Read Mayangna 2 Samuel 22 Bible Online

2 Samuel 22 - Mayangna bible

2 Samuel 22

¹Devid witing unbauna Dawan yakat adika unbaunin karak, Saúl tingni kaupak dawak waihnila balna tingnina kaupak laihwi yakana usnit kat.

²Aput yulna: “Dawan, man laih nakitdakyang man, yang maldayang pāni, yalaihwi yakyang,

³yang Papangki, kipala as yang nakit dakwa kidika, yang nakit dakwa dini, parasni kau yalaihwi yakwi, yang maldinik pāni makau palni kidika, yang āwik maldinik pāni makau palni kidika, yalaihwi yakyang. ¡Kalbaunin paskaupak yalaihta yaknaman!

⁴Dawan, man laih ayangma nuhni yamnin kidika dima palni ki: mayultingkat, waihkila balna kaupak yalaihta yaktaman.

⁵“Daunin lalamwi kaiwa kidika yakat yabalakna dai; yamadunayang dai bahwi disyamwa kidika kaiwi bayakwakat.

⁶Daunin wahni kidika kau yawiditna dai, ¡daunin dini dudutni kalpaknayang!

⁷Yang kulnik kaida pasyakat, Dawan kau kalyulnayang, yang Papang yakat ilp yulnayang, dawak witing ūni kaupak yadakana; ¡sarahnayang kidika witing tapani kat kiwi kana dai!

⁸“Kaput laih sau parasni yukna dai: makau kisang rahni balna bik yukna dai; Dawan kulnin daukalna kidika yaklauwi dulauwi isihna dai.

⁹Nangnitak kaupak wayau manah kalahna dai, dawak tinpas kaupak kalahna dai daukalwi disyamwa kuhnipau; ¡dawak tinpas munah kuh tuturni puhwi yakna!

¹⁰makau kisang dūrni asnina rina kidika bik karhwi kiwi sau yakat kaiwi yaklakna. ¡Kalni dinit yakat bik mukus sani nuhni palni bik duwa dai!

¹¹Di lawani duwa as kau kilwi yaklauwi kiuna, wing lawani yakat dukiwak kaltalna dai.

¹²Witing ūni labanni duna dai, puksani nuhni awaih kalduwa kidika kau dawak mukus sani was manah duwa kidika kau bik.

¹³Yaringni, alwana as lapwa kapat witing muhni tani kaupak kalahna; dawak kuh tuturni dahlwa balna kidika was lauwa kapat uhna dai.

¹⁴“Dawan, witing makau palni kidika, makau kisang kaupak dinit parasni alwana kapat yulwa kidika yulwak dakakana:

¹⁵sinibang kidika ruhmna dai, dawak alniwana lapwa kidika bik, dawakat waihkila balna yakat diyamwak pini kikirana.

¹⁶Kuma tuhni kidika bik laih ahnimanah dana dai; sau nuhni adik rahni balna bik lāih kalahna dai, Dawan dinit kidika parasni niningkauh yulna kidika yulni, dawak wingnita parasni puhna dai kidika yulni bik.

¹⁷“Mayakaupak Papang tingni kidika yayuna dai, dawak kuma nuhni paskaupak witing tingni kau yalaihwi yakna.

¹⁸Yang waihkila pararasni balna kaupak yalaihwi yakna dawak kidika kaupak yalaihwi dutni yakukulwadai, dawak witingna kauh tanit pararasni dai, yang karak dawakat.

¹⁹Yang didis mikunni kalnayang mani balna yakat, niking kauh yaklalauna, kaunah Dawan yang akat ilp yana:

²⁰laihwi yaknin yakat yayakna; ¡yalaihwi yakna, kat dalani yatalwa bahang!

²¹Dawan yaklauwi mikit lauwi yana, kat yamtayang balna kidika dutni dis bahang kaput sipdai dunik,

²²kat yang laih Dawan tāni yakat usnit uitik yawanayang bahang; ¡wat as bik Papangki yakat talasyang yultasyang dai!

²³Witing lāni balna kidika yang dutayang; ¡wat as bik witing lāni balna kaupak datik pirini yakat yawasyang!

²⁴Witing muhni tani yakat dutni as bik dis yawanayang; dutni kaupak naikau alahwanayang.

²⁵Dawan yaklauwi mikitlauwi yana witing muhni yakat maisihni as bik disyang bahang.

