Read Mayangna 2 Samuel 13 Bible Online

2 Samuel 13 - Mayangna bible

2 Samuel 13

¹Devid walanbis Absalón, witing wirahni yal as duwa dai yal nuhni yamni dai, ayangni laih Tamar. Dawak sihm Devid walanbis al ūk as duwa dai ayangni Amnón, bahang witing yaklauwi wirahni yal yakat dukih kalana,

²bahang kidika yulni witing siknis kalahna dai, kat witing wirahni yal kidika baisa al as karak kalpakwas bahang, witing sip-awas dai di as kalyamna atnin.

³Kaunah Amnón witing kaltalyang yamni as duwa dai, bahang kidika laih alas yulwi lan dai dawak bik sip witing yakat alas kalyuyulwas dai, ayangni laih Jonadab, Simea walanbis, Devid wirahni.

⁴Ma as kat Jonadab yaklau kalyulwi dakana: —¿King walanbis tatuna ais mawih? ¿Ampadawak ma payahwi kiwa yakauna baisa dutni kaltamanh? ¿Sip yayultas awamayah? Dawak Amnón yaklauwi kalyulna: —Yang wirahki Absalón wirahni yal Tamar kidika dukih yāwi.

⁵Kaput laih Jonadab yaklauwi sumalna: —Pama yakat alangwa siknisman kapat yamtah. Papangma matalna kiwak kalyultah wirahma Tamar sihwak kaiwi di mabayahwang, dawak sihm kidika pāni yakat di lahwi mawang, dawak kaput laih man talma, dawak di mawa kidika kasma.

⁶Kaput laih Amnón kiwi kalangna pāni yakat dawak siknis kapat yamna. Dawak king kiwi kaltalwak aput kalyulna Amnón yaklauwi: —¡Plisma palni! Wirahki yal Tamar kidika kaiwi akat plawar kuruhna apis buswi yawang, dawak witing palni lakwi yawang.

⁷Bahang kaput laih Devid sihna dai Tamar kidika, dawak aput kalyulna: —Plisma palni, wirahma Amnón ūni yakat yawa di yamta kalatang kaswang.

⁸Tamar laih wirah Amnón ūni yakat kiwak, wirahni kidika laih kalangna tusdai. Dawak witing plawar duwi dawi laihwi buswi kalana;

⁹usnit kat busna pahnni kidika duwi lakwi kalawak Amnón kaskih kalawas dai, dawak dipakna muih bitik kidika kaupak kalahwi kiuna atnin.

¹⁰Muih bitik kalahdadawak, Tamar yak kalyulna: —Kasnik kidika payahtayang pāni akat duaita, man lakta yatah. Kaput laih Tamar witing plawar kuruhna busna balna kidika, wirahni Amnón payahwa yakat duwi kiwi kalana,

¹¹kaswangti yaihnit yakat duwi kiwak, witing yaklauwi laihwi aput kalyulna: —Wirahki yal aiwang malangwang mayang karak.

¹²Yal kidika yaklauwi kalyulna: —Dikah wirahki, yang riskipik dis yayamwinih, kat kaput yayamwas ki Israel akat. ¡Ayangni dutni kulna dini kidika yamwinih!

¹³¿Yang asalki karuk angkat yawakiyah? Dawak man namangyakat makulna karang Israel akat tapdadas as. Yang man kalma dinit yakat buktik yultayang, king karak yulbautah, witing dikahtas karang yang adika man dima atnik.

¹⁴Kaunah Amnón witing kalyulwa kidika dakawasdana, dawak Amnón kidika kau parasni bahang Tamar karak dawakat, parasni kau taihlakwi wahni dutwi duna.

¹⁵Usnit kat Amnón yaklauwi isning kau dutni kalkulna yal nining yakat; dalani kaltalna dai kidika karak minit bayak dutni kaltalna. Kaput bahang pakna: —Lawa mahka yawah.

¹⁶Tamar yaklauwi kalyulna: —¡Dikah wirahki, aisyamta waradika akaupak yakangyakmayah, kidika laih kau dutni karang waradika yang akat yayamtada kidika karak dawakat! Amnón yaklauwi kaldakawas dana;

¹⁷nawatkauh laih dini yamyang kidika kalyulwak kaiwak pakna: —¡Adika yalni akaupak yakpamta dūr yamni puttah!

¹⁸Dini yamyang kidika yaklauwi kangwi yakna ū kaupak, usnit kat dūr kidika yamni putna. Kaput dawak Tamar witing asnina yamni kat kānalikdai kidika, king walanibis yayal aldis balna kakawa prakni kidika,

¹⁹witing tunan yakat wan uhna, dawak prakni kana dai kidika bik iswi bisna, dawak tingni balna kidika tunan yakat ilwi dawi kiuna, kaidīnah tapas yakat.

