Read Mayangna 1 Reyes 10 Bible Online

1 Reyes 10 - Mayangna bible

1 Reyes 10

¹Sabá kingni yal kidika dakana Salomón ayangni nuhni kidika yuyulwak, Dawan ayangni nuhni dulaunin yulni kaput kalana dai kidika, dawak witing Jerusalén yakat kiuna, yulwi dakanin dadasni balna kidika kalyulwi dakana atnin. Witing kiuna kidika laih di yayamni yaksisihni manah awaihdak laih kiwi kana dai, kiamil balna kidika laih kalkahnin dini walalapni balna trukwi uina dai, dawak gol bik mahni palni duwi kiuna dawak kipala dahlwa balna bik sihm kaput duwi kiuna dai. Dawak Salomón muhni yakat kiuna kat, witing ais kalyulwi dakanin kulna balna kidika bitik laih yulwi dakana dai,

³dawak Salomón yaklauwi nangnitlana dai kalyulwi dakawa balna bitik kidika. Kalyulwi dakawa yulni balna kidika as bik laih nangnitlanin sip-awas laih awasdai.

⁴Sabá kingni yal kidika Salomón sinsni nuhni kidika talna dawak bik king ūni nuhni yamna kidika bik talna dai,

⁵witing tinibil kau kasnin dini auhni balna lakna kidika, dawak kalbauyang muihni balna panina bik amput duwa kidika, dawak witing dini yamyang muihni balna asninana kakawa kidika, tinibil yakat wain utuhwi ihilwa muihni balna kidika, dawak sakripais karauni kauna buswa kidika Papang ūni yakat, kidika balna bitik talwi, di taldas dini as talna

⁶bahang king yakat kalyulna: “Yang sauki yakat dakanayang man di yamnaman balna kidika dawak sinsma nuhni kidika bik, bahang kidika laih rahm ki;

⁷kaunah kidika balna laih rahm kulnikdai, waradika laih aiwanayang bahang dawak bik yang silp mikpa kau talnayang bahang. Di rahm kidika laih, papuswayah bik yāyuyulwasdai, man sinsma nuhni dawak di balna dutaman kidika, yang tapaki yakat dakanayang dai kidika.

⁸¡Man yalma balna[17] kidika amput isningnalakpa, dawak man dima yamyang balna adika ampat isningnalak dakakawapa, man yaihmat yakat ban dakakawa kidika sinsma lani nuhni kidika!

⁹¡Man Papangma Dawan ayangni kidika nuhni yamna karang, man yakat yamni matalwi Israel tronni mana kidika! ¡Dawan, Israel yakat ban kaput dalani kaltalwa kidika, man king mahana, kaput laih man la balna kidika barangni kat yamna atnin dawakat la kat bik yamna atnin!”

¹⁰Usnit kat yal kidika yaklauwi king yakat kalana gol, kilo 3,960, kaput bik laih di walapni balna kidika bik mahni dawak kipala dahlwa balna kidika bik sihm kaput kalana dai. Wat as bik Israel yakat di walapni mahni kaput kiwi kawasdai king yal Sabá yaklauwi king Salomón yakat kalana kidika.

¹¹Baisa minit yakat, Hiram kumani kuring balna gol duwi uina dai Ofir kaupak, dawak kidika yakaupak bik sándalo panan bik mahni duwi uina, dawak kipala dahlwa balna bik manas palni.

¹²Sándalo panan yakau Dawan ūni barannida kidika daklana dai, dawak king ūni bik, dawak kaput bik laih paswi yakisdinin dini balna bik yamna dai. Wat as bik tatalwasdai, dawak warmani kat bik, sándalo panan mahni kaput.

¹³Dawak king Salomón yaklauwi laih Sabá kingni yal yakat kalana dai, witing ais kalyulna balna kidika bitik, dawak baisa minit yakat witing palni bik yaklauwi kalana kidika ūk dai. Kidika usnit kat king yal kidika witing sauni kau mahka kiuna, dini yamyang balna karak kalpakwi.

