Read Mayangna 1 Reyes 15 Bible Online

1 Reyes 15 - Mayangna bible

1 Reyes 15

¹Abiam, Judá yakat king kana, Nabat walanibis Jeroboam king kana kurih 18 laihna kurihni yakat.

²Jerusalén yakat kurih bās king kana. Nanangni ayangni laih Maaca, dawak witing kidika laih Salomón walanibis yal dai.

³Abiam laih witing papangni dutni yamna dai kidika sihm kaput yamna dai, dawak witing Papangni Dawan yakat isning barangni awasdai, Devid yamna kapat, witing muihnibarak dai kidika.

⁴Kaput kaunah, Devid yakat kulwa kidika yulni, Dawan yaklauwi kalana dai Devid lampni kidika pinin awas ban dahlwa atnin Jerusalén yakat, witing usnit yakat walanibis kidika trun yakat kilna dai Jerusalén kidika ban laihwi duna atnin;

⁵Devid witing duwi kiuna kidika laih yamni palni dai Dawan muhni yakat, kat sangka dai mani yakat watas bik Dawan yaklauwi yamnin kalyulna dai kidika kaupak dawak bayakwas dai bahang, kaunah hitita alni Urías kau yamna kidika manah laih.

⁶Roboam sangka dai kidika mani balna yakat Jeroboam karak war kalbabauwa kidika ban dai. Dawak kaput bik laih Abiam dawak Jeroboam karak bik war kalbabauna dai. Abiam yulni umani balna witing di yamna kidika balna bitik laih Judá kingni balna yulnina uhulna wauhnitaya yakat ulna ki.

⁸Dawak Abiam dauna kat Devid tawanni yakat nununa. Kidika usnit kat witing walanibis Asa kidika king kana.

⁹Judá yakat Asa king kana, Israel yakat Jeroboam king kana kurih 20 dai yakat,

¹⁰dawak Jerusalén yakat kurih 40 king kana dai. Witing titingni laih Maaca dai, Absalón walanibis yal.

¹¹Asa yamna balna kidika Dawan minikpa yakat yamni dai, witing muihnibarak Devid yamna kapat.

¹²Ahal wahnina dutwi yayal karak kalduduwa prinias yayamwa balna dai kidika bitik kangwi yakna, dawak muihnibararak balna dawan dauh wayani yayamna balna dai kidika bitik yakmukna.

¹³Dawak Maaca kidika king yayal balna nanangnina kapat kalduduwa dai kidika kulnin bik dapamna, kat witing yaklauwi pakwak Asera wayani as yamna dai bahang. Kaput yamwi kidika wayani dai kidik Cedrón wasni yakat dukiwi buspamna.

¹⁴Dawak dawan dauh balna ūnina kidika bitik yakmukwas dana dai kaunah, Asa laih Dawan yakat barangni dai,

¹⁵dawak Dawan ūni yakat gol dawak lalah kidika bik āna dai, witing papangni karak, Dawan yakat kidika dini balna kalalana dai.

¹⁶Asa dawak Israel kingni Baasa karak witing war kalbabauwa kidika ban dai.

¹⁷Baasa yaklauwi kiuna Judá niningyakat kalbauna atnin, dawak Ramá kidika parasni yayamna, kidika tanka laih Judá yakat yul as bik bayaknin awas yulni.

¹⁸Kaput laih Asa witing Dawan ūni yakat gol dawak lalah bik bangdai kidika bitik duna dawak kaput bik king ūni yakat bangdai kidika balna bik, dawak witing king kawa kau muih wark kalalahwa balna munah sihna Siria kingni Ben-adad yakat, witing laih Tabrimón walanibis dai, dawak Hezión mani, bahang witing ūni duwa dai Damasco yakat. Dawak adika yulni bik kalsihna:

¹⁹“Man yang karak pramis as yamdang, mayang mapapangki balna yayamna dai kapat. Akat masihtayang prisant dini gol dawak lalah bik. Israel kingni Baasa karak pramis yamnaman kidika datah, dawak kaput laih kulnik aslah yadawarang.”

²⁰Ben-adad, witing yamni talna, king Asa yulwa kidika, bahang kaput laih witing kalbauyang muihni balna taninatuna duwa kidika sihna, Israel tawanni nuhni balna kidika niningyakat kalbauna atnin. Kaput laih kalbauwi dakyakna dai Ijón, Dan, Abel-bet-maaca, Cineret bitik dawak Neftalí sauni kidika bitik.

²¹Baasa witing dakana kat, Ramá kau baisa parasni yamwasakdai kidika mahka dawi kiuna Tirsa yakat.

²²Kaput laih king Asa yaklauwi Judá muihni balna bitik yulwi duwi kiuna, muih as bik watwas dai, dawak Ramá kau kipala balna dawak pan balna duwi kiuna dai kidika Baasa, Ramá kidika baisa parasni yamnin yulni, kidika dini balna karak king Asa duwi Geba Benjamín dawak Mizpa kidika parasni yamna dai.

²³Asa yulni umani ūk balna kidika, di yamna balna kidika, tawan nunuhni yamna kidika balna bitik laih ulna ki Judá kingni balna yulnina uhulna wauhnitaya yakat. Muihbarak kalna kat, Asa witing kalni yakat siknis laihna;

²⁴dawak dauwak Devid tawanni nuhni yakat nununa. Kidika usnit kat witing walanibis Josafat kidika king kana.

²⁵Asa kidika Judá yakat king kana kurih bu duwakat, Jeroboam walanibis Nadab kidika king kana Israel yakat, dawak witing king kana kidika laih kurih bu manah king kana dai.

²⁶Witing di yamna balna kidika Dawan minikpa yakat dutnimanah dai; witing papangni dutni yamna balna dai kidika bitik laih witing bik dutni yamna dai, dawak kidika yamwa kidika kaupak Israel bik dutni yamna dai.

²⁷Kaunah Ahías walanibis Baasa witing laih Isacar sulani kaupak dai, malni kau witing niningkauh yaklauwi ihina Gibetón yakat, bahang kidika laih filisteo balna tawannina nuhni as dai bahang kidika tawanni nuhni yakat Nadab kidika awaihdakwa sakdai Israel muihni kalbauyang muihni balna karak.

²⁸Baasa yaklauwi Nadab yakat īna, Asa kidika Judá yakat king kana kurih bās laihna yakat, dawak witing pāni yakat king kana.

²⁹Witing king kana minitni yakat, Jeroboam walanibis balna bitik imukna. Dawan yaklauwi yulna dai kaput Silo yakat Ahías munah, Baasa yaklauwi Jeroboam walanibis balna bitik palni laih imukna dai. As bik laih sangka dawasdai.

³⁰Kidika laih Jeroboam dutni yamna kidika yulni kaput kalahna dai, witing yamwak yulni kaupak Israel balna bik dutni yayamna dai kidika, kaput Dawan israel Papangni kidika kulnin daukakalwa dai.

³¹Nadab yulni umani balna kidika, dawak di yamna balna bitik kidika laih Israel kingni balna yulnina umani uhulna wauhnitaya yakat ulna ki.

³²Asa dawak Israel kingni Baasa karak witingna war kalbabauwa kidika laih bandai.

³³Judá yakat Asa king kana kidika kaupak kurih bās laihwakat, Ahías walanibis Baasa kidika king kana dai Tirsa yakat, dawak Israel kidika bitik minit yakat kurih 24.

³⁴Kaunah Baasa yamna kidika Dawan minikpa yakat dutnimanah dai, Jeroboam dutni yamwak kidika yakat Israel balna bik talwi dutni yayamna dai kidika bitik witing bik yamna dai.