Read Mayangna 2 Samuel 23 Bible Online

2 Samuel 23 - Mayangna bible

2 Samuel 23

¹Adika balna kuduh Devid yulni witni yakat yulna balna kidika: “Isaí walanibis Devid, witing kidika, Papang yaklauwi laihwi dulauna, king as Jacob Papangni yaklauwi walwi yakna kidika, Israel pasyakat unbaunin damni balna unbauwadai kidika, witing yul damni balna kidika yulna:

²“Dawan spiritni kidika yang munah yulbauwi; witing yulni balna kidika yang tuki yakat sakki.

³Israel Papangni kidika yulbauna ki; Israel nanitdakyang kidika yayulna: ‘Angdika muihni kabamint kawi lā kat diduwi kiwarang kat muih balna yakat, dawak bik Papang yamanidunin kat bik tatuna kawarang kat,

⁴witing laih mapiris ma yaringni kilwa kapat karang, dawak bik mapiris as mukus dis kat ma yaringni duwa kapat karang, kaput bik laih waslauwak usnitkat dibasta ukuswa kapat karang.’

⁵Kidika bahang yang sulaki balna kidika barangni ki[34] Papang yakat, kat witing yaklauwi yang karak pramis as ban kaput atnin kidika yamna bahang, bitik lā kat, dawak bik rahm kidika. Minit bayaknin kidika bitik witing yawi yang akat dawak dukih yawa balna kidika yakat kalahwi.

⁶Kaunah muih dudutni balna kidika laih sihm wakal as ruhmna kapat karang, muih as bik tingni kau laihwi dulauwas kapat karang.

⁷Laihwi talnin kat ayan karang kidika awaskat langsa kau duwi dawi sukwi tatalwi, dawak kuhpas yakat ruhmwi āwi bitik busyamna atnin.”

⁸Adika ahalni kalbauyang balna tanit yayamni duwadai kidika Devid: Is-boset, hacmonita,[35] ahal bās tanit kulninna dadasni balna dai kidika taninatuna, watas kat langsa kau muih ahal 800 īna dai kidika.

⁹Kidika kaupak usnit dai kidika laih Eleazar, Dodo walanibis Ahoh kaupak dai kidika, ahal kulninna dadasni bās dai kidika paskaupak witing kidika as dai. Witing laih Pasdamim pāni yakat,[36] Devid karak dai, bahang kidika yakat filisteo balna aslah kalududuhna dai kalbaunin, kaunah Israel balna mahka kidika pāni kaupak dawi kalalahna dai.

¹⁰Kaunah witing laih kiwasdai, bahang filisteo balna mahni ina, kaput laih tingni kalsuhna bahang witing tingni kidika isniparah yakat katakna kidika ban kaput sip dawasdai. Kidika mani Dawan yaklauwi minit bayakna kidika nuhni dai. Kidika usnit kat, kalbauyang balna kidika Eleazar yakat usnit uiwi uina dai, witing waihnila balna kaupak dinina dakyakna kidika dunin yulni.

¹¹Eleazar kaupak usnit yakat laih ararita alni as ayangni Age, walanibis Sama kidika dai. Filisteo balna kidika Lehi pāni yakat aslah kalalahna dai, bahang kidika pāni yakat sinak satni as dadahna pakdai, bahang Israel balna laih kidika balna muhnina kaupak kikirana dai.

¹²Kaunah Sama laih yamak pasyakat watwi pāni duwi filisteo balna niningna yakat kalbauna dai, kaput laih minitna bayakwi taihna dai. Kaput laih Dawan witing minitbayakna nuhni as duna.

¹³Ma as kat, diminik bahni mani balna kat, muih ahal kulninna dadasni 30 kidika paskaupak bās kalahwi uina Devid karak kalpakna atnin Adulam pāni sulihni yakat. Filisteo balna laih Refaim sauni langni yakat bangdai.

¹⁴Devid laih kalbauyang balna ūnina parasni yakat sakdai, dawak filisteo balna kidika Belén yakat kaluduhna as bangdai, kalbauyang balna.

¹⁵Dawak Devid dukih kalawa kidika yulna dai: “¡Yamni atnindai, Belén dūrnikung kau pa kuhrna sakkidika wasni kaupak muih as kalahwi kiwi butwi duaiwak dina yang kat laih!”

