Read Mayangna Génesis 45 Bible Online

Génesis 45 - Mayangna bible

Génesis 45

¹José witing sip baisa laihwatwi duwas dai muih witing dini yamyang balna bangkidika muhnina yakat, bahang parasni sarahwi yulna: “¡Manna bitik akaupak alahwanauh!” Kaput laih dini yamyang balna kidika as bik disdai José witing wirahni balna yakat lāih kalahna kidika yakat.

²Kaput laih witing parasni palni kaidana, bahang Egipto muihni balna bitik dakakana, dawak yulni kidika Fero kat kiwak dakana.

³José wirahni balna yakat diyulna: —Yang kuduh José. ¿Yang papangki baisa sangkayah? Witingna uba muihsak dadauna dai witing muhni yakat bangkidika, bahng witingna sip biriwi nangnitlalawasdai.

⁴Kaunah José yaklauwi diyulna: —Plismana yaihkit akat aiwanauh. Witing yaihnit yakat uiwak diyulna: —Yang kuduh manna wirahmana José, manna lawa Egipto muihni balna yakat wauhta bakanpamnamana dai kidika;

⁵plismana, manna kulnamna buknin-awaski, dawak bik kulnamna daukalnin awaski manna alas muihmana yakat, kat Papang yaklauwi manna tamatna yakat yasihna dai, muih sangnika kidika laihwi yakna atnin yulni.

⁶Warakat uman, yuhlakna kidika sau pāni bitik yak kurih bu palni kiwi, dawak baisa tanit yak kurih singka karang ki; bahang kidika kurihni balna pasyak di dahwi, babahwas karang.

⁷Kaunah Papang yaklauwi manna tamatna yakat yasihna, kaput yamwak manna sulamana kidika sau akat ban atnin yulni, dawak bik sangmanaka laihwi yakna atnin tanka as taldas dini kau.

⁸Kaput bahang Papang yaklauwi adika pāni akat yasihna, manna yasihtasmana; witing yaklauwi yahana Fero yakat yul sumalyang atnik, dawak witing ūni bitik kidika daniwan atnik, dawak Egipto sauni bitik yakat kabamint atnik.

⁹Manna sirihni yawanauh papangki sakyakat, dawak kalyultanauh: ‘Man walambis José aput yulwi: Papang yaklauwi Egipto yakat dawan kapat yahana. Aiwa yatalah. Nai watwinih.

¹⁰Gosén sauni yakat yalahma, man walambis balna dawak māma balna karak, kaput bik laih man tingmalau balna dawak di dutaman balna bitik karak. Kaput laih yang yaihkit yakat sak-awama.

¹¹Akat di kasnin balna maki, dawak bik walamabis balna yakat bik diaki, kaput bik laih man karak bangkidika balna bitik yakat bik diaki, kaput laih dukih manawa kidika as bik diskarang; kat baisa yuh lakwarang kidika kurih singka ki.’

¹²Yang wirahki Benjamín dawak manna bik witnis mana, yang yultikda balna kidika.

¹³Papangki yakat kalyultanauh, yang Egipto akat paraski nuhni dutayang kidika, dawak manna talnamana kidika bitik akat. ¡Manna sirihni yawa papangki duaitanauh!

¹⁴José witing wirahni Benjamín yakat wakaihna, dawak kaidana. Dawak Benjamín bik José yakat wakaihwi kaidana.

¹⁵Usnit kat José wirahni balna bitik yakat umna, dawak wakaihwi kaidana. Kidika usnit kat wirahni balna kidika yaklauwi yulkalbabauna.

¹⁶Fero uni yakat yul kidika kiunadai, José wirahni balna uina kidika, dawak Fero laih alasna kulna, dawak wark kalahyang balna bitik alasna kalalahna.

¹⁷Dawak Fero yaklauwi José yakat kalyulna: —Wirahma balna yakat diyultang birininaku kidika plawar ilwi duwi mahka uiwang Canaán yakat,

¹⁸dawak papangma dawak wanaihma balna kidika duaiwi yayawang. Yang lawik Egipto sauni tanit yamni kidika diaki, dawak adika sauni di tanit yayamni yakwa balna kidika witingna kakaswarang.

¹⁹Paktang kat Egipto akaupak truk balna duwi uiwi, yalnina balna walaninabis balna, dawak manna papangmana bik duahaiwang. Aiwang

²⁰waradika duduwa kidika yulni kulwi kalbaunin-awas ki, kat Egipto akat di tanit yayamni kidika witingna dinina karang.

²¹Israel walanibis balna kidika kaput yayamna dai. José yaklauwi kar balna kidika diana dai, fero yaklauwi paknadai kidika, dawak tapas yakat di kasnin balna kidika bik diana dai;

²²dawak asna wisam bik diana dai asninana ūk yakwi kana atnin yulni, kaunah Benjamín yakat laih lalah 300 kalana dai, dawak asna kanin singka kalana dai.

²³Dawak papangni yakat laih biriku salap ilwi sihna dai, Egipto kau di tanit yayamni balna kidika, dawak biriku ūk salap kidika plawar ilwi sihna dai, plawar busna dawak kasnin dini ūk bik sihna dai tapas yakat kaswi kiunin kidika.

²⁴José witing wirahni balna yakat mahka sihmukwi, aput diyulna: —Tapas yakat kalbilwinah uiwinih. Bahang witingna mahka uina.

²⁵Egipto kaupak kalahwi Canaán yakat uina, witingna papangnina Jacob yalahwadai yakat.

²⁶Witingna yaklauwi José laih baisa sangka ki, dawak witing laih Egipto sauni bitik minit yakat kabamint kawi, dawak Jacob amanglawasdai ais yamninpa kidika awaskat ais yulninpa, kat witing sip-awasdai rahm kulna atnin kalyuyulwa kidika.

²⁷Kaunah witingna kalyuyulna kat José yaklauwi diyulna dai kidika bitik, dawak bik kar José yaklauwi sihna dai kidika witing kilwi kiuna atnin yulni, uba kulnin alasna kalahna.

²⁸Dawak yulna: “¡Yang walakibis José sangka kidika manah amanglanik aitani ki! Baisa dautasyang kau yawik talki.”