Read Mayangna 2 Samuel 2 Bible Online

2 Samuel 2 - Mayangna bible

2 Samuel 2

¹Adika usnitkat, Devid yaklauwi kalyulwi dakana Dawan yakat dawak kalyulna: —¿Judá tawanni nunuhni balna yakat yawinikyah? Dawan yaklauwi nangnitlana: —Agha, yawanam ki. Kaput dawak Devid yulwi dakana: —¿Angkat yawinikyah? Dawan yaklauwi nangnitlana: —Hebrón yakat.

²Devid yakat kiuna yalni balna bupak duwi: Ahinoam Jezreel tawanni kaupak dai kidika, dawak Abigail Nabal tingnimak, Carmel pāni kaupak dai kidika.

³Yaihnitkau ahal duwasak dai kidika bik duwi kiuna walaninabis balna bitik, dawak Hebrón tawanni nunuhni balna yakat watwi panina duduna.

⁴Usnit kat Judá ahalni balna uiwi, dawak Devid kidika Papang dini yayakna, Judá kingni kapat atnin. Devid yakat kalyuyulna Galaad kau Jabes muihni balna yaklauwi Saúl kidika nununa.

⁵Devid muih yakwi sihna aput diyulna atnin: “Dawan yaklauwi yamni manayamna karang, Saúl yakat yamni kalyamna mana kidika yulni, manna damanawan, nunamana kidika.

⁶Dawan yaklauwi manna yakat dalani manatalna karang, dawak barangni lani karak bik. Yang niking kauh laih yamni manayamki, manna yamni yayamna mana kidika yulni.

⁷Kaunah, waralaih manna parasmana dutanauh, dawak bik kulnamna dadasni bik dutanauh; manna damanawan Saúl dauna kaunah, Judá muihni balna yaklauwi Papang dini yayayakna, yang manna kingmana atnik.”

⁸Kaunah Ner walanibis Abner, Saúl kalbauyang muihni balna duwa dai kidika taninatuna nuhni, yaklauwi Saúl walanibis Is-boset[3] yakat laih duwi kiuna Mahanaim pāni yakat,

⁹bahang kidika yakat dukiwi Galaad, Gesuri, Jezreel, Efraín, Benjamín, dawak Israel kidika balna bitik kingni āna dai.

¹⁰Is-boset kidika mahka Israel yakat king kana kat, witing kurihni 40 duwa dai, dawak kaput laih kurih bu king kana. Kaunah Judá muihni balna laih Devid yakauh king kalkukulna dai,

¹¹kaput laih Devid kidik Judá kingni dai kurih tiaskaubu, minitkau waiku tiaskaubu, dawak witing king kana tawanni nuhni dai kidika laih Hebrón.

¹²Abner kidika Mahanaim kaupak kalahwi Gabaón yakat kiuna, Is-boset ahalni kalbauyang taninatuna kawi.

¹³Sarvia walanibis Joab laih, Devid ahalni kalbauyang balna karak Hebrón kaupak kalahwi uiwi kalpapakna Gabaón kau was lalaihwa pāni dai yakat. Bahang witingna mahka panina duduna was laihwa pāni yakat, uduhna as kidika was nakas yakat bangdai, dawak ūk balna kidika nakastawa ūk yakat bangdai.

¹⁴Kaput laih Abner yaklauwi Joab yakat kalyulna: —Wawahma balna kidika mamuhki tani yakat kalahwi kalbabauwang. Joab yaklauwi kalyulna: —Kaput karang.

¹⁵Kaput laih Saúl walanibis Is-boset dawak Benjamín muihni balna kidika kalalahna, dinina yamyang balna kidika 12 muhnina yakat kalalahna, dawak Devid ahalni balna niningkauh bik sihm 12 kalalahna dai.