¹⁴Salomón witing kurih kaiwa bitik yakat gol duwadai kidika laih kilo tausin 22 dai,

¹⁵dawak di wauhwi bakanyang balna tunan minit lauwi kalalawa kidika laih banawi kulwasdai, dawak Arabia kingni balna bitik, dawak kabamintni balna bitik kidika sauni yakat.

¹⁶King Salomón yaklauwi pakwak yayamna dai kalbauyang balna nanitna daknin dini nunuhni gol kau manah 200, bahang nanitdaknin dini as kidika gol kilo tiaskauas karak duwi yamna dai.

¹⁷Dawak kaput bik laih kalbauyang balna nanitna daknin dini binina kidika andat bās yayamna dai, bahang kidika dini aslah gol kilo as minit kau papusdak praisni kau duwi yamna dai, dawak kidika dini balna laih king ūni ayangni “Líbano asangnipas” kidika yakat uiwi āna dai.

¹⁸Kaput bik laih sihwak yayamna dai trun as, marfil kau, dawak bik paknadai gol kau manah kahna atnin.

¹⁹Tronni kidika laih kilitna tiaskauas duwadai, dawak dangni taihwa kidika laih tuyulni yudutni kat āna dai, dawak yalahwa yaihnit kau tingni taihnin balna kidika yaihnit nabupak āna dai, dawak kidika yaihnit yakat layan bu yaklauna raudai kalnina kau.

²⁰Dawak kaput bik laih layan 12 bik bangdai kalnina kau yaklauna, kilitna tiaskauas kidika kilitna as kau bu bu āna dai, nakas kau as, as. ¡Wat as bik laih king kakana balna kidika pa ūk yakat kapat yayamwasdai!

²¹Baisa minit yakat king sūnitak balna kidika bitik laih gol kau manah yamna dai; dawak king ūni “Líbano asangnipas” kau tibil yakat di lakwi ilwa balna kidika bik gol manah dai. Lalah kau di yamna balna kidika satni laih as bik disdai, kat king Salomón mani balna yakat laih kidika dini balna laih minit nuhni kulwasdai bahang,

²²kat Tarsis kumani kuring balna king duwa kidika kurih bās pasyakat wat as kiwadai, Hiram kumani kuring balna karak kalpakwi, bahang kidika duwi aiwadai gol, lalah, marfil, urus, dawak pikak balna bik.

²³King Salomón laih, sauni kingni balna kidika bitik minitna bayakna dai ritsni dawak sins lani bik.

²⁴Muih bitik laih dakakih diawadai sins nuhni kalana kidika Papang yaklauwi,

²⁵dawak kurih bitik yakat muih balna kidika witing yakat di uiwi kalalawa dai prisant: lalah kau di yamna balna kidika, gol kau yamna balna kidika bik, kalmuknin dini, kalbaunin dini, di walalapni balna, aras dawak muyul bik.

²⁶Salomón witing uduhna dai kar dawak aras kilyang muihni balna bik. Duwadai kar 1,400 dawak, aras kilyang balna laih tausin 12, bahang kidika balna laih kalbauyang ūni pararasni kau kalbaunin kārni balna bangkidika yakat, dawak kaput bik laih Jerusalén kau kalbauyang muihni balna king yaihnitkau bangkidika yakat bik.

²⁷King yaklauwi yamna Jerusalén yakat lalah kidika sihm kipala kapat atnin manas palni; dawak bik suhun kidika manas palni atnin sihm ani damni sau langni kau manas kapat.

²⁸Salomón aniras balna kidika laih Muzri[18] kaupak duwi uiwadai, dawak Cilicia kaupak bik, kat king ūni kau di wauhwi bakanyang balna kidika laih kidika pāni kaupak bakakanwadai.

²⁹Kār as Egipto kaupak duwi uiwa kidika minit laih lalah dadasni andat 600 dai; dawak aras laih minit 150 dai. Dawak hitita kingni dawak sirio kingni bik, Salomón munah bakakanwi duduwadai.