Read Mayangna 1 Reyes 1 Bible Online

1 Reyes 1 - Mayangna bible

1 Reyes 1

¹King Devid kidika muih barak palni kalna dai. Umuk yamni mumukwak bik sip muihni kidika puihni duwas dai.

²Kaput bahang dini yamyang balna yaklauwi kalyuyulna: “King man walnam ki muih yal sirau as, kidika dima yamna atnin dawak bik mainmatalna atnin, dawak bik man karak payahna atnin, kaput laih puihni kidika mawarang.”

³Israel sauni bitik pasyakat sirau nuhni yaksihni as wawalna dai, dawak kaput laih as yayakna dai ayangni laih Abisag, bahang witing laih Sunem tawanni kaupak dai, bahang witing kidika duwi uina dai king yakat.

⁴Abisag laih yal sirau as nuhni yaksihni palni dai, bahang king yakat maintalwa dai, kaunah king yaklauwi watas bik yal yakat duwas dai.

⁵Adonías kidika laih Devid walanibis Haguit kaupak yakna dai kidika, bahang mani as kat kalbaunin dini balna kidika laihwi yulna, witing kidika laih king kawarangki. Kalbaunin kārni balna bik duna, dawak kalbauyang muihni balna bik, kaput bik laih kalbauyang muihni balna witing palni mainkaltatalwa kidika muih ahal 50 duna.

⁶Witing papangni yaklauwi wat as bik laih niningkauh yulwas dai witing sangnika bitik yakat, dawak bik ais yulni kaput yamwapa. Adonías kidika Absalón usnit yakat batahndana dai, witing laih al as muihni yamni dai.

⁷Joab, Sarvia walanibis kidika karak pramis as yayamna dai dawak sumalyang Abiatar karak bik, bahang witingna kidika ilpni yayamwa dai.

⁸Kaput kaunah, witing karak awas balna dai kidika laih adika balna ki: sumalyang Sadoc, Benaía, Joiada walanibis, prapit Natán, Simei, king yaklauwi kulnin bitik yamni kalkulwa dai kidika alni,[1] Devid kalbauyang ahalni tanit yayamni duwa dai kidika balna bitik laih Adonías karak uiwas dai.

⁹Kidika mani balna dai yakat Adonías kasnin alasnina as yamna dai Zohelet kinipala yaihnit yakat, kidika laih Rogel wasnituna yaihnit yakat sakki. Bahang witing turuh īna, sīp īna, dawak turuh almuk wawahma binina salalani kidika balna bik īna. Dawak witing wirahni balna bitik diyulna uina atnin, dawak king walanibis balna bitik bik diyulna uinin, dawak kaput bik laih Judá ahalni bitik king dini yamyang balna kidika bitik diyulna uinin;

¹⁰kaunah prapit Natán, Benaía dawak Devid ahalni kalbauyang balna duwa kidika, dawak witing wirahni Salomón kidika balna bitik laih yulwi dukiwas dana.

¹¹Kaput laih Natán witing Salomón nanangni Betsabé karak yulbauna, dawak kalyulna: —¿Man amanglatasmahn, Haguit walanibis Adonías kidika witing king kanati yulna kidika madakiwan Devid dakawas kat?

¹²Bahang aiwah, yang yul as masumalki bahang kaput laih sipkarang man sangmaka dawak walamabis Salomón sangnika bik laihta yaknam.

¹³King Devid muhni yakat yawah, dawak kalyultah: ‘King, man lawa Papang ayangni kau yakta yayulnaman dai, yang walakibis Salomón kidika man usmat yakat king kawarang, dawak trun yakat kilna karang. ¿Kaput kat amput dawak Adonías kidika king kawih?’

¹⁴Man king karak yulbauta sakman kat, yang āwik yawik man yultaman balna kidika baisa parasni āki.

¹⁵Kaput laih Betsabé kidika king payahwa pāni yakat kawi kiwi kaltalna atnin. King kidika uman muihbarak dai, dawak Sunamita yal kidika dini yamwadai.

¹⁶Betsabé kidika king muhni yakat limbabahwi muhni kidika sau kat lakna dai, dawak king yaklauwi kalyulwi dakana: —¿Ampat mawih?

¹⁷Yal kidika yaklauwi nangnitlana: —Man kingman kidika Papang Dawan ayangni kau yakta yayulnaman dai, man usmat yakat walakibis Salomón kidika king kawarang, dawak trun yakat kilna karang.

