Read Mayangna 2 Samuel 6 Bible Online

2 Samuel 6 - Mayangna bible

2 Samuel 6

¹Devid yaklauwi Israel muihni kalbauyang balna walwi yakna dai kidika uduhna, kidika balna laih tausin 30 dai,

²Judá kau pa as ayangni Baala kidika kaupak, muih mahni witing karak bangdai kidika balna karak, witing mahka duwi kiuna Papang baksni kidika, bahang kidika yakat Dawan ayangni parasni bitik duwa kidik yakwi yulwa kidika, dawak witing trunni duwa kidika querubines balna minitna yakat.

³Turuh mumurwa kārni wisam kat minit yakat ihilna baks kidika, dawak Abinadab ūni yakat duwi uina, asang ubulni makau sakkidika yakat. Abinadab walanbis balna Uza dawak Ahío balna kidika tatuna duwi uina kār Papang baksni duwi kiwa kidika, dawak Ahío kidika laih tatuna kiuna.

⁵Devid dawak Israel balna laih Papang muhni tani yakat ubuwi, unbauwi uina parasnina bitik palni, paswi yakisdinin dini, puhnin dini, bara, isihnin dini kidika satni balna kau.

⁶Nacón Era pāni yakat uiwi kakawakat, Uza kidika witing tingni dulauwi Papang baksni yakat laihna, kat turuh murwa tulu kidika atatakwak karhwakat, baksni kidika bukwa kapat dawakat.

⁷Kaunah Dawan kulnin daukalna Uza yakat, kidika yamna kidika yulni, dawak kidika pāni yakat sangnika dakyakna, bahang kaput laih Uza kidika dauwi bukna Papang baksni yaihnit yakat.

⁸Devid kasak kulnin daukalna, kat Dawan yaklauwi sangnika dakna[9] bahang Uza yakat, kidika yulni, pāni kidika ayangni pakna Pérez-uza,[10] kidika ayangni warmani kat duwi.

⁹Kaunah sihm kidika mani Devid kasak yamaduna Dawan yakat, dawak yulna: “¡Dawan baksni kidika duyawinik kultasyang!”

¹⁰Dawan lani baksni kidika Devid tawanni nuhni yakat dukiunin kulwas dana bahang, di pakna, Gat kaupak al as ayangni Obed-edom ūni yakat dukiwi dana atnin.

¹¹Dawan baksni kidika waiku bās watna dai Obed-edom ūni yakat, dawak Dawan yaklauwi blisin kalana dai witing yakat dawak walanibis balna bitik yakat.

¹²Devid yakat kalyuyulna Dawan lani baksni kidika yulni Obed-edom wanaihni balna yakat blisin diana, kaput bik dini balna bitik yakat, dawak Devid alasna manah kiwi Papang baksni kidika Obed-edom ūni kaupak yakwi dukiuna Devid tawanni nuhni yakat.

¹³Dawan lani baksni duwi uiwa balna kidika asahna tiaskauas lapapakwak, Devid laih turuh almuk as dawak sīp almuk as salalani balna kidika sakripais yamna dai.

¹⁴Devid laih kāna dai linin prak nuhni tingni kalhni minit kau kawa kidika, dawak witing parasni bitik laih ubuwa dai,

¹⁵witing yamwa kapat Israel balna bik witingna Dawan baksni duwi uiwa kidika alasna duwi sararahna, dawak trumpit bik pupuhna.

¹⁶Dawan baksni kidika Devid tawanni nuhni yakat kiwi kana kat, Saúl walanibis Mical kidika dungh kalahwi talna windar yakat; dawak witing talwak Devid kidika Dawan muhni tani yakat ubuwawitkat witing Devid nining yakat di dauh as kalkulna.

¹⁷Dawan baksni kidika duwi uiwi pāni yakat lalakna, ū labanni as Devid yamna dai kidika yakat. Kidika usnit kat Devid witing sakripais karauni kauna busna, dawak Papang karak watwi yamni kalahnin sakripaisni bik busna dai, Dawan muhni tani yakat,

¹⁸kidika yamwi dana usnit kat, tawan yakat blisin kalana Dawan parasni nuhni bitik duwa kidika ayangni kau,

¹⁹dawak kidika yakat Israel balna bangdai kidika, ahal dawak yayal, witingna yakat diana dai, plawar busna as, pasas ulangwi busna kidika bik as diana. Dawak usnit kat mahka bitik ūnina kau uina.

²⁰Devid bik ūni kau kiuna witing walanibis balna yakat bik blisin diana atnin yulni; kaunah Mical, Saúl walanibis niningkauh kalahwi kiwi kalyulna: —¡Ais ampat yamni kalahnayah warmani Israel kingni kidika, witing dini yamyang balna muhnina yakat, muih pini as kapat asalni dis dai!

²¹Devid yaklauwi nangnitlana: —Rahmki; yang ubutawityang dai, kaunah kidika laih Dawan muhni tani yakat, bahang kidika laih papangma pāni yakat yahana, wanaihma balna dawak Israel bitik yakat tunan atnik yulni. Kidika yulni laih witing niningyakat ubutayang.

²²Dawak baisa sau yakat bukki ki, sau yakat bukki ki man yultaman kaput, kaunah risnipik nuhni kidika dukiki, sihm kidika diki yamyang balna yultaman kidika balna kaupak.

²³Dawak Mical laih baisa walanibis duwas dai sangnika bitik yakat.