Read Mayangna 2 Samuel 10 Bible Online

2 Samuel 10 - Mayangna bible

2 Samuel 10

¹Ma as bayakwak Amonita kingnina Nahas kidika dauna, dawak kidika pāni yakat witing walanibis Hanún kidika king kana.

²Kaput laih Devid witing kulna, Nahas walanibis Hanún yakat bik sihm kaput yamni kalyamnin, Nahas kau yamni kalyamna dai kapat, kaput kulna kidika yulni kalbauyang tunan balna kidika yakwi sihna Hanún yakat kalyulna atnin witing papangni dauna kidika yulni witingna bik dalani kukulwi. Kauna Devid ahalni, kalbauyang balna tanina tuna kidika Amón balna saunina yakat uiwi kakawakat,

³Amón muihni balna taninatuna balna kidika yaklauwi, witingna kingnina yakat kalyuyulna: “¿King man kultaman rahm Devid yaklauwi man papangma dauna kidika yulni muih sihna kultamanh kulnam bukna kidika yulni? ¡Rahm palni kidika laih sipki witingna aina kidika laih tawan nuhni adika yakpakdi talnin, dawak usnit kat daukalpamna atnin!”

⁴Kaput laih Hanún yaklauwi pakna Devid muih sihna balna kidika laihna atnin, dawak kungninabas kidika papusdak karhna atnin, dawak asninana balna bik papusdak iswi bisna atnin, saranina kat. Usnit kat damukwak uina.

⁵Kidika Devid dakana kat, muih sihna tanitna kau uiwi kalpakna atnin, kat uba asalni pakna bahang, dawak dipapakwak Jericó yakat watna atnin, witingna kungninabas nanaiwa kat witingna sipkarang uina atnin.

⁶Amón muihni balna amanglalana witingna muih dudutni balna kidika Devid niningyakat, kaput bahang Bet-rehob dawak Soba pāni kidika balna kaupak sirio muihni kalbauyang balna kidika tausin 20 duduna lalah kau minitlauwi, dawak king Maaca kaupak muih 1,000 duduna, dawak Is-tob kaupak muih ahal tausin 12.

⁷Kaunah Devid dakawi witing Joab kidika yakwi sihna kalbauyang muihni balna bitik karak.

⁸Kaput laih Amón muihni balna kidika uiwi ridi kakalna tawan nuhni kiwi kawa yakat, dawak sirio muihni kalbauyang Soba dawak Rehob pāni kaupak balna kidika, kaput laih Is-tob dawak Maaca muihni kalbauyang balna kidika laih di dadahwa pāni yakat kalahwi uiwi panina duduna.

⁹Joab witing talwak muhnit kaupak dawak dangnit kaupak bik nining yakat kalbaunin yayamwak, Israel sulani tanit yayamni balna kidika yakwi sirio muihni kalbauyang balna yakat kalbaunin yakna.

¹⁰Kidika usnit yakat kalbauyang muihni ūk balna kidika laih witing wirahni Abisai tingni yakat dana, bahang witingna laih amonita muihni balna niningna yakat kalbauna atnin,

¹¹dawak kalyulna: “Siria balna kidika witingna kauh sip karang kat yang karak, man aiwa ilpki āwama, kidika awaskat amonita kidika witingna kauh sipkarang kat man karak dawak, yang yawik ilpma awaki.

¹²Kulnam dulautah, mayang manekisan yulni makulnik parasni yamdi kalbaudang, dawak bik mayang maPapangki tawanni nunuhni balna yulni bik. ¡Dawak Dawan yaklauwi yamna karang, witing amput yamni talwa yakat!”

¹³Joab witing kalbauyang ahalni balna karak kawi kiuna kalbauna atnin asiria balna niningna yakat, kaunah witingna kikirana.

¹⁴Amonita witingna tatalwak Siria muihni balna kidika kikirak, witingna bik Abisai niningkauh kikirana dawak tawan pasyakat kawi uina. Kaput laih Joab witingna niningna kauh kalbauwasdana dawak Jerusalén yakat nawatwi kiuna.

¹⁵Siria muihni balna kidika dakakawak Israel yaklauwi minitna bayakna atwak, watwi kalududuhna.

¹⁶Hadad-ezer yaklauwi Siria muihni balna Éufrates wasni nakaskau bangdai kidika duaina, bahang witingna laih Elam kat uiwi wawatna. Witingna taninatuna kidika laih Sobac dai, Hadad-ezer ahalni kalbauyang balna kidika taninatuna.

¹⁷Kaunah kidika yulni Devid yakat kalyuyulna, usnit kat witing yaklauwi Israel muihni kalbauyang balna bitik laih sihna, Jordán wasni kidika dakyaklawi Helam kat uina. Kidika Helam yakat Devid witing Siria muihni balna karak kalbabauna,

¹⁸kaunah witni kat Israel balna niningna kaupak kikirana, kat Devid yaklauwi īna kidika laih tausin manah 40 dai, bahang kidika muihni balna laih aras kau kilwi kalbabauwa balna dai, dawak kār kau kilwi uiwi kalbabauwa balna kidika laih 700 dai; dawak kidika minit yakat Devid yaklauwi Sobac yakat tusna dai, witing laih Siria muihni kalbauyang balna kidika taninatuna dai, kaput laih kidika yakat dauna.

¹⁹King balna Hadad-ezer karak aslah kalahna balna dai kidika witingna tatalwak, Israel balna yaklauwi minitna bayakwak, dawi witingna kulninna aslah yayamna Israel balna karak, dawak witingna tingnina dinit yakat bubukna. Kidika kaupak Siria muihni balna kidika yamaduduna Amón muihni balna yakat watwi ilp diana atnin kidika.