¹⁶Witingna waihninala balna tunanina yakat lalaihna dawi pirinina yakat isparah kau pawi ahllalana, kaput laih witingna bitik laih papatni dauwi bubukna. Kaput bahang Gabaón kau kidika pāni laih ayangni papakna Helcat-hazurim.[4]

¹⁷Kidika mani parasni kalbabauna dai, Abner dawak Israel muihni kalbauyang balna kidika minit bayayakna dai Devid ahalni kalbauyang balna yaklauwi.

¹⁸Yakat Sarvia walanibis ahal bās kidika tulu dai: Joab, Abisai, dawak Asael. Witni adika alni laih parasni kiradai sana kapat, pa ahni manah yakat,

¹⁹Abner yakat uiwi kiuna, kaldawas dai kiri yaklana atnin.

²⁰Abner dangnit yakat wiryaklawi talwi parasni yulna: —¡Kaunah manyah, Asael! Asael yaklauwi kalyulna: —¡Agha, yang!

²¹Kaput laih Abner kalyulna: —Yauitaman kidika datah. Kau yamni karang diki yamyang balna kidika as laihma kat, dawak di trukwalik kidika sipkarang man bitik dunam. Kaunah Asael witing uiwi kiwa kidika dawas dai,

²²dawak Abner watwi kalyulna: —¡Yauitaman kidika datah, kidika awaskat sau yakat matuklakki! Kidika usnitkat, ¿muhki amput dutik wirahma Joab muhni yakat lawakiyah?

²³Asael kidika dawi yaklawas bahang, Abner yaklauwi langnisa sutni kidika kau bani yakat pawi ahllana dangni yakat, dawak Asael laih kidika pāni yakat dauwi bukna. Dawak muih bitik kidika pāni yakat uiwa kidika watwi tatalwa dai.

²⁴Kaunah Joab dawi Abisai karak laih dawas ban uiwi uina Abner yakat, ma kidika kakiwasakkat Ama asangni ubulni tuna yakat uiwi kikilna, kidika laih Gía muhnit yakat sakki, Gabaón kauhnimak wanilang tani kiwa yakat.

²⁵Yakat Benjamín muihni balna Abner karak kalududuhna, aslah mahni kalpakwi panina duduna asang tuna yakat.

²⁶Yakaupak Abner sarahwi kalyulna Joab yakat: —¿Muih kaliwi kaiwasak adika sarandis ban kiwarangyah? ¿Amanglatasmahn adika laih tapahlni manah maiduaiwarang kidika? ¿Mampat kat muihma balna yakat diyultang dadawarangyah wirahnina balna kau uiwi aiwa kidika?

²⁷Joab nangnitlana: —Papang ayangni kau yaktik mayultayang, adika yultasman dai katlaih, muih balna adika wirahnina balna yakat uina manah payahlalawitdai.

²⁸Usnitkat Joab yaklauwi pakna dai trumpit puhnin, dawakat kaput laih muih bitik wawatna dai, Israel balna yakat uiwi kalbabauwa kidika dadana.

²⁹Abner dawak alni balna karak lapapakna Arabá wanilang munah kidika pukta, dawak ta kidika barangni dakyaklalana Jordán munah dawak Bitrón munah bitik, kaput laih uiwi kakana Mahanaim kat.

³⁰Joab yaklauwi Abner yakat uiwi kiwa kidika dana, dawi kalbauyang muihni balna bitik uduhna, dawi kulwi talwak Devid kalbauyang balna duwa dai kidika tunan muihni balna 19 dadauna dai, kidika minit yakat Asael bik dauna.

³¹Kaput kaunah Devid muihni kalbauyang balna yaklauwi 360 muih ihina dai, Abner dawak Benjamín ahalni balna yakat.

³²Kidika usnit kat Asael muihni nuhni kidika Belén yakat duwi uina, dawi yakat nununa, papangni sauni ū yakat. Joab dawak witing ahal duwa likkidika balna karak lapapakna kidika puknita bitik, dawak payahlawak Hebrón yakat uman uiwi kakana dai.