¹⁸Kaunah Adonías laih uman yulna witing kidika king, kidika yulni king man amanglatasman.

¹⁹Witing īna turuh ahalmuk dawak turuh ahalmuk binina salalani balna dawak sīp bik mahni palni īna, dawak king man walamabis balna yakat diyulna uina atnin, kaput bik diyulna sumalyang Abiatar dawak kalbauyang balna taninatuna nuhni Joab kidika bik, witingna uina atnin, kaunah Salomón man dima yamyang yakat laih kalyulwas ki kiuna atnin.

²⁰Dakiwan, waradika laih, Israel balna bitik tahahawi, man lawa yulma wais kidika king kawarangpa man usmat yakat.

²¹Kaput-awas karang kat, king man dauma usnit kat, walakibis Salomón dawak yang karak laih daunin yakat yanawirlalana karang.

²²Witing king karak yulbauwa sakkat, prapit Natán kiwi kana,

²³dawak king yakat isningpapakna. Prapit kidika king muhni yakat kiwi, witing abukwi muhni kidika sau kat lakna,

²⁴dawak kalyulwi dakana: —¿King man lawa paknamanh Adonías kidika king kanin, man usmat yakat?

²⁵Kat witing waradika yaklakwi kiuna, dawak turuh ahalmuk, turuh wawahma binina dawak sīp bik mahni palni īna, kaput laih king man walamabis balna yakat bik diyulna uina atnin, dawak kalbauyang balna tanituna balna yakat bik, dawak sumalyang Abiatar yakat bik. Dawak kidika yakat di kaswi dawak diwabangki witing karak, bahang aput sarahwi yuyulwi: ‘¡King Adonías sangka kawang!’

²⁶Kaput kaunah yang akat laih yāyuyulwas ki yawinik, dawak sumalyang Sadoc yakat bik, dawak Benaía, Joiada walanibis kidika bik, kaput bik laih king walanibis Salomón kidika bik.

²⁷¿King man lawa kidika yamnin paknaman katpah, man dima yamyang akat isningpaktas, wais king kawarang kidika, king man usmat yakat?

²⁸Kaput laih king Devid yaklauwi pakna Betsabé yakat kalyuyulwak kiuna atnin. Betsabé kidika king muhni yakat kiwi yaklauna.

²⁹King yaklauwi aput Papang ayangni kau yakwi kalyulna: —Dawan ayangni kau yaktik yultayang, witing kulnik kaida balna bitik kau yalaihwi yakna kidika,

³⁰Dawan ayangni kau yaktik mayulnayang kidika, israel Papangni ayangni kau, yulna yang yakat warmani yamna awaki: man walamabis Salomón kidika trun yakat kilna karang yang paki yakat, dawak kaput laih yang uskit yakat king kana karang.

³¹Betsabé witing king muhni yakat abukwi muhni sau kat lakna, dawak yulna: —¡Yang dakiwan, king Devid kidika ban kaput sangka karang!

³²Kidika usnit kat king Devid yaklauwi pakna, sumalyang Sadoc kidika kalyuyulwak kiuna atnin, prapit Natán, dawak Joiada walanibis Benaía bik. Adika muihni balna king muhni yakat uina,

³³witing yaklauwi diyulna: —King awayang kau wark yamyang balna kidika bitik yultanangkat mamakna dadawang, dawak walakibis Salomón kidika yang muyulki minit yakat ilsakta duyawanauh Gihón yakat;

³⁴dawak sumalyang Sadoc dawak prapit Natán karak yaklauwi tunan yakat dia utuhwi Israel kingni ahawarang kat, sīp almuk tamni kidika puhta sarahtanama: ‘¡King Salomón kidika sangka karang!’

³⁵Usnit kat witing dangnit yakat yawanauh, kaput laih kaiwi yang tronki yakat kilwi yalahwi, yang paki yakat king kawarang, kat yang lawik kaput yamnin kultayang bahang, witing kidika Israel dawak Judá kidika balna pasyakat tunan nuhni atnin.

³⁶Joiada walanibis Benaía kidika yaklauwi king yakat nangnitlana: —¡Kaput kawang, dawak king man Papangma Dawan yaklau kaput yamnin pakna karang!

³⁷Dawak sihm kaput bik king Dawan man karak dai kaput, Salomón yakat bik karang, dawak kaput bik laih yamwak kingni lani kidika baisa tanit nuhni karang, man kingma lani karak dawakat, yang dakiwan Devid.

