Read Mayangna 1 Reyes 11 Bible Online

1 Reyes 11 - Mayangna bible

1 Reyes 11

¹Fero walanibis yal kidika manah bik awasdai, kaunah yayal sau ūk kaupak balna kidika manas laih dalani ditalna dai: moabita, amonita, edomita, sidonio dawak hitita;

²yuldarang kat, Dawan yaklauwi sau ūk yayalni balna kidika dunin awas atna dai kidika, kat sipki kulninna wirlana atnin witingna daninawan dauh yakat. Kaunah Salomón witing kidika balna yakat dalani ditalwa kidika yulni duna dai kidika yayalni balna.

³Witing yalni balna pāni kidika 700 duna dai, dawak ialni balna kidika laih 300, bahang kidika balna yaklauwi kulnin kidika satuk wirlalana dai.

⁴Salomón, witing uman muihbarak kalna kat, yalni balna kidika yaklauwi kalyayamwak dawan dauh balna yakat wiryaklana dai, kat witing kidika bitik palni laih Papangni Dawan tingni yakat kawasdai, witing papangni Devid yamna kapat.

⁵Salomón, witing Astarté yakat prinias yamna, sidonio daninawan dauh yakat, dawak dawan dauh dutni Milcom yakat bik, amonita daninawan.

⁶Kaput laih, Salomón di yamna balna bitik kidika Dawan minikpa yakat dutni dai, kat Dawan yakat barangni awasdai bahang, witing papangni Devid yamna dai kapat.

⁷Kidika mani balna yakat, Jerusalén kaupak ma kilwa niningkauh yakat Salomón witing Moab daniwan dauh dutni Quemós yakat ūni as yamwi kalana, dawak amonita daniwan dauh Moloc yakat bik.

⁸Witing yalni balna pa ūk kaupak balna kidika bitik yakat kaput yamna dai, bahang kidika yayal balna kidik sakripais bubuswadai dawak walapni bik bubuswadai daninawan dauh balna yakat.

⁹Dawan, israel Papangni kidika, kulnin daukalna dai Salomón niningyakat, kat witing kulnin kidika witing kaupak naikau kalahkiuna dai bahang, watbu witing yakat lāih kalahna dai karang bik

¹⁰dawak witing yaklauwi paknadai, dawan dauh balna yakat prininaias yamnin awas. Kaput kaunah witing Dawan yulni dakawas danadai pakna kidika.

¹¹Kaput bahang, Dawan yaklauwi Salomón yakat kalyulna: “Man kaput yamtada bahang, dawak lā balna manayang yakat bik yamtas danaman bahang, man kingma lani kidika dakyaktik kalana awaki man dima yamyang as kau.

¹²Kaput kaunah, papangma Devid yulni laih, yang kaput yamtas awaki man sangkaman mani balna yakat; kaunah man walamabis kau laih dakyakna awaki.

¹³Kaunah king kawa kidika bitik laih dakyaktas awaki: sulani aslah kau dana awaki, man papangma yulni dawak Jerusalén yulni bik, tawan nuhni as yang walyaktik dunayang kidika.”

¹⁴Kaput laih Dawan yaklauwi yamwak Salomón niningkauh waihla as yaklauna: Hadad, Edom kaupak, kidika laih Edom kingni walanibis palni dai.

¹⁵Devid minit bayakna kat[19] Edom yakat, Joab kidika kalbauyang balna taninatuna nuhni dai, bahang witing kiuna dai, kalbauwi dadauna balna kidika nuna atnin, bahang kaput laih Edom ahalni balna kidika bitik imukna dai;

¹⁶kaput laih waiku tiaskauas kidika yakat watna dai, Israel muihni balna bitik karak, Edom ahalni balna kidika bitik imukna kat.

¹⁷Kaunah Hadad laih kidika mani muihbin dai, bahang witing papangni dini yamyang balna as karak kalpakwi kirana dai Egipto yakat.

¹⁸Madián kaupak kalahwi Parán kat uiwi kakana dai, dawak kidika pāni yakat ahal buas duduna dai witingna dinina yamna atnin yulni. Egipto yakat uiwi kawi Fero muhni yakat uina dai, Egipto kingni, dawak witing yaklauwi ū diana dawak di kasnin bik diana dai, dawak sau bik prisant diana dai.

¹⁹Hadad laih witing Fero yaklauwi yamni kaltalna dai bahang yalni wirahni as kalana dai witing yalni atnin, yuldarang laih Tahpenes kidika wirahni yal kidika kalawak duna dai.

²⁰Dawak Tahpenes wirahni yal kidika yaklauwi Hadad yakat walanibis al as kalana dai, bahang ayangni laih Genubat, bahang kidika muihnibin laih Tahpenes yaklauwi fero ūni yakat duwi muhna dai, witing walanibis ahal balna karak libitwi.

²¹Hadad dakana Egipto yakat, Devid dauna atwak, dawak Joab bik kalbauyang balna taninatuna nuhni dai kidika, bahang Hadad yaklauwi fero yakat kalyulna: —Yang yadatang kat sauki yakat nawattik yawakuh.

²²Fero yaklauwi nangnitlana: —¿Ais yamta sauma yakat kiunin kultamahn? ¿Yang yaihkit akat baisa di as dismanh? Hadad yaklauwi nangnitlana: —Di as bik dukih yāwaski, bitik dutayang, kaunah yadatang kat nawattik yawakuh.

