Read Mayangna 2 Samuel 17 Bible Online

2 Samuel 17 - Mayangna bible

2 Samuel 17

¹Usnit dawak, Ahitofel yaklauwi Absalón yakat kalyulna: —Yadatangkat, ahal tausin 12 walyaktik dukuh, dawak sihm adika puknita alahwik Devid yakat uitik yawaki.

²Dawak witing kidik kalsuhna parasni dis dana kat, minit yakat yawik buktik bilnilauki, bahang kaput laih muih balna witing karak bangkidika balna kikirana karang. Dawakat king kidika manah iki,

³dawak kidika usnitkat yamtingkat tawan muih balna kidika bitik man karak watwi yamni kalahna karang, sihm yal wisam palni kalduduna kat alni karak aslah kalalahwa kapat. Man waltaman kidika laih al aslah inin;[25] dawakat tawan bitik laih kulninna aslah kalalahwarang.

⁴Absalón niningyakat kidika yulni yamni kapat dai, dawakat Israel tanituna balna bitik niningna yakat bik.

⁵Kaunah Absalón yaklauwi pakna dai Husai arquita muihni bik yuyulwak kiuna atnin, dawak witing bik ais yulwak dakana atnin.

⁶Husai kidika Absalón muhni yakat kiwi yaklauwakat, witing aput kalyulna: —Ahitofel yamnin kulwa kidika laih adika ki. ¿Mayang yamdarangyah, kidika awaskat yamdas karangyah? Man kultaman kidika maiyultah.

⁷Husai yaklauwi nangnitlana: —Waradika laih Ahitofel yamnin kulwa kidika laih sip awaski.

⁸Man yamni amanglataman, papangma dawak usnit uiyang balna kidika laih uba kulninna dadasni ki, waradika palni laih anna bangkapat ki, sihm nawah as walanibis dakyayakna kapat. Baisa minit yakat papangma laih al as wār kalbauyang ki, bahang pukta adika witing sip muih as balna karak payahwas ki.

⁹Warminitni palni sipki pa sulihni kau yakmaldana atnin, kidika awaskat pa ūk kau bik. Dawakat ūk yakat talmakat, mahka kalbabauwakat, man usmat uiyang balna kidika as bubukna atwak dakakawarang kat, muih ūk balna kidika kukulwarang man usmat uiyang balna kidika sip-awas kalalahna,

¹⁰dawak tanit kulnin dadasni karang bik, layan kapat anyang karang bik, kulnin kidika saukat bukwarang, kat Israel muihni balna kidika bitik amanglalawi man papangma, dawakat usnit uiyang balna kidika laih muih ahal kulninna dadasniki.

¹¹Waralaih yang man yakat masumaltayang Israel balna kidika bitik uduhta, Dan kaupak Beerseba kat, kidika laih muih mahni ki sihm kumakung kau kauhmak kapat ki, dawakat man palni lawa tatuna duma kalbaunin kidika.

¹²Kaput laih man papangma minit yakat bukdarang angdika pāni yakat sakkarang bik. Witing minit yakat bukdarang sihm diwas sau minit yakat bukwa kapat, dawak muih as bik sangka yaklawas karang, papangma dawakat usnit uiyang balna kidika bik.

¹³Tawan nuhni as kau kawi yakmaldarang karang bik, Israel balna bitik laih wah duwi mawarang, dawak kidika tawanni nuhni kinipala duwa kidik as muryakdarang waspa yakat manah, kaput laih kidika pāni kipala as bik watwas karang.

¹⁴Absalón dawak Israel balna bitik laih yamni tatalna Husai kulnin lani kidika dawak Ahitofel kulnin lani kidika karak dawakat. (Dawak Dawan yaklauwi kaput yamna dai bahang Ahitofel yamnin kulwa kidika dauh yamna atnin yulni, dawak kaput bik laih Absalón minit yakat dutni duaina atnin yulni.)

¹⁵Usnitkat, Husai yaklauwi sumalyang Sadoc dawak Abiatar balna yakat diyulna dai, Ahitofel yaklauwi Absalón dawak Israel balna yakat disumalna dai kidika yulni, dawak kaput bik diyulna dai witing yaklauwi sumalna dai kidika yulni bik,

¹⁶kidika laih sirihni palni Devid yakat kalyulna atnin yulni, dawak witing baisa kauhmak wanilang langni yakat payahna atnin-awas yulni kidika puknita, kaunah dakyaklana atnin rahm palni Jordán wasni kidika, kaput laih witing yakat bik dawak muih ahal witing karak bangkidika yakat bik inin-awas yulni.

