Read Mayangna 1 Reyes 18 Bible Online

1 Reyes 18 - Mayangna bible

1 Reyes 18

¹Ma balna kidika bayakwi kiuna. Kurih bās bayakwak usnit kat, Dawan yaklauwi Elías yakat kiwi kalyulna: “Yawah Acab muhni yakat, kat sau minit yakat was sihki bahang.”

²Elías witing Acab muhni yakat kiuna. Samaria yakat yuhlakna kidika laih parasni palni dai.

³Acab, witing dini maintalyang tunan dai kidika yulwak kiuna, Dawan yakat parasni palni nuhni kulwa dai kidika,

⁴Jezabel mahka Dawan pranipit balna iwak, prapit 100 duwi dawi uduhna bu sahyakna 50, 50, bahang kidika balna laih pa sulihni bu raukat yakat dukiwi malna dai, dawak kasninna bik diana dai.

⁵Acab yaklauwi Abdías yakat kalyulna: —Lawang mawi taldang was tuna burhwa balna kidika, was murwa balna kidika, sipkarangpa sihr yaknin aras dawak muyul balna sangka atnin yulni. Kaput awas karangkat aras dawak muyul bik dis dādarang.

⁶Kaput laih, witingna awaihwi talnin pāni kidika sahyakwi duduna, dawak Acab witing ta as duwi kiuna dawak Abdías laih ta ūk duwi kiuna.

⁷Tapas yakat kiwakat, Elías kidika Acab tanipas yakat kalahwi kalpakna, dawak talwi amangnilawi abuk dawi parasni yulwi yulna: —¡Kaunah adika laih yang dakiwan Elías!

⁸Elías yaklauwi kalyulna: —Agha, yang. Dawak baisa minit yakat kalyulna: —Yawa man damawan yakat kalyultah yang akat sakyang.

⁹Abdías yaklauwi nangnitlana: —¿Yang ais as dutni yamnayang kat Acab tingni yakat yahataman, witing yaina atnin?

¹⁰Papang Dawan ayangni kau yaktik yultayang dakiwan kidika nisan balna pasyakat king balna king kakawa babangkidika saunina bitik yakat walna, pa as kat bik mawalwas laih awasdai; dawak diyulwi dakawak kidika pāni yakat disman atwak, yang dakiwan kidika yaklauwi dipakwak Papang ayangni kau yakwi yulna atnin dai man kidika mayakwas dadana.

¹¹¡Dawak waradika man yapaktamahn yawik dakiwan yakat kalyulna atnik man akat sakman kidika!

¹²Di kalahwarang kidika laih, akaupak madatik yawaki yakat, Dawan spiritni kidika yaklauwi madukiwarang yang amanglatasyang pāni yakat. Dawak yang laih Acab yakat yawik adika yulni kalyultingkat, mayakwas dawarang kat yaīwarang. Man dima yamyang adika, wahma kaupak, Dawan ayangni nuhni yamnin kidika ban kaput yamna.

¹³¿Man yakat mayuyulwas katpah, yang ais yamnayang kidika, Jezabel yaklauwi Dawan pranipit balna iwakat? Kidika balna 100 uitik malnayang dai, uduhna bu sahyaknayang dai 50, 50, dawak pa sulihni bu kau uitik malnayang dai, dawak bik kasninna bik dianayang dai.

¹⁴¿Dawak waradika man lawa yapaktaman, dakiwan yakat yawik kalyulna atnin man akat sakman? ¡Yaīwarang!

¹⁵Elías yaklauwi nangnitlana: —Dawan parasni bitik duwa kidika ayangni kau yaktik mayultayang, yang witing dini yamyang yang kidika, warmani Acab muhni yakat yawaki ki.

¹⁶Abdías witing Acab walwi kiuna isningpakna atnin, kaput laih Acab witing kiwi kiuna Elías yakat.

