Read Mayangna Génesis 48 Bible Online

Génesis 48 - Mayangna bible

Génesis 48

¹Ma bulah bayakwak José yakat kalyuyulna, papangma siknis ki. Kaput laih José witing kiwi talna, dawak walanbis balna bu kidika duwi kiuna, Manasés dawak Efraín karak.

²Jacob yakat kalyuyulna, witing walanibis José kidika kaltalna kiuna, dawak witing ban traitalwi yaklauwi yalahna pa yakat.

³Dawak José yakat kalyulna: —Papang parasni nuhni duwa kidika yang akat lāih kalahna Luz tawanni nuhni yakat, Canaán sauni yak, dawak blisin yana

⁴adika yulni balna karak: ‘Talah, yang lawik yamtingkat walamabis mahni duma, dawak man sulama balna kidika nisan as kalna karang. Dawak baisa minit yakat, man sulama balna yakat diana awaki adika sauni. Bahang witingna nining yakat ban kaput atnin karang.’

⁵Man walambis balna Efraín dawak Manasés, witingna Egipto akat batahndadana kidika, yang adika sauni akat aiwik man karak kalpaktasyang tanit kauh, witingna kidika laih yang diki balna. Witingna kidika laih yang diki balna palni ki, sihm Rubén dawak Simeón kapat.

⁶Adika balna usnit yakat man walamabis ūk duma kidika laih man dima karang, Efraín dawak Manasés wirahni balna bahang witingna bik, dinina pahni balna kidika duduna karang.

⁷Yang Padan-aram kaupak nawattik aiwingkat, man nanangma Raquel kidika dauna Canaán yakat, Efrata yakat yawik āwasyang tanit kauh; dawak kidika yakat nunayang, Efrata tāni yakat, bahang waradika laih ayangni Belén.

⁸Dawak sirihni Israel kidika José walanbis balna yakat talna, kalyulwi dakana: —Dawak ¿adika wais balnayah?

⁹—Adika balna kuduh Papang yaklauwi yāna kidika Egipto akat —José yaklauwi kaput nangnitlana. Kaput laih papangni yaklauwi kalyulna: —Plisma, yaihkit akat duaitah, yang blisinki diana atnik.

¹⁰Israel kidika muihbarak palni bahang witing minikpa di yamni talwasdai, kaput bahang José witing walanbis balna kidika papangni yaihnit yakat duwi kiuna, dawak witing wakaihwi umna.

¹¹Usnit kat José yakat kalyulna: —Tahatasyang dai wattik matalnik kidika, kaput kaunah, Papang yaklauwi yana man walambis balna bik talna atnik.

¹²José witing walanbis balna kidika papangni kalasnimak kaupak dulauwi dawi limbabahwi muhni sau kat lakna.

¹³Usnit kat walabis kidika bupak duna, Efraín kidika tingni palni yak dawak Manasés kidika laih wadahni yakauh duna dawak papangni yaihnit yakat duwi kiuna. Kaput laih Efraín kidika Israel wadahni niningyakauh watna, dawak Manasés laih tingni palni niningyakauh watna.

¹⁴Kaunah Israel witing tingni yuna kidika biri biri lāwi yuna, bahang witing tingnipal kidika Efraín minit yakat yuna, bahang witing laih bin yakauh dai, dawak tingni wadahni kidika laih Manasés minit yakat yuna, witing kidika kauh barakni dai kaunah.

¹⁵Kaput laih José yakat aput blisin kalana: “Papang witing yakat yulni dakanamana kidika Abraham dawak Isaac, yang papangki balna, Papang yang akat mainyatalna kidika batahndanayang mani kaupak,

¹⁶dutni bitik kau yalaihwi yakwa innisal kidika, blisin diawang adika muihni ahal binina akat. Witingna munah yang ayangki adika isningkatna karang dawak yang papangki balna ayangnina bik, Abraham dawak Isaac. Walaninabis bik mahnin yayakna karang dawak sau akat muih mahni palni kalna karang.”

¹⁷Kaunah José witing dutni kaput talna witing papangni tingni palni kidika Efraín minit yakat yuna kidika; bahang kaput laih papangni tingni kidika laihna Efraín tunan minit kau yuna sakkidika yakwi walanibis Manasés tunan yakat ilna atnin,

¹⁸dawak aput yulna: —¡Dikah, papang kaput laih awaski! Adika laih barakni kidika ki. Man tingmapal kidika tunan yakat yutah.

¹⁹Kaunah papangni kaput yamnin kulwasdai, dawak witing yaklauwi kalyulna: —¡Amanglatayang, walakibis, amanglatayang! Witing bik nisan as nuhni kalkulna karang. Kaput kaunah witing wirahni binkauh kidika laih tanit karang ki, witing karak dawakat, dawak witing sulani balna kidika laih nisan manas kalalahna karang ki.

²⁰Kidika mani Jacob yaklauwi blisin diana adika yulni balna karak: —Israel tawanni kidika manna ayangmana kidika duna karang, blisin dianin karang kat, bahang aput yuyulwarang: ‘Papang man yakat yamna karang Efraín dawak Manasés kau yamna kaput.’ Israel yaklauwi kaput āna Efraín kidika Manasés tanit yakat.

²¹Usnit dawak José yakat kalyulna: —Talah, yang dauki ki; kaunah Papang manna karak karang, bahang witing yaklauwi yamwak watta muihmana bararak balna saunina yakat yawanama.

²²Man laih tanit manayang, wirahma balna karak dawakat: Siquem[76] kidika matayang, amorreo balna niningnakauh kalbautik dakyaknayang kidika.