²⁰Kaput laih wirah Absalón kalyulwi dakana: —¿Kaput bahang wirah Amnón yaklau mayamnayah? Adika yulni ap awah, yang wirahki, kat man wirahma al bahang. Kaunah adika yulni uba kulwi kalbauwinih. Tamar, witing kalruhmwi dadana bahang, wirahni Absalón ūni yakat watna dai.

²¹King Devid adika kalahna yulni balna bitik dakana kat, kulnin daukalna dai, kaunah walanbis Amnón yakat bilwasdana, kat walanibis tatuna bahang dalani talwa kidika yulni.[18]

²²Absalón laih witing di as bik kalyulwasdana Amnón yakat, kaunah witing kulnin yakat laih dutni kalkulwa dai wirahni yal Tamar yak risnipik dis kalyamna kidika yulni.

²³Kurih bu bayakwak, Absalón ahalni balna kidika Sīpnina butuni karhwa bangdai, Efraín tawanni yaihnit kau Baal-hazor yakat, dawak Absalón yaklauwi king walanibis balna kidika bitik yakat diyulna dai di kasna uina atnin witing ūni yakat.

²⁴Kaput bik king yakat kiwi kaltalwi, aput kalyulna: —Waradika yang ahal diki yamyang balna kidika sīp butuni karhwa bangbahang, king man dawak kalbauyang balna taninatuna balna dutaman kidika karak yawa man dima yamyang risnipik kalatang dakakih kalawi.

²⁵Kaunah king yaklauwi kalyulna: —Dikah, walakibis, yangna bitik laih sip-awaski yawinikna, kat uba lalah nuhni disnam-awas yulni. Absalón wat yulna kaunah, king witing kiwas dana, kaunah witing blisinni laih kalana dai.

²⁶Kaput dawak Absalón yulna: —Kaput sip-awas kat, king man wirahki Amnón kidika datang kiwang yangna karak. —¿Ampadawak dukih mawih wirahma Amnón kidika manna karak kiunin? —king yaklauwi yulwi dakana.

²⁷Kaunah Absalón wat yulna, dawak king yaklauwi kalawak Amnón dawak walanibis ūk balna bik kalpakwi uinin dai. Absalón laih kasnin alasnina as king balna kau yayamwa kapat as yamna dai,[19]

²⁸dawak dini yamyang balna yakat pakna dai: “Yamni talnama Amnón kidika wain wanisak tunan yakat kilwakat, dawak yang lawik itanauh manating kat itanama. Manna yamaduduwinih, kidika laih yang lawik paktayang yamna atnin. Kaput bahang manna yamaduduwinih kulnamna dulautanauh.”

²⁹Kaput laih Absalón yaklauwi yamnin yulna yakat, witing dini yamyang balna yaklauwi Amnón kidika ihina. Kaput laih king walanbis balna kidika bitik yaklauwi mahka muyulnina yakat kilwi kikirana.

³⁰Baisa tapas yakat uiwabangkat, Devid witing yul kalahwak dakana king walanibis balna laih bitik Absalón yaklauwi imukna, as bik yaklawas dana sangka.

³¹Kaput laih king yaklauwi prakni iswi bisna, kulnin dalani duwa kidika yulni, dawak sau yakat kalangna. Dawak yakat kalbauyang balna taninatuna balna kidika bitik laih asninana iswi bibisna;

³²kaunah Jonadab, Simea walanbis, Devid wirahni kidika yulna: —King kulwinih walambis balna bitik ihina. Amnón manah ihina, kat Absalón yaklauwi kaput yamnin kulna bahang, Amnón yaklauwi witing wirahni Tamar yakat laihwi dutni kalyamna dai kidika kaupak.

³³Kaput bahang king kulwinih walambis balna bitik dadauna. Amnón manah dauna.

³⁴Kaput laih Absalón kalahwi kirana, dawak makau kilwi talwasak muihni kidika talwa Horonaim tani yakat kaiwa kidika munah asangpas kaupak muih mahni yaklakwi aina. Dawak makau kilwi talwasak dai kidika kiwi king yakat kalyulna, witing talna Horonaim tani munah muih mahni aiwak talna.[20]

³⁵Dawak Jonadab yaklauwi king yakat kalyulna: —King walambis balna aiwi, man dima yamyang kulna dai kaput.

³⁶Witing yulwi dahn dawa minitni yakat king walanibis balna uiwi kawi parasni sarahwi kakaidana. King dawak kalbauyang balna taninatuna balna bitik kakaidana kasak palni.

³⁷Absalón laih kirana, Gesur kingni Amiud walanbis Talmai karak kalpakwi, dawak kidika yakat kurih bās sakdai. Devid laih ma kaiwa kidika bitik yakat kaidadai walanbis Amnón dauna kidika yulni,

³⁹dauna yulni kaida dai kidika kaupak isninglak dana kat, witing talkih kalana dai walanibis Absalón kidika.