Read Mayangna 2 Samuel 16 Bible Online

2 Samuel 16 - Mayangna bible

2 Samuel 16

¹Devid kidika asangtuna yakat kiwi kilwi apis tanit yakat bayakwi kiuna kat, Siba, Mefi-boset dini yamyang kidika tanipas yakat kalahna. Bahang witing laih dukiwalik dai biriku bu di ilwi, plawar busna 200, plawar busna kapat kidika, wain minik dawak pasas karak busna kidika 100, dawak di minik balna mani kat bahna kidika 100, dawak wain di unitak as.

²King yaklauwi kalyulwi dakana: —¿Adika ainin duaitaman? Dawak Siba yaklauwi nangnitlana: —Biriku balna adika laih, king wanaihni balna kilna atnin; plawar busna dawak di minik balna adika laih kalbauyang muihni balna kidika kakaswang, dawak wain wasni kidika laih kauhmak wanilang yakat lapapakwak disuhwak didiwang.

³—¿Damawan mani dai kidika angkat sakyah? —king yaklauwi kalyulwi dakana. Siba yaklauwi kalyulna: —Jerusalén yakat watna, kat witing kulwi waradika Israel muihni balna yaklauwi king kanin lani kidika witing yakat kalalawarang, kidika laih witing kukungni kau kanin dai bahang.

⁴—Kaputkat yamni ki —king yaklauwi kaput nangnitlana—, waradika laih man dima, muhnilau Mefi-boset dini dai kidika. —¡Yamnikitdai, kaput king ilpma kidika ban yangkarak dai katlaih! —Siba kaput yulna, king muhni tani yakat abuk dawi.

⁵King Devid kidika Bahurim pāni yakat kiwi kana kat, Saúl sulani kaupak as kalahna dai. Kidika laih Gera walanibis dai, ayangni laih Simei, bahang king yakat dutni kalyulwinah kiuna

⁶dawak kipala bik ruhmwina kiuna Devid niningyakat dawak kalbauyang balna taninatuna balna yakat bik; kaunah king kidika awaihdak duwi uina kalbauyang tunan muihni balna, dawak muih as balna kidika bik.

⁷Simei, yaklauwi aput dutni kalyulna dai: —¡Akaupak naikau yawah, muih dutni, muih iyang!

⁸¡Dawan yaklauwi wah mawi, di dutni yamnaman balna kidika yulni, Saúl sulani balna niningna yakat, witingna panina yakat king āwanam yulni! ¡Waradika laih Dawan yaklauwi king āwaman kidika walamabis Absalón yakat kalana, kidika bahang akat sakman, man alas dutma yulni, kat man laih satuk awasman muih iyangman!

⁹Kaput dawak Sarvia walanibis Abisai yaklauwi king yakat kalyulna: —¿Amput dawak sul dauna as adika kingman yakat dutni mayulwarangyah? ¡Warminitni tunan dakki!

¹⁰Kaunah king yaklauwi nangnitlana: —Adika laih manna yamnamna dini awaski, Sarvia walanibis. Witing dutni yayulwa kidika laih sipki Dawan yaklauwi pakna atnin. Kaput karangkat, ¿wais sipyah witing yakat kalyulna atnin yamwa kidika yulni?

¹¹Usnit kat, Abisai dawak kalbauyang muihni balna tanina tuna bitik yakat diyulna: —Yang alas walakibis kat bik sangkika disnin kulwa kat, ¡baisa ampus kulwarangyah Benjamín sulani balna kaupak! ¡Datanangkat dutni yayulwang, sipki Dawan yaklauwi pakna!

¹²Sipkat, yang kulnik bukna kidika Dawan talwarang kat, blisin yasihwarang, dutni yasihnin dai pāni yakat, warmani yang dakayang kidika.

¹³Devid dawak ahalni balna karak mahka tanitna yakat bayakwi uina, dawak Simei laih asang labani munah kiuna, Devid yaihnit us, dutni kalyulwīna, kipala ruhmwīnah, sau yahamni dulauwi ban kiuna dai.

¹⁴King dawak yaihnitkau muih balna uiwabang dai kidika Jordán wasni yakat[24] uiwi bubukna, uba disuhna dai, bahang yakat witingna wingninata pupuhna.

¹⁵Absalón laih Jerusalén yakat kiwi kana, Israel balna karak kalpakwi, dawak Ahitofel karak bik aslah kalpakwi.

¹⁶Husai arquita kidika Devid karak kaltalyang yamni dai kidika, kalahwi kiuna Absalón niningyakat parasni sarahwinah: —¡King sangka ki, king sangka ki!

¹⁷Kaput laih Absalón kalyulwi dakana: —¿Adika kaput man barangni manh kaltalyang yamni mana kidika niningyakat? ¿Ais yamta witing karak yawas danamanh?

¹⁸—Sip awasyang —kalatna Husai yaklauwi—, kat yang sak-atnik ki Dawan yaklauwi dawak israel balna bitik yaklauwi āna kidika muihni karak.

¹⁹Dawak bu yakat laih, muih as dini yamnik karang kat kidika laih yang kaltalyang yamni yangna kidika walanibis yakat atnin karangki. Kaput bahang king man dima yamki ki, sihm papangma kau dini yamnayang dai kapat.

²⁰Kidika kaupak nai dawakat Absalón yaklauwi Ahitofel yakat kalyulwi dakana: —¿Ais lani yultamanah mayang yamna atnin?

²¹Ahitofel yaklauwi Absalón yakat nangnitlana: —Man papangma yalni binina balna karak alangwah, witing ūni maintalnin dawi kiuna balna kidika karak. Kaput laih, Israel balna bitik amanglalana karang man kidika papangma niningyakat dutni kultaman kidika, dawakat kaput laih man usmat uiyang muihni balna kidika baisa kulninna yaklauwarang.

²²Kaput laih ū tuna yakat ū labanni as yamwi kalalana dai Absalón yakat, bahang kidika pāni yakat papangni ialni balna kidika karak kalalangna dai, Israel balna bitik miniknapa tani yakat.

²³Kidika mani Ahitofel yakat yul as kalyulwi dakanin kidika laih sihm Papang yulnikat yulwi dakanin kapat dai. Ahitofel kidika kaput nuhni kalkulna dai, Devid niningkauh bik dawak Absalón niningkauh bik.