³⁸Kidika usnit kat, sumalyang Sadoc, prapit Natán, Joiada walanibis Benaía, cereteo dawak peleteo balna, witingna bitik laih kalpakwi uiwi Salomón kidika king Devid muyulni yakat ilsakwi Gihón yakat duwi uina.

³⁹Kidika yakat sumalyang Sadoc laih sakripais busnin pāni tamni balna kau dia duwa kidika kau duwi Salomón yakat king āna. Kidika kaupak laih sīp almuk tamni kidika pupuhna, dawak tawan muihni balna bitik laih sararahna: “¡King Salomón kidika sangka karang!”

⁴⁰Usnit kat muih bitik laih usnit uiwi bara puhwinah uina. Uba alasna duduwa kidika yulni parasni palni sararahna, bahang sau kidika sahwa kapat dai.

⁴¹Adonías dawak yulwi duwi kiuna muihni balna kidika bitik di kaswi dahn dadawak, di parasni yuyulwa kidika dakakana. Sīp almuk tamni pupuhwa kidika Joab dakawi yulna: —¿Amput dawak tawan nuhni yakat muih balna kidika pini kiri yaklalauwih?

⁴²Yulbauwasakkat, sumalyang Abiatar walanibis Jonatán kidika kiwi kana. Dawak Adonías kalyulna: —Aiwa awah, man laih muih al as nuhni makulna ki bahang sipki man laih yul yayamni balna duainam.

⁴³Jonatán yaklauwi Adonías yakat nangnitlana: —Kaput awaski. Devid, mayang madakiwan king kidika yaklauwi Salomón yakat king āna,

⁴⁴dawak kaput bik laih dipakna sumalyang nuhni Sadoc, prapit Natán, Joiada walanibis Benaía, dawak cereteo, peleteo kidika balna bitik laih Salomón karak ki; bahang witingna yaklauwi king muyulni yakat ihilna.

⁴⁵Baisa minit yakat, sumalyang Sadoc dawak prapit Natán karak Salomón tunan yakat dia utuhwi king ahana Gihón pāni yakat, bahang kidika kaupak witing uba isningnalak aina. Kidika bahang tawan nuhni muih balna kidika pini kiri yaklauna bangki, kidika kuduh manna dakanamana kidika di parasni kalahwak.

⁴⁶Baisa kidika minit yakat Salomón uman pāni duna trun yakat kilwi,

⁴⁷dawak king Devid king kawa kau muih balna wark kalalahwa kidika balna bitik laih uiwi yamni kidika kalyuyulwi, dawak bik Papang yaklauwi kalawak Salomón kidika baisa barakna karang, dawak bik witing king kawa kidika baisa nuhni kalna karang king Devid karak dawakat. Kaput bik laih king Devid kidika pāni yakat limbabahwi Papang ayangni nuhni yamna,

⁴⁸bahang yulna: ‘Dawan, israel Papangni ayangni kidika nuhni yamna karang, kat witing yaklauwi kaput yāwak talayang yang sulaki as trun yakat kilwak.’

⁴⁹Adonías yulwak uina balna dai kidika diyukna, usnit kat bitik yaklauwi, witing silp silp tanina walwi tatalna.

⁵⁰Adonías laih witing Salomón yakat yamaniduwi yaklauwi holi pāni yakat kiuna, dawak yakat kiwi yakmaldana, bahang sakripais busnin pāni kau tamni balna yakat laihna.

⁵¹Kaput laih muih as yaklauwi kiwi Salomón yakat kalyulna: —Adonías, king man yakat yamamaduwi, bahang sakripais busnin pāni yakat kiwi yakmaldana. Bahang witing mayulwi, king man lawa Papang ayangni kau yakta pramis yamma witing kidika itas awama.

⁵²Salomón yaklauwi nangnitlana: —Muih al yamni as kapat yamwarang kat, witing basni as bik dakwi bukwas karang tunan kaupak; kaunah witing muihni yakat di dutni as yamna kat lāih kalahwarang laih dauna karang.

⁵³Kidika usnit kat Salomón yaklauwi muih sihna kidika pāni kaupak yakna atnin. Usnit kat Adonías king Salomón muhni yakat kiwi abukna, dawak Salomón yaklauwi kalyulna mahka ūni kau kiuna atnin.