Read Mayangna 2 Samuel 1 Bible Online

2 Samuel 1 - Mayangna bible

2 Samuel 1

¹Saúl dauwak usnit kat, Devid laih Siclag yakat nawatwi kiwi, amalecita balna yakat minitna bayak dawi, yakat ma bu watna dai.

²Ma bās laihwa yakat Saúl ūni labanni kaupak muih al as kiuna prakni bisna manah, dawak bik tunan yakat sau uhna dai, kulnin dalani wauhwa kidika yulni. Devid muhni yakat kiwi yaklauwi limbabahwi sau kat bukna risnipik nuhni duwa kidika yulni.

³Devid kalyulwi dakana: —¿Angkaupak aiwamahn? Al kidika yaklauwi kalyulna: —Israel balna ūnina labanni kaupak aiwayang irik lawik.

⁴—¿Bahang ais kalahnayah? ¡Yayultah! —Devid yaklauwi pakna kalyulna atnin. —Kalbauyang muihni balna kalbabauwak sip awas dawak kikirana, dawak bik manas dauna —al kidika yaklauwi kaput kalyulna— ¡Dawak Saúl bik dauna, walanibis Jonatán bik!

⁵—¿Amput amanglanamahn, Saúl dawak walanibis Jonatán bik dauna kidika? —Devid yaklauwi kalyulwi dakana, yul duaina muihni yakat.

⁶Al kidika yaklauwi nangnitlana: —Kidika yakat yang sakyang dai, Gilboa asangni yakat, dawak talnayang Saúl kidika langnisa kau taihwatna witkat, dawak waihnila balna kārnina kidika dangnit yakat laihnin manah dai.

⁷Kidika minitni yakat wiryaklawi yatalwi yuyulna yawana atnik witing yakat. Bahang yulwa yakat yamnayang dai.

⁸Usnitkat yuyulwi dakana, yang adika waisyangpa, dawak nangnitlanayang amalecita muihni as yang.

⁹Kaput laih yuyulna yaihnit yakat yawinik dawak īna atnik witing yakat kat uman kalsuhna dai, kaput kaunah baisa sangka dai.

¹⁰Kaput laih witing yaihnit yakat yawik īnayang, kat amanglanayang, bukna kidika kaupak baisa sangka atnin kidika sip-awas dai bahang. Usnitkat king paknin kidika tunan kaupak yaknayang, dawak tingni kau āwa dai kidika bik yaknayang, man akat duaina atnik, yang dakiwan.

¹¹Kaput laih Devid dawi witing karak aslah bangdai kidika balna bik asninana iswi bibisna kulninna dalani kukulwa kidika yulni.

¹²dawak kakaidana Saúl dawak walanibis Jonatán dauna kidika yulni bik, dawak israel balna sip-awas kalalahna dai kidika yulni bik, kalbauyang balna Dawan dini kidika, dawak maulahu kat yuh wawauhna dai.

¹³Usnit kat Devid yulwi dakana yul duaina muihni yakat: —¿Man angkaupakmahn? Kalyulna: —Yang laih amalecita muihni as yang.

¹⁴—¿Amputdata tingma dulaunamanh king niningkauh, Dawan yaklauwi walwi yakna dai kidika yakat? —Devid yaklau yulna,

¹⁵dawak alni balna as yulwak kaiwak yamnin pakna: —¡Yawa itah! Kaput laih amalecita yakat tuswi īna,

¹⁶Devid yulna: —Man dautaman kidika laih alas salahma yakat ki; man silp yulma yaknaman, king as Dawan yaklauwi walwi yakna muihni kat īna man kidika.

¹⁷Devid unbauwi kaidana Saúl dawak walanibis Jonatán karak dadauna kidika yulni,

¹⁸dawak pakna Judá muihni balna[1] yakat niningna kana atnin. Adika kaidana kidika ulna ki la kat wauhnitaya yakat:

¹⁹“¡Israel, alasmana yaksihni kidika kalina asangma balna yakat! ¡Kulninna dadasni duduwa dai kidika amput bubuknayah!

²⁰Gat yakat kalyulwinih, Ascalón tanipas balna yakat bik yuyulwinih, filisteo yayalni balna alasna dunin-awas yulni, dawak kulnin bitik alasna duwi sutninna-awas ki, Papang kau kulwas muihni balna kidika.

²¹“¡Manna mamatna yakat baisa buknin-awas ki, was dawak, diwas bik, kat Gilboa asangni yakat dadauna sauni[2] bahang! Yakat kalnina kau atatakna kalbauyang balna nanitna daknin kidika. Kidika yakat yaringni disna Saúl nanitdaknin dini duwa dai kidika.

²²“Saúl dawak Jonatán witingna kidika watwi aiwasdadana witingna isninaparah, sīninabang kidik susuihwas laih awas dai, ānina dawak salanina kalbauyang balna tanit kulninna dadasni kaupak.

²³“Saúl dawak Jonatán witingna balna kidika dalani kaldakakawa dai, sangka bik, dawak dauna kat bik, kaldak-kalalahwas dai. ¡Kau siririhni dai yakalnuh karak dawakat! ¡Baisa pararasni dai layan karak dawakat!

²⁴“¡Israel walanibis yayal balna, Saúl yulni aidanauh, asna pauni manah mana-awa dai, asna tanit yamni manah manawadai, dawak gol kau libitwi yaksihni yamna kidika bik!

²⁵¡Kulninna dadasni balna dai kidika amput bubuknayah, kalbaunin pāni yakat! ¡Jonatán laih dauna ki asangma balna tanit maluihni yakat!

²⁶“¡Kulnik kaidana ki man yulma, Jonatán, yang wirahki! ¡Damni ampus yang niking yakat yāyamnamandaih! Yang nikingkauh man dalani yatalaman dai kidika minit bayakna yal kau dalani talnin karak dawakat.

²⁷¡Kulninna dadasni duduwa balna dai kidika amput bubuknayah! ¡Kalbaunin dini balna dai kidika bahwi dis kalna!”