dai kidika kaput. Sau balna kidika bitik yakat yuh lakna dai, kaunah Egipto yakat manah laihtakat kaput awasdai, kat kidika yakat laih di kasnin kidika bangdai bahang;

⁵⁵dawak egipto muihni balna kidika mahka yuh dauwi dakawi fero yakat uiwi plawar yuyulna. Dawak Fero yaklauwi Egipto muihni balna yakat diyulna: “Manna José yakat yawa talnauh, dawak witing ais mana yulwarang yakat yamtanauh.”

⁵⁶Yuh kidika Egipto sauni bitik yakat kawi yaklawakat, José yaklauwi plawar minik puna ūni balna dai kidika bitik laih apahna, Egipto muihni balna yakat di bakanna atnin yulni; kat yuh kidika laih baisa dutni kalwi kiuna bahang.

⁵⁷Sau ūk balna kidika bitik Egipto yakat uina José yakat, witingna plawar bakanna atnin yulni, kat sau pāni balna yakat as bik di kasnin disdai bahang.