²⁶“Dawan, man laih barangniman, angdika muihni barangni kidika niningyakat, angdika muihni kulnin daukalna kidika muih muhni kat yakwas kidika, man bik sihm kaput kalyamtaman kidika muihni yakat,

²⁷muih as kulnin alas dis kidika, man bik kidika muihni niningyakat kapat man, kaunah sinsma nuhni karakman angdika muihni alas yulwi lan muihni niningyakat.

²⁸Muih buknin lani duwa kidika, man lawa laihta yaktaman, kaunah witingna manah kaldakakawa balna dawak buknin lani duduwa balna yakat man ditalaman.

²⁹Dawan, man laih, yang yaringkiman; man, yang Papangki, puksani yakat yaringni yataman.

³⁰Man ilpma kau waihkila niningyakat kalbauki dawak tawanni nunuhni daklana minit munah bayakki.

³¹“Papang tani kidika laih barangni ki; Dawan pranimis kidika laih rahm palni kulnin kidika kalanin ki. ¡Papang yaklauwi tanitna dakwi witing yakat kulninna āwi duduwa balna yakat!

³²¿Wais kidika Papang yah, Dawan kaupak ūk kidika? ¿Dawan ūk as sakyah mayang matakit daknin kidika?

³³Papang kidika laih yang maldinik parasni palni ki, witing yaklauwi yamtayang balna bitik yamni manah yamwi,

³⁴witing yaklauwi kalki sirihni yamwi, sihm sana kapat, witing yaklauwi yayamwakat kalki kau parasni lawayang mayakat,

³⁵wais yasumalwi war kalbaunik, wais paraski yawih, bras lasni kidika istik kawainik.

³⁶“Man lawa nakit daktamahn, dawak yalaihta yaktaman; man kulnam minikun talnin dutaman kidika yaklauwi yāwak nuhni kalnayang.

³⁷Yang taki kidika isi yamna, dawak yang kalki balna kidika atakting karhwas dana.

³⁸“Waihkila balna kidika uitik yawik itik dismukna yang, yang alas nawattik aiwanayang imuknayang kat.

³⁹¡Itik dismuknayang! ¡Daktik bikis yamnayang! Watwi yaklauwas dadana: ¡yang kalki dinit yakat bubukna!

⁴⁰Kalbaunin pasyakat man parasma yanaman; yamtang kat muih kulninna dudutni balna kidika yang akat aiwi abubukna.

⁴¹Dawak yang muhkit yakat waihkila balna kidika kikirana dai. Kaput laih sipyang dai dismukna atnik muihni dudutni yakukulwa balna kidika.

⁴²Ilp yuyulwak muih as bik ilp diayawasdai; Dawan yakat kalyuyulwak bik nangnitna lawas dana.

⁴³¡Sau yahamni kapat dismuknayang dai! ¡Kalki kau atakna yang dai ta pas kau wasmak kapat!

⁴⁴Tawanki kalbauwa kidika kaupak yalaihta yaknaman dai, nisan balna taninatuna kapat yadunaman, dawak muih talasyang balna kidika yang diki yayamwi.

⁴⁵Yang yulki dakawi yayamwi; sau ūk muihni balna kidika yang yamni dakayang.

⁴⁶Sau ūk muihni balna kidika yamaduduwi, dawak yakmamalda pāni kaupak diyukwīnah kalalahwi.

⁴⁷“¡Dawan sangka ki! ¡Yang nakitdakyang kidika blisyamna karang! ¡Papang kidika ayangni nuhni yamna karang, yalaihyakwi yakwi dawi nakitdakwa kidika!

⁴⁸Witing kuduh Papang, biriwi yang yulki diyamna kidika, dawak tawan balna kidika yang tingki dinit yakat duaiwi āna kidika.

⁴⁹Waihkila balna kaupak witing yalaihwi yakwi, kulninna dudutni balna nikingkauh yaklalauna kidika. ¡Man Dawan, ahal kulninna dutni anyang balna kaupak yalaihta yaktaman!

⁵⁰Kidika bahang nisan balna paskaupak ayangma nuhni yamtayang dawak man ayangma kidika unbautayang.

⁵¹King as yakta dunaman kidika yakat kalataman minit bayaknin nunuhni balna; Devid dawak sulani balna yakat bik ban kaput dalani ditalaman.”