Read Mayangna 1 Reyes 13 Bible Online

1 Reyes 13 - Mayangna bible

1 Reyes 13

¹Jeroboam kidika witing sakripais busnin pāni yakat sakripais as buswasakkat, Betel yakat Judá pranipit as kiuna, bahang kidika laih Dawan yaklauwi sihna dai.

²Dawak Dawan yaklauwi parasni yulnin pakna kaput parasni yulna dai sakripais busnin pāni niningyakat, aput yulna: “Sakripais busnin pāni, sakripais busnin pāni: Dawan yaklau aput yulna: ‘Devid sulani balna king kawi aiwa kidika paskaupak muihbin as batahndana karang, kidika ayangni laih Josías karang, dawak witing yaklauwi man mamat yakat sakripais busna karang dawan dauh sumalniyang balna man mamatyakat walapni bubuswa muihni balna kidika; dawak man mamatyakat muih wakalni kidika bubusna karang.’ ”

³Sihm kidika mani, prapit yaklauwi sain taldas dini kidika yamna. Dawak yulna: “Adika kuduh Dawan yaklauwi sain as taldas dini yamnin yulna kidika: Sakripais busnin pāni kidika bahwi uhwarang, dawak kidika minit yakat wanan bangkidika bik wauhnakarang.”

⁴King Jeroboam, witing prapit yaklauwi, Betel kau sakripais busnin pāni kidika niningkauh yulwak dakawi kidika, sakripais busnin pāni kidika kaupak tingni dulau dawi yulna: “¡Laihtanauh!” Kaunah witing tingni dulauwi yuna kidika dadasni kalna dai, bahang sip itikwas dana dai.

⁵Kidika minitni yakat sakripais busnin pāni kidika bahwi uhna dai, dawak wan bangdai kidika uhwi wauhna dai, prapit yaklauwi yulna kaput, Dawan yaklauwi pakwak.

⁶Kaput dawak king kidika prapit yakat kalyulna: —Man kalma dinit yakat buktik yultayang, man Papangma Dawan yakat yang yulki mamatyultah, yang tingki adika yamni kalnin yulni. Prapit witing Dawan kalni dinit yakat bukwi yulna, dawak king tingni kidika watwi yamni kalna dai, muhnilau dai kapat.

⁷Usnitkat king yaklauwi Prapit yakat kalyulna: —Man yangkararak aiwah ūki yakat di apis kastah, dawak bik di prisant as maki.

⁸Kaunah prapit yaklauwi king yakat kalyulna: —Man ūma kidika papuswayah yama bik yang sip man karak yawasyang, dawak adika pāni akat di kastas awaki dawak bik was ditas awaki;

⁹kat Dawan yaklauwi kaput yayulna bahang. Yayulna: ‘Plawar busna kasna dawak was bik dinah yatna, dawak yawanaman tani munah bik nawatwi kaiwinih.’

¹⁰Dawak prapit kidika nawatwi kiuna ta ūk duwi, witing Betel yakat kiuna tani kidika munah kiwasdai.

¹¹Kidika mani balna yakat, Betel yakat prapit muihbarak as yalahwadai, bahang kidika walanibis ahal balna kidika tatalna Judá pranipit di balna yamna kidika Betel pāni yakat, bahang papangnina yakat uiwi kalyuyulna; dawak bik papangnina yakat kalyuyulna king yulna balna kidika bik.

¹²Dawak papangnina yaklauwi diyulwi dakana: —¿Angdika tani munah kiunayah? Dawak walanibis balna kalyuyulna Judá pranipit angdika tani munah kiuna kidika.

¹³Kaput laih walanibis balna yakat diyulna: —Birikiku dangni ilta yatanauh. Dawak witingna yayamna diyulna kaput, dawak prapit kidika kilwi

¹⁴mahka kalahwi kiuna, Judá pranipit usnit yakat. Dawak kiwi kuihna kirah panan as kat dinit yakat yalahna sakkat, dawak kalyulwi dakana: —¿Manyah prapit as Judá kaupak kaina kidika? —Yang —kalatna.

¹⁵—Yang ūki yakat aiwa, plawar busna kastah —prapit muihbarak kidika kalyulna.

