Read Mayangna Génesis 7 Bible Online

Génesis 7 - Mayangna bible

Génesis 7

¹Usnit kat Dawan yaklauwi Noé yakat kalyulna: “Adika mani muihni balna pasyakat, man manah yang kulnik lani yamtaman. Kaput bahang kuring nuhni yakat awah man wanaihma balna bitik karak.

²Tinglau balna dawak asangpas dini balna pasyak maisihni dis balna kidika ahalmuk tiaskaubu dawak yayal tiaskaubu dutah, kaunah maisihni kulna balna kidika laih almuk as dawak yal as dutah.

³Di lawani balna satni paskaupak tiaskaubu dutah, alnimuk kauna, kaput laih dini balna kidika diswas atnin sau akat,

⁴kat man tiaskaubu laihwakat kalating waslauwarangki ma 40, dawak pukta 40. ¡Sau akaupak ustik yakki ki sangnika duwa balna bitik, yang lawik yamnayang balna kidika!”

⁵Dawak Dawan Noé yak ais yamnin kalyulna kidika bitik yamna.

⁶Sau yak was nuhni āna mani, Noé laih kurih 600 duwa dai.

⁷Dawak Noé kuring nuhni yakat kana yalni, unisah balna karak was nuhni kaiwa kidika kaupak nanitna daknin yulni.

⁸Tinglau dawak asangpas dini balna bik maisihni dis dawak maisihni balna, lawanina kau yaklauwa balna, dawak pasnina kau murwa balna bitik,

⁹Noé karak kalpakwi kuring nuhni yakat kakana, wanaihni karak bu, alnimuk dawak yalni karak, Papang yaklauwi yulna dai kaput.

¹⁰Ma tiaskaubu laihna yakat was nuhni kidika sau minit yakat banghilna.

¹¹Kidika laih waiku bu kidika kaupak ma 17 dai. Kaput laih Noé kurih 600 duwa dai. Kidika mani palni kuma nuhni dinit kau burhwi kalahwa kidika tutna dai, dawak makau kisang dūrni bik apahna dai.

¹²Madah 40 pukta 40 sau minit yak was kidika launa.

¹³Kidika mani yak Noé walanbis balna ahal Sem, Cam, dawi Jafet, maridni karak, dawak unisah yayal balna kidika karak kuring nuhni yak kakana.

¹⁴Witingna karak kakana tinglau balna, asang pas dini balna satni kidika bitik, pasnina kau mumurwa balna dawak uhu balna bik.

¹⁵Tinglau balna, dawak asangpas dini balna bitik Noé karak kuring nuhni yakat kakana, di balna bu libit.

¹⁶Alnimuk as dawak yalni as kakana, di satni balna bitik kaupak, Dawan yaklau Noé yakat pakna dai kaput, usnit kat Papang yaklauwi kuring nuhni dūrni kidika putna dai.

¹⁷Ma 40 waslauna. Was kidika bang-ilwa kat, kuring nuhni kidika dulauwak, was minit yakat uruhnna.

¹⁸Was kidika baisa bang-ilna, kaunah kuring nuhni kidika laih ban uruhnwa witdai.

¹⁹Was kidika nuhni palni bang-ilna bahang sau kat asang tanit nunuhni balna kidika bitik laih saramna dai;

²⁰asang balna kidika saramna usnit kat, baisa minit yakat metro 7 ilna dai.

²¹Kaput laih sau akat muih balna yalalahwa dai kidika bitik dadauna, di lawani balna bik tinglau balna, dawak asangpas dini balna, dawak pasnina kau mumurwa balna bik, sau yakat.

²²Sau yakat di bangdai kidika bitik, sangnika duwa balna dai kidika, yak-urupdinin sip balna dai kidika bitik dadauna.

²³Noé dawak kuring nuhni paskau bangdai kidika manah sangka yaklalana; ūk balna laih bitik dismukna: muih, tinglau balna, uhu balna, asangpas dini pasnina kau mumurwa balna bik;

²⁴kat sau was āna kidika laih ma 150 duwa sakdai bahang.