²³Baisa minit yakat, Papang yaklauwi yamwak, Rezón bik Salomón niningyakat yaklauna. Rezón laih Eliada walanibis dai, bahang witing laih dini yamyang Hadad-ezer kidika tingni kaupak kiri yaklana dai, bahang kidika alni laih Soba kingni dai.

²⁴Ahal buas uduhwi duna dai, dawak witing kidika laih dimalyang balna taninatuna as dai. Devid yaklauwi muihni balna kidika īna kat, Rezón laih Damasco yakat kiri kiwi watwi king kanadai.

²⁵Salomón sangka dai mani yakat Israel balna waihninala as dai, witing kidika, dawak witing laih Hadad karak aslah kalalahna, kat Israel yakat dutni talwa dai bahang. Kaput laih Rezón kidika Siria kingni kana dai.

²⁶Nabat walanibis Jeroboam bik king niningkauh yaklauna. Jeroboam laih king Salomón dini yamyang nuhni as dai, Sereda tawanni nuhni yakat, dawak witing kidika laih Efraín sulani as dai. Witing nanangni laih tingmak dai, ayangni laih Zerúa.

²⁷Jeroboam, king niningyakat yaklauna kidika laih adika yulni yaklauna dai: Salomón laih witing papangni Devid tawanni nuhni kidika yakat sau uhwi mukwi ilwa likdai, dawak bik sulihni balna kidika lamawa likdai.

²⁸Jeroboam laih al as parasni dai dawak ais yamnin kulwa kidika yamwa dai; dawak Salomón witing talwak kidika wahma laih wark yamni kalahwak, José sulani balna kidika bitik laih witing tingni yakat āna dai.

²⁹Kidika mani balna yakat, Jeroboam witing Jerusalén yakat kalahna, bahang tapas yakat prapit Ahías karak kalpakna, Silo kaupak kidika, bahang witing laih kalmuknin dini wisam kat kalmukwi kiwalikdai. Witing kidika albulah dai yamak yakat,

³⁰Ahías witing kalsuruhmnin wisam kat kalmukna kiwalikdai kidika duwi pis 12 bisna,

³¹dawak Jeroboam yakat kalyulna: “Adika pīsni salap man dutah, kat Dawan Israel Papangni kidika mayulwi: ‘Salomón king kawa kidika dakyakki ki, dawak man yakat sulani salap kidika makiki.

³²Dawak Salomón yakat laih sulani balna kidika aslah kalakiki, yang diki yamyang Devid yakat kalkultayang kidika yulni, dawak Jerusalén yulni bik, kat kidika tawanni nuhni laih Israel sulani balna paskaupak waltik yaknayang bahang.

³³Kat Salomón laih yang adika yadapamna, dawak sidonio balna daninawan Astarté yakauh minityulwi; dawak moabita balna daninawan Quemós yakat bik minit yulwi, dawak kaput bik laih amonita balna daninawan Milcom yakat bik. Witing di yamna balna kidika yang mikpa yakat yamni awasdai, dawak yang lāki kat bik yamwasdai, witing papangni Devid yamna kapat.

³⁴Kaput kaunah, witing king kawa kidika bitik palni laih dakyakwas awaki, kaunah kabamint as kapat dukiki, witing sangka akat, yang diki yamyang Devid yakat kultayang kidika yulni, bahang yang lawik witing kidika waltik yaktik dunayang dai, dawak witing yang lāki balna kidika yakat yamna dai.

³⁵Kaunah witing walanibis yakat laih king kawa kidika dakyakki, dawak man yakat makiki, yuldarang kat, sulani salap balna kidika.

³⁶Sulani aslah manah witing walanibis yakat kalakiki, kaput laih yang diki yamyang Devid awasni kidika ban piwas atnin yang muhni dawak Jerusalén yakat bik, tawan nuhni as waltik yaktik dunayang kidika, yang ayangki kidika ban sak atnin yulni, kidika pāni yakat.

³⁷Yang man yakat maduki, man king āwanam, amput atnin kultaman yakat, dawak man kidika Israel kingni atnam.

³⁸Dawak yang lawik yamnin mapaktayang yakat yamma kat, dawak yamtaman balna kidika yang mikpa yakat barangni karangkat, dawak bik lāki yakat yamma kat, yang diki yamyang Devid yamna kapat, yang mankarak awaki, dawak king āwaman lani kidika sulama balna kau bik ban kiwarang, Devid yakat kalanayang dai kapat; dawak Israel kidika mana awaki.

³⁹Devid sulani balna kidika laih, kidika yulni wah diaki, kaunah ban kaput laih awas karang.’ ”

⁴⁰Adika yulni, Salomón witing inin yamna dai Jeroboam yakat, kaunah Jeroboam kidika Egipto yakat kiri kiuna dai, bahang kidika mani balna yakat Sisac kidika king kāwadai, kaput laih kidika yakat watna dai Salomón dauna kat.

⁴¹Salomón yulni sutni balna kidika dawak sinsni lani nuhni kidika balna laih Israel kingni balna yulnina uhulna kidika yakat ulna ki.

⁴²Salomón witing Jerusalén yakat king kana, Israel balna bitik minitna yakat, kurih 40,

⁴³dauna kat witing papangni Devid tawanni nuhni yakat uiwi nununa. Kidika usnit kat walanibis Roboam kidika pāni yakat king kana.