Read Mayangna Génesis 8 Bible Online

Génesis 8 - Mayangna bible

Génesis 8

¹Bahang Papang Noé yak isningkatna dawak kuring nuhni yak di balna bang dai kidika bitik. Dawak kalawak sau minit yakat wing kidika wauhna, dawak was kidika mahka kadana;

²kuma tuhni kau was burhwi kalahwa balna bik putna, kaput bik laih makau kisang dūrni bik putna. Waslauwa kidika dana,

³dawak was kidika mahka kadana tāni. Ma 150 laihwak, was kidika ban yaklakkiuna,

⁴waiku tiaskaubu laihwa kaupak ma 17 kat, kuring nuhni kidika Ararat asangni yakat kiwi watna.

⁵Was kidika baisa, kadawi yaklakna, waiku salap laihwak ma as yakat, sipdai talna atnin asang maluihni balna sutni kidika.

⁶Ma 40 laihwak usnit, Noé witing kuring nuhni yakat windar yamna dai kidika apahna,

⁷dawak kuma kupaniris kidika uluhna: dawak pini bahlwi awaihna, kiwi, kaiwi uina, tahana sau kidika buhlana atnin yulni.

⁸Kuma kupaniris uluhna usnit kat, Noé watwi buhtuku kat uluhna, witing talna atnin sau kidika uman buhlanapa;

⁹kaunah buhtuku kidika watwi nawatwi kaina kat ataknin pāni disdai bahang, kat sau kidika baisa minit yak was duwadai bahang, kaput laih Noé witing tingni yakwi buhtuku bin kidika laihwi kuring nuhni pasyak āna.

¹⁰Noé baisa tanit yakat ma 7 tahana dai, usnit kat watwi buhtuku kidika uluhpamwak kiuna.

¹¹Uman puklakwa yakat buhtuku kidika nawatwi kiuna, anani yak olib tingni rahni bin as duwi kiuna, kaput laih Noé kaldakawadai sau kidi buhlakwi.

¹²Baisa ma tiaskaubu tahana, dawak watwi buhtuku kidi sihna; kaunah buhtuku kidika watwi nawatwi kaiwas dana.

¹³Noé witing kurih 601 duwa kat sau kidika buhni kalnadai. Waiku tatuna kaupak ma tatuna yakat, Noé witing kuringni nuhni ūnibasta balna kidika yakmukna dai, dawak witing talna sau kidika buhlana dai.

¹⁴Waiku bu kaupak ma 27 laihwa yakat sau kidika uman buhlana dai yamni.

¹⁵Kaput laih Papang yaklauwi Noé yak kalyulna:

¹⁶“Kuring nuhni kaupak alahwah, yalma karak, walambis ahal balna dawak umasah yayal balna karak bik.

¹⁷Kaput bik di balna man karak bangdai kidika balna bitik yaktah: di lawani duwa balna, tinglau balna, pasnina kau sau yakat mumurwa balna kidika bik, dawak kidika balna bitik sau kau pa balna bitik yak uiwang, dawak mahni kalsahwi sau adika buhng dadawang.”

¹⁸Kaput laih Noé yalni, walanbis ahal balna, unisah yayal balna witingna bitik kuring nuhni paskaupak kalalahna.

¹⁹Kaput bik laih tinglau balna dawak asangpas dini balna bitik kalalahna, pasnina kau sau yakat mumurwa balna kidika dawak ma kau yaklauwi yayahlwa balna kidika bik.

²⁰Usnit kat Noé witing sakripais busnin pāni as yamna Dawan ayangni kau, dawak tinglau balna kaput bik di lawani duwa balna maisihni dis balna kidika satni balna kau yakwi Dawan yakat sakripais karauni kauna buswa kapatnah yamna.

²¹Dawan witing yakat walapni yamni kidika kiwak dakawi yulna: “Sau kidika wattik dutni kalyultas awaki, muih al dutni yamwa kidika yulni, kat muih al kidika wahma kaupak dutni yamnin manah kulwi. Kaput bik laih wattik tinglau balna dawak asangpas dini balna bik ītik distas awaki, waradika yamnayang kapat.

²²“Sau kidika ban karang mani, dahnin bik sakkarang dawak minik bahnin bik; sakkarang daihni dawak sanni bik, kaput bik sakkarang wasma dawak kurih bik madah dawak pukta bik sakkarang.”