¹⁷Talwi yulna: —¿Kaput bahang man lawa Israel muihni balna sinsnina dutni yamtamahn?

¹⁸Elías yaklauwi nangnitlana: —Yang lawik sinsnina dutni yamtasyang, kaunah man, dawak muih balna dutaman kidika balna laihtakat, Dawan lani kidika data Baal sat sat balna yakat prinias yamtamana kidika.

¹⁹Muih sihtangkat Carmelo asangni yakat Israel muihni balna kidika bitik ududuhwang, dawak Baal pranipit 450 balna kidika bitik, dawak Asera pranipit 400 kidika balna bik, Jezabel yaklauwi maintalwi duwa sakkidika.

²⁰Acab yaklauwi yulwak Israel muihni balna bitik uina, dawak prapit balna bitik Carmelo asangni yakat uduhna.

²¹Kaput laih Elías witing tawan muihni balna bitik yaihnitna yakat kiwi yulna: —¿Mampatkat man adika yakisdinin bu yamtamana kidika datanamayah? Dawan kidika rahm palni Papang kat usnit uitanauh witing yakat, kidika awaskat Baal kauh kat, Baal yakat usnit uitanauh. Tawan kidika yul as bik yulwas dai.

²²Dawak Elías baisa yulna: —Yang manah alasyang Dawan pranipit dauwas sangka yaklana kidika, kaunah Baal pranipit balna laih 450 bangki.

²³Kaput bahang yananawang turuh ahalmuk binina bu, dawak witingna as yakwi duduwang, dawak sarhwi dawi kuh minit yakat ihilwang, kaunah kuh kidika dahnin awaski. Dawak yang bik tuniruhbin kidika ridi yamtik kuh minit yakat ilki, kaunah kuhni kidika dahltas awaki ki.

²⁴Kidika usnit kat manna damanawan yakat yultanama, dawak yang bik Dawan yakat yulki, ¡dawak angdika daniwan dakawi kuh sihwarangkat, kidika ki rahm Papang karang kidika! —¡Kaput kidika yamniki! —tawan muihni balna bitik kaput yuyulna.

²⁵Kaput laih Elías yaklauwi Baal pranipit balna yakat diyulna: —Tuniruh ahalmuk binina kidika as dutanauh, dawak manna tatuna ridi yamtanauh, kat manna laih mahni mana bahang. Usnit kat damanawan kau yultanauh, kaunah kuh laih dadahlwinih.

²⁶Kaput laih turuh ahalmuk binina diayana dai kidika as duduna, dawak ridi yayamna mapiris kaupak matunak kat Baal yakat kalyuyulna, aput: “¡Baal nangkitnalatah!” Sakripais busnin pāni yayamna yaihnit awaih yakat susutna, kaunah di as bik nangnitnalawas dai.

²⁷Matunak kat, Elías yaklauwi sarahni diyulwi aput yulna: —Parasni sarahtanauh kidika laih dawan as ki. Sipki witing di ūk yamwasak atnin, kidika awaskat kalahwi kiuna pa ūk. ¡Kidika awaskat sipki kamatus atnin bahang uswi sahmuhnin ki!

²⁸Witingna ban sararahna dawak muihnina yakat kuhbil dawak langsa binina kapatnah kau dadakna, witingna niningh kaput yayamwa bahang ā kidika waskana kapat.

²⁹Ma tunakwi bayakna, witingna ban sararahna, susutna tunanina dutni dilaihwa kapat, sakripais busnin awarni kana kat, di as bik nangnitnalawas dai. ¡Muih as bik didakawasdai, dawak bik nangnitnalawas dai!

³⁰Kaput dawak Elías yaklauwi muih balna bitik yakat diyulna: —Yaihkit akat aiwanauh. Muih bitik witing yaihnit yakat uina, dawak Dawan kau sakripais busnin pāni kidika laihwi dulauwi yamna, bukkiuna tusdai kidika.

