Read Mayangna Génesis 46 Bible Online

Génesis 46 - Mayangna bible

Génesis 46

¹Israel laih witing di duwa dai kidika bitik duwi ta yakat kalahwi kiuna. Beerseba yakat kiwi sakripais as yamna witing papangni Isaac Papangni yakat.

²Kidika puknita Israel yakat Papang yaklauwi yulkalbauna amana kapat kaupak, ayangni kau kalyulna, Jacob. Dawak witing biriwi nangnitlana: —Akat sakyang.

³Dawak Papang yaklauwi kalyulna: —Yang laih Papang yang, man papangma Papangni. Man Egipto yakat kiunin kidika yamaduwinih, kat kidika yakat man sulama balna kidika nisan nuhni yamna awaki.

⁴Yang man karak Egipto yakat yawaki, dawak yang lawik man sulama balna kidika Egipto kaupak yakki. Baisa minit yakat, man dauma kat José kidika man yaihmat yakat sakkarang.

⁵Usnit kat Jacob kidika Beerseba kaupak kalahwi kiuna. Israel walanibis balna yaklauwi witingna papangnina, walabis balna dawak yalnina balna kidika bitik Fero yaklauwi kar sihna kidika yakat ihilna duwi uina atnin.

⁶Jacob witing di duwa balna kidika bitik duwi kiuna Egipto yakat, dawak tuniruh yayal balna, sīpni balna, Canaán yakat witing di ampus duna balna dai kidika bitik.

⁷Witing walanbis ahal, yayal balna kidika, mani ahal dawak yayal balna kidika bitik duwi kiuna.

⁸Adika kuduh Israel balna Egipto yakat uina balna kidika ayangnina; yuldarang kat Jacob witing sulani balna: Rubén kidika laih Jacob walanibis barakni dai.

⁹Rubén walanbis balna: Hanoc, Falú, Hezrón, dawak Carmi.

¹⁰Simeón walanbis balna: Jemuel, Jamín, Ohad, Jaquín, Zohar dawak Saúl, bahang kidika balna laih cananeo yal as kat walanbis balna dai.

¹¹Leví walanbis balna: Gersón, Coat dawak Merari.

¹²Judá walanbis balna: Er, Onán, Sela, Fares dawak Zara. (Er dawak Onán balna laih Canaán yakat dadauna dai) Dawak Fares walanbis balna laih Hezrón dawak Hamul.

¹³Isacar walanbis balna: Tola, Fúa, Job dawak Simrón.

¹⁴Zabulón walanbis balna: Sered, Elón dawak Jahleel.

¹⁵Adika balna kuduh Lea yaklauwi Jacob yakat walanibis balna kalana dai kidika Padan-aram yakat bangdai kidik mani balna dai kidika yakat, dawak baisa minit yakat walanibis yal Dina kidika bik kalana dai. Witing sulani balna bitik kat muih 33 dai, ahal dawak yayal bitik.

¹⁶Gad walanibis balna: Zifión, Hagui, Ezbón, Suni, Eri, Arodi dawak Areli.

¹⁷Aser walanbis balna: Imna, Isúa, Isúi, Bería dawak witingna wirahnina yal kidika bik, ayangni laih Sera. Bería walanbis balna laih: Heber dawak Malquiel.

¹⁸Adika balna laih Zilpa walanbis balna Jacob yakat kalana dai kidika. Kidika yal laih Labán dini yamyang dai kat witing walanibis Lea yakat kalana dai kidika, bahang witing sulani balna kidika bitik kat 16 dai bitik kat.

¹⁹Raquel walanbis balna, Jacob yalni dai kidika: José dawak Benjamín.

²⁰José walanibis balna Asenat karak yakna dai kidika laih Manasés dawak Efraín, kidika balna laih Egipto yakat batahndadana dai, dawak Asenat laih Potifera walanbis yal dai, On sumalniyang.

²¹Benjamín walanbis balna: Bela, Bequer, Asbel, Gera, Naamán, Ehi, Ros, Mupim, Hupim dawak Ard.

²²Adika balna laih Raquel dawak Jacob karak walaninabis balna dai kidika, bitik kat muih 14 dai.

²³Dan walanbis: laih Husim.

²⁴Neftalí walanbis balna: Jahzeel, Guni, Gezer dawak Silem.

²⁵Adika balna Bilha walanbis balna Jacob yakat kalana dai kidika. Witing kidika laih Labán dini yamyang dai, kaunah walanibis yal Raquel yakat kalana dai, dawak sulani balna yakna kidika laih tiaskaubu dai bitik kat.

²⁶Jacob karak kalpakwi Egipto yakat uina muihni balna bitik kidika, dawak witing āni aslah balna kidika laih 66 dai, yalnina balna dawak walaninabis balna kidika laih banawi kulwasdai.

²⁷José walanbis balna laih bu dai Egipto yakat batahndadana dai kidika. Kaput laih Egipto yakat Jacob sulani balna 70 uiwi kakanadai.

²⁸Jacob yaklauwi sihna dai Judá kidika tatuna, witing wirahni José yakat kiwi kalyulwak Gosén pāni yakat kiwak kalpakna atnin. Gosén yakat uiwi kakawak,

²⁹José yaklauwi dipakna dai trukni kidika ridi yayamwak kiwi papangni talna atnin. Witing papangni muhni tani yakat kiwi yaklauwi wakaihna, dawak papangni salahni yakat nai kaidana.

³⁰Kaput laih Israel yaklauwi José yakat kalyulna: —Yang palni man yakat matalikda, man kidika sangka man, ¡bahang waralaih sipki daunik!

³¹José yaklauwi wirahni balna yakat diyulna dawak papangki sulani balna yakat bik: —Fero yakat kaltalna yawaki, dawak yul kidika kalyulna atnik. Yang kalyulki, yang wirahki balna dawak papangki wanaihni balna Canaán yakat yalalahwadai kidika aina yang karak yalahna atnin;

³²dawak duahaina sīpnina tuninaruh yayal balna bitik, witingna ais duwa dai kidika bitik duahaina, kat witing warknina laih sīp maintalnin dawak turuh satni balna kidika sasahwi.

³³Kaput laih Fero yaklauwi manayulwi dakawarang manna ais warkni yamtamanah manatarang kat,

³⁴manna kalyultanauh, manna laih sīp muhnin warkni manah yamtamana niningh, sihm muihmana bararak balna dai kapat. Kaput laih manna Gosén sauni yakat watta yalahtanama, kat Egipto muihni balna laih dutni kukulna ki sīp maintalyang balna karak yalahnin kidika.