¹⁶Kaput laih ahal kulninna dadasni balna bās kidika, filisteo balna bangkidika panina yakat uiwi, Belén dūrni kiwi kawa kau pa kuhrna sak kidika kaupak butwi duwi uiwi kalalana dai Devid yakat. Kaunah witing diwas dana dai, nawatkauh laih utuhna dai minitdis kalanin yamni as Dawan yakat,

¹⁷bahang aput yulna: “¡Adika dinin kaupak Dawan yaklauwi yalaihwi yakwarang! ¡Adika diki laih, sihm kidika ahalni balna ānina ditayang kapat karang, witingna sangninaka daunin yakat āwi munah laih uiwi duahaina bahang!” Kaput laih witing diwas dana. Adika di yamna as nuhni kalkulna kidika laih ahal bās kulninna dadasni kidika yaklauwi yayamna dai.

¹⁸Sarvia walanibis Joab kidika wirahni Abisai, witing kidika ahal kulninna dadasni 30 kidika taninatuna dai. Mani askat ahal 300 niningna yakat kalbauwi ina dai witing alas langnisa kau. Kaput laih witing ayangni nuhni kalkulna dai muih ahal 30 balna pasyakat,

¹⁹dawak witing kidika kau tanit risnipik nuhni kalkulna dai, as balna kidika karak dawakat, kaput bahang witing kidika taninatuna kana dai. Kaunah tatuna balna bās dai kapat laih awas dai.

²⁰Joiada walanibis Benaía, Cabseel pāni kaupak dai kidika, witing laih al kulnin dadasni dai, di nunuhni manas yamna. Witing yaklauwi Ariel walanibis ahal bu[37] dai kidika īna Moab pāni yakat. Ma askat, sanni lakwasakkat pa kudungni tuhni as kat pasyakat kawi kiwi layan as īna dai.

²¹Dawak Egipto muihni as alni nuhni naini palni tingni yakat langsa bitik duwa likkat īna dai: Benaía laih pan kau duwi niningyakat kalbauna, dawak tingni kau langsa duwa likdai kidika dakyakwi, sihm langnisa kidika kau īna.

²²Joiada walanibis Benaía yamna kidika yaklauwi risnipik nuhni kalna, ahal 30 balna pasyakat;

²³dawak risnipik tanit duna, as balna kidika karak dawakat, kaunah tatuna bās kidika balna kapat laih awas dai. Devid yaklauwi witing yaihnit palni kau kalbauyang balna duwa kidika tanina tuna āna dai.

²⁴Ahal kulninna dadasni 30 kidika balna laih adika balna dai: Asael, Joab wirahni; Elhanán, Dodo Belén kaupak kidika walanibis;

²⁵Sama dawak Elica karak, witingna laih Harod pāni kaupak dai.

²⁶Heles, Pelet kaupak kidika; Ira, Iques walanibis, Tecoa kaupak kidika;

²⁷Abiezer, Anatot kaupak; Sibecai,[38] Husah kaupak.

²⁸Salmón, Ahoh kaupak; Maharai, Netofa kaupak.

²⁹Heled,[39] Baana walanibis, witing bik Netofa kaupak dai; Itai, Benjamín sauni kau pa as ayangni Gabaa kaupak al as ayangni Ribai, kidika walanibis;

³⁰Benaía, Piratón kaupak; Hidai, Gaas wasni bin kaupak.

³¹Abi-albón, árabe kaupak; Azmavet, Bahurim kaupak.

³²Eliaba, Saalbon kaupak; Jasén walanibis balna; Jonatán;

³³Sama, Arar kaupak; Ahíam, Sarar walanibis Arar kaupak dai kidika.

³⁴Elifelet, Ahasbai walanibis; dawak Maaca walanibis; Eliam, Ahitofel walanibis, Gilo kaupak.

³⁵Hezrai, Carmel kaupak; Paarai, arbita muihni;

³⁶Igal, Natán walanibis, Soba kaupak; Bani, Gad kaupak;

³⁷Selec, Amón kaupak; Naharai, Beerot kaupak, Joab tingnisut laihyang, Sarvia walanibis.

³⁸Ira, Jatir kaupak; Gareb bik Jatir kaupak dai;

³⁹dawak Urías, hitita muihni. Bitik kat 37 dai.