³¹Kipala 12 duna, Jacob walanibis balna ampus dai kat kaput, bahang kidika balna yakat Dawan yaklauwi ayangnina Israel pakki atna dai kidika,

³²dawak kidika kau Dawan yakat sakripais busnin pāni as yamna, usnit kat sakripais busnin pāni yamna yaihnit yakat kudungni kuhrwi awaihna, bahang kidika yakat sipdai uhna atnin di minik litro 20,

³³kuh kidika yamni lakwi dawi turuh almukbin kidika sahrna dawi minit yakat ilna.

³⁴Kidika usnit kat yulna: —Was punin dini kidika arungka bahngtanauh was, dawak sakripais karauni kauna busnin dini kidika minit yakat utuhtanauh, dawak kuh minit yakat bik. Kidika usnit kat watwi pakwak watbās kaput yayamna dai witingna.

³⁵Was kidika kiratusdai sakripais busnin pāni yaihnit yakat, dawak kudungni kuhrwi awaihna kidika bik was manah bahngna dai.

³⁶Sakripais karauni kauna busnin awarni kat, prapit Elías witing yaihnit yakat kiwi parasni yulna: “¡Abraham, Isaac dawak Israel Daniwan Papang: yamtangkat waradika amanglalawang man laih Israel Papangniman, dawak yang laih man dima yamyang yang, dawak adika balna yamtayang bitik kidika laih man lawa yamnin yapaknaman bahang!

³⁷¡Nangkitlatah Dawan; nangkitlatah, kaput laih adika muihni balna amanglalawarang man laih Papangman, dawak watta diyultaman man yakat uina atnin kidika!”

³⁸Kidika minitni yakat Dawan kuhnipau kidika kiwi bukwi sakripais karauni kauna busnin dai kidika busna, kuh balna dawak kipala balna dai kidika bitik yahamni dana, was dai kidika bitik laih buhlana kudungni paskau dai kidika.

³⁹Kidika talwi, muih balna bitik sau yakat abukwi muhnina sau kat lalakna, dawak yuyulna: “¡Dawan laih Papang, Dawan laih Papang!”

⁴⁰Kaput dawak Elías yaklauwi diyulna: —¡Baal pranipit balna kidika laihtanauh! ¡As bik kiri yaklanin awaski! Muih balna kidika yaklauwi lalaihna, dawak Elías yaklauwi Cisón wasni yakat duwi kiwi dininamak dakna.

⁴¹Kidika usnit kat Elías yaklauwi Acab yakat kalyulna: —Yawa di kastah dawak bik ditah, kat uman was lauwi kaiwa kidika dakadi.

⁴²Acab kiwi di kasna dawak bik dina. Elías laih Carmelo asangni makau yakat kilwi kiuna, dawak sau yakat limbabahwi muhni kidika kalasnimak kat lakwi dawi,

⁴³dini yamyang yakat kalyulna: —Yawa kuma niningyakat talah. Witing kiwi talwi usnit kat yulna: —Di as bik diski. Kaunah Elías yaklauwi watwi pakna: —Wat tiaskaubu yawa talah.

⁴⁴Wat tiaskaubu kiwi talwa yakat dini yamyang kidika yulna: —¡Naikau, kuma kaupak kilwi kaiwi mukus as matingki ūsbin! Dawak Elías yaklauwi kalyulna: —Yawa Acab yakat kalyultang kat mahka kārni yakat kilwi kiwang, kidika awaslaih was yaklauwi nanitdakwarang.

⁴⁵Acab kārni yakat kilwi mahka Jezreel yakat kiuna. Dawak mayakat laih mukus yaklauwi puksani lakna dawak wing bik kalahna, was parasni launa.

⁴⁶Elías laih, Dawan yaklauwi parasni kalana, bahang parakni yamni kawi dawi kirana Jezreel kat, kaput laih witing tatuna kiwi kana Acab karak dawakat.