Read Mayangna 2 Samuel 15 Bible Online

2 Samuel 15 - Mayangna bible

2 Samuel 15

¹Ma as bayakwakat, Absalón witing yakna dai war kalbaunin kārni as, dawak aras bik, kaput laih kalbauyang muihni balna 50 uduhna dai witing palni ahalni balna.

²Mapiris palni yaklauwi ta kung yakat wawatwa dai, tawan nuhni kiwi kawa yakat, muih bitik uiwa kidika king yakat lanina yamna atnin, yulni, witing kalbibilna karang kat yulni, witingna yaklauwi yulwak uiwak diyulwi dakawa dai witing kidika angdika tawanni kaupak kaiwapa. Witingna kidika Israel sulani mayang atwarang kat,

³Absalón yaklauwi diyulwa dai: “Rahm palni laih man yultaman kidika aitani ki, kaunah king yaklauwi muih as bik awaski lama yamna atnin kidika.”

⁴Dawak baisa minityakat lakwi yulna: “¡Adika sauni akat wihtayang kat laih, muih balna lanina yamnin manas duduwa kidika aiwak la kat lanina yamtitikdai!”

⁵Muih as witing yaihnit yakat kiwi kalparaswarang kat, Absalón yaklauwi wakaihwi kalparaswi muhni yakat umwādai.

⁶Adika yamwa kidik laih Israel muihni balna bitik king yakat uiwa kidika lanina kidika laihwi yamwi diana atnin yulni. Kaput yamwi Israel balna kulninna kidika laihwa dai.

⁷Kurih arungka[22] bayakwakat, Absalón yaklauwi king yakat kalyulna: —King, kalma dinit yakat buktik yultayang, yadatang kat Hebrón yakat yawik Dawan kau pramis kalyamna yang kidika yamkuh.

⁸King man dima yamyang adika Siria sauni Gesur pāni yakat yalahtayang kat, Dawan yakat pramis yamnayang dai, witing yaklauwi watwi yāwak Jerusalén yakat yawaki kat, witing yakat prinias as yamki.

⁹King yaklauwi kalyulna: —Ismanglak yawah. Kaput laih Absalón kidika Hebrón yakat kiuna.

¹⁰Kaunah mahka laih yul sihwa dai Israel sulani balna bitik yakat: “Manna trumpit puhwak dakanamakat, manna yultanama Absalón laih Hebrón yakat king ahana.”

¹¹Baisa minit yakat Jerusalén kaupak muih 200 kapat yulwi dukiuna dai, kidika balna laih uina dai kulninna yamni karak, di kalahwa kidika amanglalawas dai.

¹²Kaput bik laih, Absalón yaklauwi Devid yaihnit kau lā sumalyang balna duwa dai kidika yulwi dukiuna dai, ayangni laih Ahitofel, witing laih Gilo tawanni nuhni yakat yalahwa dai, kaput laih witing sakripais buswarang kidika yaihnit yakat atnin. Kaput laih witingna niningkauh yaklaunin yulni aslah kalalahna kidika baisa parasni duna dai, dawak bik Absalón usnit uiyang balna kidika bik baisa mahni kalalahna dai.

¹³Yul muryang as kiwi Devid yakat kalyulna, Israel balna laih Absalón yakat wiryaklawa bangki.

¹⁴Kaput laih Devid yaklauwi yaihnitkau kalbauyang tunan muihni balna duwasak dai yakat diyulna: —¡Warmani mahka maīrang, kidika awas karang kat Absalón tingni kaupak sip maīri malawas karang! ¡Bainah yamtanauh, kidika awaskat mailaihwarang, dawak dutni maiyamwi mai-ihiwarang bitik kau tawan nuhni pas-akat!

¹⁵Dawak witingna yaklauwi king yakat nangnitlalana: —Yangna laih king man ais yulma kidika yamnikna manah bangyangna.

¹⁶Kaput laih, king witing ūni kau muih bangdai kidika bitik kalpakwi kalahwi uina, kaunah witing yalni binina balna kidika 10 dawi kalahwi kiuna dai, ūni kidika maintalnin yulni.

¹⁷King witing mahka kalahwi kiuna usnit kat witing karak bangkidika muihni balna karak, uiwi minit as wawatna, tawan nuhni kung kau, witni palni kau ū sakkidika yakat.

¹⁸Witing yaihnit yakat uina, kalbauyang taninatuna balna dai kidika bitik, kaput bik laih cereteo dawak peleteo king witing palni duwa sakdai kidika kalbauyang, dawak kaput bik laih geteo balna 600 balna Gat kaupak usnit uiwi aina dai kidika witing tanit yakat kalpaparna.

