Read Mayangna 2 Samuel 20 Bible Online

2 Samuel 20 - Mayangna bible

2 Samuel 20

¹Benjamín sulani paskaupak muih dutni as likdai, ayangni laih Seba, Bicri walanibis, bahang witing laih Gilgal yakat sakdai. Adika Seba yaklauwi tawan muihni balna yakat kulninna uswi sahmuhna dai kalbaunin dini kidika laihna atnin,[30] bahang aput diyulna: “¡Mayang laih Isaí walanibis, Devid karak dipahni as bik dismayang! ¡Israel balna bitik ūmana kau yawanauh!”

²Israel ahalni balna bitik Devid kidika ruhmwi dadana dawak Seba yakat usnit uhuina, Bicri walanibis kidika yakat. Kaunah Judá muihni balna laih, Jordán wasni kaupak Jerusalén kat kidika king karak barangni dai.

³Devid watwi Jerusalén yakat kiwi kana kat, ialni salap dawi kiuna dai kidika ūni maintalna atnin, kidika balna laihwi ū askau āwi putna, dawak maintalnin bik pakna dai. Dawak kidika yakat witing ban maintalwa dai, kaunah witing kidika yayalni balna karak watwi kalangwasdai. Kaput laih yayal kidika awi putna, bahang tingmak kapat dai, dadauna kat.

⁴Usnit kat king yaklauwi Amasa yakat pakna: —Judá ahalni balna yultang aiwang, ma bās pasyakat witingna karak yang akat aiwama.

⁵Amasa kiwi uduhna dai kaunah, ma kalana kidika bayakna dai.

⁶Kaput laih, Devid yaklauwi Abisai yakat kalyulna: —Seba kidika tanit dutni maiyamwarang ki, Absalón karak dawak. Kaput bahang, yang kalbauyang balna dutayang kidika tanina tuna awa uita yawah, tawan nunuhni balna daklana pasyakat kawi yaklawarang.

⁷Joab ahalni balna, cereteo dawak peleteo balna kalbauyang tanit yayamni king witing yaihnitkau duwasakdai kidika balna karak witingna Jerusalén kaupak kalahwi uina Abisai karak, Seba laihnin uiwi uina dai.

⁸Gabaón yaihnit kau kipala nuhni as sakkidika yaihnit yakat uina kat, Amasa dai kidika kalahwi kalpapakna. Joab laih kalbaunin prakni kānalikdai banimak sitnin dini sitwi dawak bik isniparah kidika ūni kau awi dangni yakat sitna tusdai, kaput bahang iswi sau nining yakat murlakwak īsi kalahnin manahdai.

⁹Dawak Joab yaklauwi Amasa kungnibas yakat tingni palni kau laihwi umwa kapat yakauna kalyulwi dakana: —¿Yamni manh wirah?

¹⁰Amasa witing amanglawas dai Joab tingni yakat isparah duwi kiwa kidika. Kaput laih sirihni Amasa bani yakat dakna dai, kaput laih bani bitik laih sau yakat uhna. Kaput laih Joab yaklauwi watwi tuswas dai, bahang kaput laih dauna. Kidika usnit kat, Joab dawak wirahni Abisai karak Bicri walanibis Seba yakat uiwi uina.

¹¹Kaput laih Joab witing kalbauyang duwa kidika balna paskaupak as kalahwi Amasa yaihnit yakat kiwi yaklauwi aput yulna dai: —¡Joab dawak Devid karak yawamana kidika, Joab yakat usnit uita yawanauh!

¹²Kaunah Amasa kidika ban ta papus yakat pihrwatusdai āni minit yakat, dawak kalbauyang muihni kidika talwak muih balna bitik laih kidika yakat watwi tatalna, dawakat Amasa kidika ta pirini yakat latuswi dawi mukna dai; kat amanglana dai, muih bitik laih kidika yakat uiwi watwi tatalwa bahang.

¹³Ta pirini yakat laktusna usnit kat, Joab karak bangkidika muihni balna, bayakwi uiwi uina Seba yakat.

¹⁴Seba kidika Israel balna bitik pasmunah kawi bayakwi kiuna dai Abel-bet-maaca kat, dawak Bicri sulani balna bitik kalpakwi dangnit yakat kawi uina dai tawan nuhni pas yakat.

¹⁵Joab ahalni balna kidika Abel-bet-maaca yakat uiwi kakana kat, daklana pining ahni kaupak sau uhwi duwi iluiwadai, kaput laih tawan muihni balna niningna yakat kalbauna atnin, usnit kat witingna bitik kalpakwi daklana kidika tukwi laknin yayamna dai.

¹⁶Kidika minitni yakat, yal as kalahwi, daklana mayakaupak sarahwi yulna dai: —¡Yadakanauh! ¡Yadakanauh manna plismana! ¡Joab yakat kalyultanangkat yaihkit akat kaiwang, kat witing karak yulbaukuhtiang!

¹⁷Joab yaklauwi yaihnit yakat kiwakat, yal dai kidika yaklauwi kalyulwi dakana: —¿Manyah Joab? —Agha, yang —kaltadai Joab yaklauwi. Yal kidika yaklauwi kalyulna: —Man dima yamyang yal adika yulwa kidik dakah. —Madakayang —kalatna.

¹⁸Kaput laih witing mahka yulna: —Tanitmani kau aput yuyulwadai: ‘Wais di as amanglakih kalawakat Abel yakat yulwi dakawang atwadai.’ Dawak kaput laih barangni kalahwa dai.

¹⁹Yangna tawankina nuhni adika laih, tawan as tanit kulwi kalbaunin lani kidika dis atnin, dawak bik barangni kidika Israel tawanni balna pasyakat,[31] ¡dawak bik tanit nuhni kalkulna kidika! Kaput kaunah man daukalpamnin yamtaman. ¿Ais yamta daukalpamnin yamtamahn Dawan dini kidika?

²⁰Joab yaklauwi nangnitlana: —¡Kidika laih kulnin bik awaski! Yang yamtayang kidika laih daukalpamnin kulnik yakat dutasyang.

²¹Kidika awaski, kaunah Efraín sauni kaupak al as ayangni Seba, witing king Devid nining yakat kalbaunin dini dulauna. Witingmana yatanauh, kaput laih adika tawanni nuhni kaupak datik yawaki. —Tunan kidika daklana ma akaupak ruhmlaktanaki —kalatna, yal kidika yaklauwi Joab yakat.

²²Kaput laih yal kidika kiwi tawan muihni balna bitik yakat yulbauwi kulninna wirlawi, Seba kidika laihwi tunan dakwi Joab yakat kalalana dai. Kaput laih Joab yaklauwi diyulna dai puhna atnin mahka dawi kalahnin yulni, kaput laih tawan nuhni kaupak mahka dawi kalalana, dawak witingna mahka ūnina kat kat uina, dawak Joab laih Jerusalén yakat nawatwi kiuna king karak yulbauna atnin.

²³Joab kidika tatuna nuhni as āna dai Israel muihni kalbauyang balna bitik pasyakat, dawak Joiada walanibis Benaía laih cereteo dawak peleteo balna tanina tuna āna dai.

²⁴Adoram laih muih balna yakat taihwi pakwak wark yamnin kidika tanituna dai, king yaihnit yakat ulyang as duna kidika laih, Ahilud walanibis Josafat dai.

²⁵Seva laih yul balna kalahwa kidika ulyang dai, Sadoc dawak Abiatar kidika balna laih sumalyang dai.

²⁶Jair pāni kaupak al as ayangni Ira, witing bik Devid sumalniyang as dai.