Read Mayangna 1 Reyes 12 Bible Online

1 Reyes 12 - Mayangna bible

1 Reyes 12

¹Roboam witing Siquem yakat kiuna, kat Israel muihni balna kidika bitik uina dai bahang, kidika yakat witing kidika king āna atnin.

²Kaunah Nabat walanibis Jeroboam kidika dakana, witing laih baisa Egipto yakat yalahwa dai, kat Salomón niningkaupak kiri kiuna dai bahang, kaput laih witing kidika yakat watwi yalahna dai bahang.

³Kaput laih kalyuyulwak kiuna Jeroboam dawak Israel muihni balna bitik, witingna kalpakwi uina Roboam karak yulbauna atnin, dawak kalyuyulna:

⁴—Man papangma laih dadasni palni dai yangna nikingnakauh; waralaih man lawa wark parasni kidika kaupak apis ingni yanayamtah, truknin tikini yana āna dai kidika kaupak, bahang yangna man dima yamtanaki.

⁵Roboam yaklauwi nangnitnalana: —Yawanauh, kaunah ma bās kat uiwa yatalnauh. Kaput laih muih balna kidika mahka uina.

⁶Kaput laih king Roboam kidika muihbararak balna witing papangni Salomón dini yayamna balna dai yakat diyulwi dakana: —¿Manna ais yasumaltamanah, kidika muihni balna yakat biritik nangnitnalanik kidika?

⁷Witingna yaklauwi kalyuyulna: —Warmani adika tawanni warkni yamtaman dawak yul yamni karak nangnitnalama kat, witingna ban dima yayamwakarang.

⁸Kaunah Roboam witing muihbararak balna yulnina kidika dakawas dana, dawi witing karak aslah bararakna wawahnima balna yakat diyulwi dakana, bahang kidika balna laih witing dini yayamwa dai,

⁹dawak diyulwi dakana: —¿Manna ais yulni yayultamanah, kidika muihni balna yayuyulna kidika, papangki yaklauwi truknin tikini diana dai kidika kaupak ingni yamna atnik?

¹⁰Kidika wawahma balna witing karak bararakna balna dai kidika yaklauwi kalyuyulna: —Kidika muihni balna man yakat mayuyulna kidika, papangma yaklauwi truknin diana kidika kaupak ingni yamna atnam, aput diyulnam ki: ‘Yang papangki kidika parasni dai kat, yang laih baisa tanit parasniyang;[20]

¹¹witing yaklauwi truknin tikini manana kat, yang laih baisa tikini yamki; dawak witing wah kau manawiswadai kat, yang laih wisnin wahni kidika sutni yakat ayan duwa karang.’

¹²Ma bās yakat Jeroboam watwi tawan muihni balna karak kalpakwi uina Roboam yakat, king yaklauwi diyulna dai kaput.

¹³Kaunah king kidika yaklauwi yul parasni kau nangnitnalana, muihbararak balna yul kalyuyulna kidika dakawas dawi,

¹⁴wawahma balna witing yakat kalyuyulna kaput witing yulna dai: witing papangni yaklauwi truknin tikini diana dai kat, witing yaklauwi baisa tikini kat diana karang, dawak bik witing papangni yaklauwi wah kau diwisna dai kat, witing laih wisnin wahni sutni yakat ayan duwa kidika kau diwisna karang.

¹⁵King laih, witing tawan yulwa kidika dakawas dana, kat Dawan yaklauwi kaput kalahnin yamna dai bahang, Dawan yaklau Jeroboam Nabat walanibis yakat pramis yamna yakat kalahna atnin yulni, bahang kidika laih prapit Ahías Silo kaupak kidika munah kalyulna dai.

¹⁶Israel tawanni balna bitik witingna tatalwak king kidika yulnina dakawas dawak, aput nangnitlalana: “¡Mayang Devid karak di as bik diskitalna atnin! ¡Dipahni as bik sahyakdi dudaskiIsaí walanibis karak! ¡Israel balna ūmana kau yawanauh! ¡Devid witing walanibis balnamaintalwang!” Kidika minitni yakat Israel balna kidika bitik ūnikau uina.

¹⁷Dawak Israel balna Judá tawanni nunuhni yakat yalalahwa balna dai kidika, Roboam ban witingna minitna yakat king kana.