¹⁶Kaunah Judá pranipit kidika yaklauwi nangnitlana: —Yang sip-awasyang man karak yawinik, dawak bik man karak plawar busna kasnik was bik dinik, adika pāni akat;

¹⁷kat Dawan yaklauwi lāih yayulna: ‘Plawar busna kasna, dawak was bik dinah adika pāni akat, dawak yawanaman tani munah bik nawatwi kaiwinih.’

¹⁸Kaunah muihbarak kidika watwi kalyulna: —Yang bik prapit yang, sihm man kapat, dawak insal as Dawan kaupak kiwi adika yulni balna yayulna, yang ūki yakat maduyawik di mating kasnam dawak dinam bik. Dawak muihbarak kidika alas kalyulwa bik,

¹⁹Judá pranipit kidika kiwi witing karak di kasna dawak bik dina, kidika ūni yakat.

²⁰Dawak witingna tibil yakat yalahna raukat, Dawan yaklauwi prapit muihbarak yakat kalyulna, witing yaklauwi Judá pranipit yakat kalyulwak nawatwi kiuna yakat muihnibarak yakat,

²¹dawak yulni parasni karak yulna dai muihbarak kidika yaklauwi as yakat: —Dawan yulna, witing yamnin mapakna kaput yamtas danaman,

²²nawatta yawa di kasnaman dawak bik dinaman, bahang kidika kuduh Dawan yaklauwi mapakna dai kaput yamnin awas, bahang man muihma kidika sau ū yakat watwas karang, man muihmabararak balna nununa yaihnit yakat.

²³Judá pranipit kidika dikaswi, diwi dahn dawak, prapit muihbarak kidika yaklauwi biriniku dangni ilwi kalana,

²⁴dawak Judá pranipit kidika mahka kiuna. Kaunah tanipas yakat layan as kalahwi īna, dawak muihni nuhni kidika tapas yakat tusdai. Kaput kaunah layan dawak biriku karak laih muih dauna tuskidika yaihnit yakat raudai.

²⁵Kidika munah muih ahal buas bayakwi tatalna muih dauna muihni kidika tuskat, dawak layan kidika ban yaihnit yakat sakkat. Dawak tawan nuhni yakat uiwi kakana kat prapit muihbarak yakat kalyuyulna witingna tatalna kidika.

²⁶Witing amanglawi, prapit muihbarak yaklauwi kalyamwak as kidika nawatwi kiuna dai kidika, parasni yulna: “Kidika prapit kuduh Dawan yulni lāwadai kidika. Kidika bahang Dawan yaklauwi layan yakat pakna bahang īna, Dawan yaklauwi yulna dai kaput.”

²⁷Kidika usnit kat walanibis balna yakat diyulna biriku as dangni ilwi kalanin, dawak witingna kidika kaput yayamna.

²⁸Kaput laih prapit muihbarak kidika kiuna, bahang talna muih dauna muihni kidika tuskat tapas yakat, dawak kidika yaihnit yakat layan dawak biriku bik raudai.

²⁹Kaput laih prapit muihbarak kidika yaklauwi Judá pranipit dauna kidika dulauwi biriniku minit yakat iltuswi witing karak nawatwi kiuna witing tawanni nuhni yakat, dalani dakawinah nuna atnin.

³⁰Witing sauniū yakat nuna, witing yulni kaidi aput yulna: “¡Alakaih, yang wirahki!”

³¹Kidika nuna usnit kat walanibis ahal balna yakat diyulna: —Yang dautingkat, sihm kidika sauni ū Papang alni nutikda yakat yanutanama. Dawak yang muihki nuhni kidika witing muihni nuhni karak libittanama,

³²Dawan pakwak yulna kidika rahm palni kalahwarang Betel kau sakripais busnin pāni kidika niningkauh dawak dawan dauh balna ūni niningkauh bik yulna kidika Samaria tawanni nunuhni balna paskau kidika balna yakat.

³³Kaput dai kaunah Jeroboam witing dutni yamwa kidika dawasdai, nawatkauh laih tawan muihni balna paskaupak walwi yakwi sumalyang balna āna dai, dawan dauh balna prinias ūni balna yakat. Wais kaput dukih kalawa kidika Jeroboam yaklauwi blisdiyamwadai dawan dauh ūni yakat sumalyang atnin.

³⁴Kaput yamwa kidika yulni Jeroboam sulani balna kidika dutni yayamna, bahang kidika yulni laih bitik palni dismukna.