¹⁷Jonatán dawak Ahimaas, witingna kidika En-rogel pāni yakat raubahang, witingna dadawak muih balna ditatalwak dutni yakat buknin-awas kukulna, kaput laih muih dinina yamyang as papakwak kiri kiwi diyulna, dawak kidika minitni yakat witingna kalahwi kiri uina Devid yakat isning papakna atnin.

¹⁸Kaput kaunah, muih albin as talna bahang kiwi Absalón yakat kalyulna. Dawakat witingna sirihni palni uiwi kaltalyang as ūnikau uiwi kakana dai Bahurim yakat, dawak watakni yakat waspani kuhrna as sakkat kidika pasyakat kakana.

¹⁹Dawak kaput laih ū dawan yalni kidika yaklauwi pāni kungnimak kidika putna dawak minit yakat di minik balna uhwi rana. Bahang kidika dini muih as bik amanglawas dana dai.

²⁰Absalón usnit uiyang balna kidika uiwi kawi yal yakat kalyulwi dakakana: —¿Angkat rauyah, Ahimaas dawak Jonatán kidika? —Akūt aiwi bayayakna, waspa nining yakat —kaput yal kidika yaklauwi diyulna. Kaput laih Absalón usnit uiyang balna kidika walwi uina kidika ahalni balna yakat, kaunah yakwas dawi nawatwi Jerusalén yakat uina dai.

²¹Kidika balna uiwak usnit kat Ahimaas dawak Jonatán karak pa kuhrna kaupak kalahwi kiri uina, king Devid yakat isning pakna atnin; bahang uiwi kalyuyulna yaklauwi was kidika dakyaklana atnin, kat Ahitofel yaklauwi diyulna dai bahang uiwi kalbauna atnin.

²²Kaput laih Devid dawak muih ūk balna witing karak bangkidika bitik yaklauwi Jordán wasni kidika dakyaklalana. Payahlawak muih bitik laih uman dakyaklalana dai as bik laih dakyaklawas awas dai.

²³Ahitofel witing talwak, amput yamnin diyulna yakat yayamwas kat, yaklauwi biriniku dangni di lakwi dawi kilwi mahka ūni kau kiuna, witing batahndana sauni yakat, bahang kaput laih sulani balna dinina as barangni yamwi dawi usnit kat wahkau dinimak sitwi dauna. Witing kaput dauna, dawakat papangni nununa pāni yakat nununa dai.

²⁴Devid Mahanaim pāni yakat kiwikawakat, Absalón kidika laih Israel balna bitik kalpakwi Jordán wasni kidika dakyakalawa bangdai.

²⁵Absalón yaklauwi Amasa kidika kalbauyang balna taninatuna nuhni āna dai, Joab pāni yakat. Amasa kidika laih ismaelita muihni[26] as walanibis dai, ayangni laih Itra, witing laih Abigail karak mani as kat wahnina dutwi kalduduna dai dawak Abigail laih Nahas walanibis yal dai, Sarvia wirahni yal, dawak Joab nanangni.

²⁶Absalón kidika Israel muihni balna karak kiwi wawatna dai Galaad sauni yakat

²⁷dawak Devid kidika Mahanaim yakat kiwi kawak, Nahas walanibis Sobi kalahwi niningkauh kiwi kalpakna dai, Nahas kidika laih Rabá dawak Amón pāni kaupak dai; dawak Maquir, Amiel walanibis, witing laih Lodebar kaupak dai; dawak Barzilai laih Galaad sauni kau Rogelim pāni kaupak dai.

²⁸Dawak duwi uiwi kalalana dai kalangnin pāni, dilakwi kasnin dini, sau subani binina, dawak di ūk bik uiwi kalalana dai, plawar minik, cebada, plawar, sinak satni balna, diminik bukulna balna bik,

²⁹amak, cuajada, turuhtawas dadasna, kuts taniwas dadasna, Devid kasna atnin, dawak witing karak bang-kidika muihni balna bik; witingna kukulna kidika laih, kauhmak wanilang kaupak aiwa bahang witingna disuhlakna dawak bik yuh dadauna, dawak was bik dikih diawi.