Read Mayangna 1 Reyes 17 Bible Online

1 Reyes 17 - Mayangna bible

1 Reyes 17

¹Prapit Elías, witing kidika Galaad sauni kau pa as ayangni Tisbe kidika kaupak dai kidika yaklauwi Acab yakat kalyulna: “¡Israel Papangni Dawan ayangni kau yaktik yultayang, witing dini yamyang yang adika, adik kurihni balna waslauwas karang, dawak diwas bik bukwas karang, yang wattik yulki kat laih dai!”

²Kidika bahang Dawan yaklauwi Elías yakat kalyulna:

³“Man akaupak yawah makilwa niningyakat, dawak Querit wasni yakat yawa maldah, kidika laih Jordán kaupak ma kilwa niningyakat ki.

⁴Bahang kidika yakat sip karang was dinam, dawak bik kuparis balna yakat dipaknayang kasnin dini balna kidika uiwi mana atnin.”

⁵Elías witing yamna dai Dawan yaklauwi pakna dai kaput, witing kiwi Querit wasnikung yakat watna dai, kidika laih Jordán kaupak ma kilwa niningyakauh ki.

⁶Dawak kuparis balna yaklauwi kasnin dini dawak plawar busna kidika uiwi kalalawa dai mapiris dawak maulahu bik. Dawak was kidika yakaupak witing diwa dai.

⁷Kaunah ma as as bayakwak was kidika buhlakna, kat kidika sauni yakat was lauwasdai bahang.

⁸Kaput laih Dawan yaklauwi Elías yakat kalyulna:

⁹“Lawa, Sidón sauni kau Sarepta tawanni nuhni yakat yawah, dawak kidika yakat wattah. Yang lawik paknayang, kidika pāni yakat yal tingmak as sakkidika yakat, bahang witing yaklauwi di mabayahwarang.”

¹⁰Elías yaklauwi Sarepta yakat kiuna. Kidika tawanni nuhni yakat kiwi kawi talwak yal tingmak as kuh anawalikdai. Kalyulwak kiwak kalyulna: —Plisma was apis sutak kau duaita yatang dikuh.

¹¹Yal kidika mahka duaikuhti kiwak, Elías yaklauwi watwi kalyulwak kiuna, dawak kalyulna: —Plisma plawar busna bik apis duaiyatah.

¹²Yal kidika yaklauwi nangnitlana: —Man Papangma Dawan ayangni kau yaktik yultayang, yang plawar busna as bik disyang. Sau suba yakat plawar tingkurus aslah dutayang, dawak bik disala kidika disala punin uni yakat apisbin dutayang, bahang waradika kuh waltalikyang dai kidika planiwar kidika bustik kasna atnik yang walakibis karak. Kidika kastanaki usnit kat dautanaki ki yuhkau.

¹³Dawak Elías yaklauwi nangnitlana: —Yamaduwinih. Man yulnaman kidika yawa yamtah. Kaunah tatuna laih, plawar dutaman kidika kau apisbin kuruhta busdata duaita yatah, dawak usnit kat ūkyamtah man walamabis karak dimana kidika.

¹⁴Kat Dawan, israel Papangni kidika yaklauwi yulna dai, plawar kidika puwa pāni kidika kaupak dahnkalwas karang dawak disala kidika bik sihm kaput karang, Dawan yaklauwi sau minit akat kalawak waslauwarang kat.

¹⁵Tingmak yal kidika witing kiwi yamna dai Elías yaklauwi pakna kaput. Witing yal kidika, walanibis al[23] dawak Elías bik, witingna mamahni dudunadai kasninna kidika.

¹⁶Plawar kidika witwasdai puwa pāni kaupak, disala kidika bik sihm kaput, Dawan yaklauwi yulna dai kaput Elías munah.

¹⁷Ma as as bayakwak yal tingmak walanibis al kidika siknis laihna, siknis kidika kaupak kalsuhdana dai, bahang kaput bik laih sip urupwas dana wingnita.

¹⁸Kaput dawak tingmak yal kidika Elías yakat kalyulna: —¿Man namang yakat ais duta yang, Papang alni? ¿Man aiwanaman dutki balna kidika isingkatna atnam dawak yamtangkat walakibis al adika dauna atnin?

¹⁹Nangnitlana: —Walamabis kidika akat yatah. Tingmak kidika barahnimak kaupak duwi, mayakat duwi kilkiuna, witing payahwa pāni yakat, bahang pāni yakat laktusna.

²⁰Usnit kat Dawan yakat yulni parasni kau yulna: “Dawan dawak yang Papangki, ¿adika yal tingmak akat bik dalani kalatang wauhwarangyah, witing ūni yakat payahtayang kidika, yamtang kat walanibis kidika dauwak?”

²¹Dawak kidika usnit kat, muih albin minit yakat watbās kalangna, dawak Dawan yakat yulni parasni kau sarahwi kalyulna: “Dawan dawak yang Papangki, ¡man kalma dinit yakat buktik yultayang adika muihnibin al adika watta sangnika kalatah!”

²²Dawan yaklauwi yamna, Elías kidik witing kalni dinit yakat bukwi yulwakidika, dawak muihbin al kidika watwi sangnika kalana.

²³Kidika minitni yakat Elías muihbin al kidika dulauna, dawak payahwa panikaupak duwi yaklakkiuna sau yakat, dawak nanangni yakat kalawi kalyulna: —¡Talah, walamabis al adika sangka ki!

²⁴Dawak yal kidika yaklauwi nangnitlana: —Waralaih amanglatayang, rahm palni man laih Papang alni as man, dawak man yultaman balna kidika laih Dawan yulni rahm balna kidika yultaman.