¹⁸Dawak Roboam witing Adoram kidika sihna dai, kat witing laih taihwi dipakwak wark yayamwa kidika tanituna dai bahang, dawak Israel balna bitik yakluwi kipala kau barhwi ihina. Dawak kaput laih Roboam witing sirihni palni kārni yakat kilwi kiri kiuna Jerusalén yakat.

¹⁹Kaput laih Israel kidika Devid king kawa lani ban kiwa kidika niningyakat yaklalauna warmani kat.

²⁰Israel muihni balna kidika dakakana Jeroboam kidika nawatwi kiuna atwak, witingna kalyuyulna tawan muhni yakat kiuna atnin, kaput laih kiwak Israel balna bitik yaklauwi king ahana, kaput laih muih as bik Devid kingni lani yakat barangni awasdai, kaunah Judá sulani manah laih.

²¹Roboam, witing Jerusalén yakat kiwi kawi kalbauyang muihni balna kidika tausin 180 uduhna, kidika laih Judá sulani balna dawak Benjamín sulani balna kaupak bik walwi yakna dai, Israel niningyakat kalbauwi kingni lani kidika bitik dakyakna atnin.

²²Kaunah Papang yaklauwi Semaías yakat yulkalbauna, Papang alni dai yakat, pakna dai:

²³“Salomón walanibis Roboam yakat kalyultah, Judá kingni yakat, kaput bik Judá sulani, Benjamín sulani dawak tawan muihni balna bitik yakat bik diyultah,

²⁴witingna wirahnina Israel balna niningna kauh kalbaunin awaski. Witingna bitik nawatwi ūnina kau uiwang, kat yang lawik kaput yamtayang bahang.” Witingna Dawan yulwa kidika dakawi mahka ūnina kau uina, Dawan yaklauwi dipakna kaput.

²⁵Jeroboam yaklauwi Siquem tawanni nuhni kidika watwi laihwi dulauwi yamwi, kidika laih Efraín asangnipas yakat ki, dawak kidika yakat witing pāni duna. Kidika usnit kat Penuel kidika bik laihwi dulauwi yamna dai.

²⁶Kaunah witing kulna: “Devid sulani balna king kawi aiwa kidika sipki watwi dakyakwi dunin,

²⁷adika muihni balna Jerusalén yakat uiwi Dawan ūni yakat sakripais yayamwarang kat. Sipki Roboam Judá kingni yakat watwi yamni kaltalnin, dawak kaput laih yaihiwarang dawak Roboam Judá kingni yakat watwi nawatwi uinin.”

²⁸Adika yulni yulwi dakana usnit kat, king witing turuh wayani bu yamna dai, dawak tawan muihni balna yakat diyulna: “Manna, Israel muihni balna, Jerusalén yakat wat mahni yawanamana. Akat manna damanawan dutamana, Egipto kaupak manayakna kidika.”

²⁹Kaput laih Betel yakat as asakna, dawak Dan yakat ūk āna dai.

³⁰Dawak kidika yulni Israel dutni yamna, kat muih balna kidika Betel yakat uiwa dai dawak Dan yakat bik witingna kidika yakat ayangni nuhni yamna atnin.

³¹Dawak dawan dauh balna ūnina bik pakna dai, dawak tawan sumalniyang balna bik āna dia, kidika balna laih libait balna awasdai.

³²Baisa kidika minit yakat alasna yamnin mani bik āna dai, kidika laih waiku tiaskaubās kawak ma 15 yakat dai, dawak Judá kau yayamwa kapat yamna dai, dawak witing palni sakripais busnin pāni yakat sakripais busna dai. Kidika laih witing Betel yakat yamna dai, turuh wayani witing yamna balna dai yakat, dawak kaput bik laih kidika balna ūni bik yamwi sumalyang balna bik āna dai kidika.

³³Kaput laih, waiku tiaskaubās kawa kaupak ma 15 yakat, Jeroboam witing sakripais busnin pāni yamna dai kidika minit yakat sakripais busna dai Betel pāni yakat. Adika laih alasna wainiku dai, witing silp amput akih kidika yakat yamna dai, dawak kidika mani laih witing yaklauwi āna dai Israel balna alasna duduwa mani, bahang sihm kidika wainiku yakat witing walapni busna dai.