Read Mayangna Génesis 47 Bible Online

Génesis 47 - Mayangna bible

Génesis 47

¹José witing Fero yakat kiwi kalyulna. Kalyulna, witing papangni, wirahni balna bitik Canaán kaupak aina, dawak Gosén sauni yakat bangki, sīpnina dawak tuninaruh balna karak, dawak di duduwa balna dai kidika bitik.

²Wirahni balna singka yakwi duwi kiuna Fero muhni yakat, witing talna atnin yulni.

³Kaput laih Fero yaklauwi José wirahni balna yakat diyulwi dakana: —¿Manna ais warkni yamtamanah? Dawak witingna yaklauwi nangnitlalana: —King man dima yamyang balna adika laih sīp maintalyang balna, sihm yangna muihkina bararak balna dai kapat.

⁴Adika sauni akat watna aiwanayangna, kat Canaán yakat laih uba yuh bahang, dawak bik sihrsihr diski tinglau balna kasninna. Kaput bahang king plisma man dima yamyang balna adika datang Gosén sauni yakat yalalahwang.

⁵Kaput laih Fero yaklauwi José yakat kalyulna: —Man papangma dawak wirahma balna bik man karak kalpaknin yulni aina.

⁶Egipto sauni kidika laih man tingma yakat ki. Gosén sauni kidika diatah, kidika laih tanit yamni ki adika sauni pas-akat, bahang kidika yakat watwi yalalahwang. Dawak man amanglataman kat, kidika balna pasyakat muih ahal sip balna kat yang tukiruh balna kidika witing tingni yakat atah.

⁷José witing papangni bik Fero yakat duwi kiunadai talna atnin yulni. Jacob witing rispik lani kau Fero yakat parasna dai,

⁸dawak Fero yaklauwi kalyulwi dakana: —¿Kurih yapak dutamahn?

⁹Dawak Jacob yaklauwi nangnitlana: —Kurih 130 dutayang, akauh yawik aiwik uinamanah. Bulah ki dawak bik kurih dutni manah ki, yang muihkibararak balna yalalahna kaput yang sip yalahdasyang.

¹⁰Usnit kat Jacob laih Fero kaupak dawi mahka kalahwi kiuna.

¹¹Dawak José yaklauwi sau tanit yamni kidika diana Egipto sauni yakat, kidika yakat witingna yalahna atnin yulni, Fero yaklauwi paknadai kaput. Kaput laih witing papangni dawak wirahni balna bik Ramsés sauni pīsni yakat sau duduna dai.

¹²Baisa kidika minit yakat José yaklauwi wanaihni balna bitik yak kasninna diawadai, witingna ampus dukih diawa yakat.

¹³Pa bitik kau plawar disdai, bahang yuh kidika baisa parasni kalnadai. Egipto yakat bik sihm Canaán kau kapat yuh dadauna.

¹⁴José witing lalah kidika bitik palni uduhna dai Egipto yakat dawak Canaán yakat bik, muih balna plawar bakakanna kidika, bahang kidika laih Fero ūni yakat apakna dai.

¹⁵Lalah bitik dis danadai Egipto yakat dawak Canaán yakat bik, dawak Egipto muihni balna kidika José yakat uiwi kalyuyulna: —¡Man di kasnin yanatah! Yamni-awaski yanadatang dautanaki kat, yuhkau, lalah disyangna kidika yulni.

¹⁶Dawak José yaklauwi nangnitnalana: —Lalah dismana kat tingmanalau duaitanauh, plawar karak wirihki.

¹⁷Egipto muihni balna kidika duwi uina, sīp, aras, turuh, biriku, José yakat, dawak biriwi plawar diana kidika kurihni bitik.

¹⁸Kaunah kidika kurihni bayakna, dawak kurih ūk kawakat, José yakat uiwi kalyuyulna: —Yangna sip maltik yultasyangna lalah dis yangna kidika; baisa kidika minit yakat tingkinalau balna bik man dina kalna. Yangna di ūk manik disyangna, kaunah yangna saukina dawak yangna muihkina nuhni manah laih.

¹⁹Man yangna muihkina nuhni adika yanabakantah, dawak yangna saukina bik, bahang kidika laih plawar minit. Fero dini yamyang awanaki, dawak yangna saukina yakat wark alahwanaki witing dini, man lawa diminik yanatang sangka awanaki kat, dawak sau kidika pini diswas karang. ¿Man aisyamta yanadatang dautanakiyah saukina karak?

²⁰Kaput laih José witing Egipto sauni kidika bitik bakanna dai Fero dini, kat Egipto muihni balna saunina kidika wauhwi bakakanna dai bahang, yuh lakna kidika yulni. Kaput laih sau kidika Fero parasni dinit yakat watnadai,

²¹dawak Egipto muihni balna laih muih dini yamyang kakalna dai[75] Egipto sauni bitik pasyakat.

²²José witing sau bakanwas dana kidika laih sumalyang balna saunina kamanah laih bakanwas danadai, kat Fero yaklauwi plawar diawadai bahang; kaput bahang witingna saunina kidika bakanwas dadana, kat Fero diawa yakaupak kakaswadai bahang.

²³Usnit kat José witing muih balna yakat diyulna: —Waralaih manna dawak saumana kidika bik Fero dinimana, kat yang lawik bakannayang bahang witing dini atnin. Akat di minik dutamana dahna atnamna,

²⁴kaunah fero yakat kalana atnamna ki sahyakna singka kidika, di minik yaktamana kidika kaupak, dawak ūk sahyakna arungka kidika laih dahnamna dawak manna kasnamna walamanabis balna karak, kaput bik manna karak yalalahwa balna bitik karak.

²⁵Dawak witingna biri nangnitlalana: —Man laih kulnam minikun talnin lani kidika dutaman yangna akat, kat sangkinaka laihta yaknaman bahang. ¡Yangna Fero dini yamyang awanaki!

²⁶Kaput laih José witing la as āna Egipto sauni bitik yakat, di minik balna kalahwa kidika kaupak sahyakna singka kidika Fero yakat kalana atnin. Kidika lani warmani kat banki; kaunah sumalyang balna laih di as bik minitlaunin-awas ki, kat witingna saunina balna kidika Fero dini kalwasdai bahang.

²⁷Israel balna kidika Egipto yakat watwi yalalahna. Gosén sauni kidika witingna duduna, dawak kidika pāni yakat witingna kalsahwi mahna dai.

²⁸Jacob witing Egipto yakat kurih 17 yalahna, dawak witing kurihni kidika laih 147 laihna dai.

²⁹Ma as kat Israel witing isning-aina, sirihni kat dauwarang kidika. Kaput laih witing walanibis José yakat kalyulwak kiwak kalyulna: —Rahm man, yang kulnik lani as yamnin kultaman kat, man tingma kidika barahkimak dinit yakat atah dawak pramis yamtah, yang mayulki kidika yamma. ¡Plisma, Egipto akat yanuwinih!

³⁰Yang mahka yawik muihkibararak balna karak kalpaktik wingkita puhki kat, Egipto akaupak yayakma witingna saunina ū yakat yaduyawa yanuma. —Kaput yamki —kalatna, José yaklauwi.

³¹—¡Papang ayangni kau yakta yayultah! —papangni kidika watwi kalyulna kaput. Dawak José yaklauwi kaput yamna, Israel witing pāni tunning kau yakat limbabahwi muhni sau kat lakna.