¹⁹Kidika minitni yakat king yaklauwi Itai, Gad kaupak dai yakat kalyulna: —¿Ais yamta man bik yangna karak aiwanamahn? Tanit yamni ki, man nawatta yawama kat king wisam yakarak atnam, kat witni kat man laih tringsar, pama kaupak malaihwi duahaina bahang.

²⁰Damai mani aiwanaman, dawak waradika ¿amput yang lawik mayulkiyah, yangna karak aiwah, dawak yang palni bik amanglatasyang angkat yawayangpa? Tanit yamniki nawatta yawama kat, dawak pa aslah muihni mana balna kidika duta yawama kat. ¡Dawan yaklauwi blis mayamwarang dawak witing mankarak karang ban kaput!

²¹Itai yaklauwi king yakat nangnitlana: —Dawan ayangni dawak king man ayangma bik yaktik yultayang, king man kidika angkat sak-awama kat, sangka atnin kidika awaskat daunin karang bik, man dima yamyang muihni adika yakat sakkarang.

²²Devid yaklauwi kalyulna: —Kaput kat yangna karak aiwah. Kaput laih Itai kidika Devid karak kiuna, muih ahal duwa balna bitik dawak, muih balna witing karak balna kidika bitik.

²³Muih bitik laih tapalhni palni kakaida dai. Dawak Cedrón wasni kidika dakyaklalana; kidika usnit kat king kidika dakyaklana, dawak muih bitik laih witing tanit yakat uina kauhmak wanilang tani kiwa kidika yakat.

²⁴Dawak Sadoc bik libait balna kidika bitik karak kalpakwi kiuna, bahang kidika balna laih Papang baksni kidika duwi uina, dawak kaput bik laih Abiatar yaihnit yakat[23] dadana, tawan nuhni kaupak muih balna kidika bitik kalahna usnit kat.

²⁵Kaunah king yaklauwi Sadoc yakat kalyulna: —Papang baksni kidika watta nawatta tawan nuhni yakat duyawah, Dawan yang ilpki yamna karang kat, yamwak nawattik aiwaki, dawakat kaput laih baksni kidika pāni yakat ban tuskat talki.

²⁶Kaunah witing yamni talasyang yatarang kat, yang witing tingni yakat yang, akat, witing amput yamni talwa yakat yayamna karang.

²⁷Dawak bik, king watwi sumalyang Sadoc yakat kalyulna: —Talah, man dawak Abiatar karak manna nawatta yawanauh tawan nuhni yakat, manna walamanabis bu kidika karak. Man walamabis Ahimaas, dawak Abiatar laih walanibis Jonatán karak.

²⁸Dawak yang laih kauhmak wanilang langni yakat watki, manna ais yul kalahwa kidika yasihtanama kat.

²⁹Sadoc dawak Abiatar karak watwi Papang baksni kidika nawatwi Jerusalén yakat duwi uina, dawak yakat wawatna.

³⁰Devid witing kilwi kiuna Olib asangni yakat; witing kalpas manah kaidīnah kilwi kiuna, witing tunan mukwi dawi kiuna, dalani wauhwa kidika yulni. Dawak muih balna bitik witing karak kalpakwi uina kidika balna bik tunanina mukwi kaidīnah kilwi uina.

³¹Dawak Devid yakat kalyuyulna Ahitofel bik Absalón karak kalpakwi witing niningyakat yaklauna kalatwak, Devid witing Dawan kalni dinit yakat bukwi yulna, Ahitofel witing warkni balna kidika dauh yamna atnin.

³²Devid, witing asangtuna yakat kilwi yaklana, kidika yakat Papang kau ayangni nuhni yayamwa dai, kidika yakat Husai Devid niningkauh kalahna, bahang witing laih arquita sulani kaupak dai, bahang witing asnina iswi bisna dawi tunan yakat sau uhna dai.

³³Devid yaklauwi kalyulna: —Yang karak aiwama kat, yang truknik tikini as awama;

³⁴kaunah Jerusalén yakat yawama Absalón yakat kalyulma: ‘King adika man dima yamyang adika, man dima yamwarang, muhnilau man papangma dini yamwa dai kapat’, kaput laih Ahitofel yamnin kulwa balna kidika dauh yampamma,

³⁵kat kidika yakat tingmasut lalaihwarang sumalyang balna Sadoc dawak Abiatar karak. Kaput bahang man king ūni yakat ais yul dakaman balna kidika witingna yakat diyulma.

³⁶Witingna walanibis Ahimaas dawak Jonatán balna bik yakat rauki, kaput bahang, aiskat witingna munah ising paktanama, yul balna dakanama kidika bitik.

³⁷Dawak Husai, Devid karak kaltalyang yamni dai kidika, Jerusalén yakat kiuna, bahang kidika minitni yakat Absalón bik Jerusalén tawanni nuhni yakat kiwi kawa dai.