Read Mayangna 1 Reyes 19 Bible Online

1 Reyes 19 - Mayangna bible

1 Reyes 19

¹Acab yaklauwi Jezabel yakat kalyulna Elías di yamna balna kidika bitik dawak Baal pranipit balna amput dininamak dakna kidika bik.

²Kaput laih Jezabel yaklauwi muih as yakwi yul kalsihna Elías yakat kalyulna atnin: “¡Man Elías man kat, yang laih Jezabel yang![24] Dawan dauh balna kidika parasni wah yayawarang, yahan mani adika awarni kat prapit balna kau yamnaman kaput mayamtasyang kat.”

³Elías witing amanglana yamadangni yakat kaldukiwa kidika, dawak witing sangnika laihwi lanin yulni Beerseba yakat kiuna, bahang kidika pāni laih Judá sauni pīsni yakauh bahang, dawak kidika yakat witing dini yamyang kidika dasakna.

⁴Kidika usnit kat witing kauhmak wanilang yakat kiuna, bahang kaput laih witing ma as lapakna dawak witni kat pan as parahni wakalni duwa kat kidika dinit yakat watna. Witing uba daukihni kalawak yulna: “¡Dawan akat dahn baisa laih awaski! ¡Sangkika dakyaktah kat yang adika papangki balna dai kidika karak tanit yamni awasyang!”

⁵Dawak kidika panan parahni wakalni manah kidika dinit yakat kalangwi kamana. Kaunah insal as kiwi kalsukwi kalyulwi: “Lawa dikastah.”

⁶Elías witing yaihnit yakat talwak, plawar kuruhwi kuhkau busna kidika as sakdai tunning yakat, dawak was bik sakdai punin dini kau puwi lakna. Kaput laih witing yaklauwi kasna dawak bik dina; usnitkat watwi kalangna.

⁷Kaunah Dawan innisal kidika watwi kiwi sukwi kalyulna: “Lawa dikastah, kidika awas karangkat yawama kidika naini karang man namangyakat.”

⁸Elías witing yaklauwi, dikaswi, diwi dana. Kidika dini kasna kidika yaklauwi parasni kalana ma 40 dawak pukta 40 lapaknin Papang asangni Horeb kat kiwi kanin kidika.

⁹Kiwi kawi, pasulihni as kau kana, dawak kidika yakat pukta payahna. Kaunah Dawan witing yakat kiwi kalyulna: “¿Elías akat ais yamtamahn?”

¹⁰Witing yaklauwi nangnitlana: “Uba yang man yakat mamat annayang, Dawan, Papang parasma bitik dutaman kidika, kat Israel balna pramamis kidika ruhmwi dadana, dawak man yakat sakripais buswa pāni dai kidika bitik babahna, dawak isparah kau pramapit balna bitik ihina. Yang manah watnayang, dawak yang adika yawawalwi sangkika dakyakna atnin.”

¹¹Dawak Dawan yaklauwi kalyulna: “Ahni yakat alahwa yang muhki yakat lawah asang tuna kaupak.” Kidika minitni yakat Dawan kaiwi bayakna, dawak wing parasni as kaiwi asang kidika bauwi sahna dawak kipala balna kidika Dawan muhni yakat sahna, kaunah Dawan laih kidika wingni parasni yakat sak-awasdai. Wing kidika bayakwak usnit kat sau isihna; kaunah Dawan kidika sau isihna yakat bik sak-awasdai.

¹²Sau isihwi bayakwak usnit kat kuh dahlna, kaunah Dawan kidika kuhpau yakat bik sak-awasdai. Kuhpau kidika kaibayakwak usnit kat yulni tāni yudutni yulwa kidika kaina.

¹³Elías kidika dakawi, witing muhni kidik kalsurumhwa asnina kidika kau putna, dawak pāni sulihni kungnimak yakat watna. Dawak kidika yakat witing yak yulni as kiwi kalyulna: “¿Elías yakat ais yamtamahn?”

¹⁴Witing yaklauwi nangnitlana: “Man yakat uba mamat annayang, Dawan, Papang parasma bitik dutaman kidika, kat Israel balna laih man pramamis kidika ruruhmna bahang, dawak man kau sakripais yamnin pāni dai kidika bitik tuklalakna, dawak pramapit balna dai kidika bitik laih isparah kau ihina. Yang manah alas watnayang, bahang yaīnin yawawalwi.”

¹⁵Kaput laih Dawan yaklauwi kalyulna: “Yawah, man aiwanaman tani munah, Damasco kauhnimak wanilang munah. Yawa Hazael kidika Papang dini yaktah Siria kingni kapat,

¹⁶dawak Nimsi māni[25] Jehú kidika laih Israel kingni atnin; dawak Safat walanibis Eliseo Abel-Mehola tawanni kaupak kidika, man pama yakat Papang dini yaktah prapit as kapat.

¹⁷Dawak kaput laih, angdika muihni kat Hazael isniparah munah yaklawarang kat, Jehú yaklauwi iwarang, dawak angdika muihni Jehú isniparah kaupak yaklawarang kat Eliseo yaklauwi īna karang.

¹⁸Kaput kaunah, Israel yakat bangki muih 7,000 kidika balna laih Baal yakat limbabahwas balna kidika, dawak bik baisa uhumwas kidika.”

¹⁹Kidika kaupak Elías mahka kiuna bahang Eliseo karak kalpakna, bahang Eliseo laih sau sahwalik dai yamak yakat. Eliseo tanit yakat turuh ahalmuk dininamak yakat pan ilwi sitna kidika 12 uiwa bangdai, dawak witni kidika laih witing palni dukiwalikdai. Elías witing Eliseo yaihnit yakat kiwi kalsuruhmwa asnina kidika minit yakat muklakna.

²⁰Kidika minitni yakat Eliseo witing tuniruh ahalmuk sitna balna duwalik kidika damukna, dawak Elías dangnit yakat kiri kiwi kalyulna: —Yadatang kat yawik papangki balna yakat umdatik aiwik usmat uiki. Elías yaklauwi kalyulna: —Sipki yawanam, kaunah ismang-aita awama man yakat mayamtikda kidika.

²¹Eliseo kidika Elías kaupak dawi kalahna, bahang kiwi turuh ahalmuk bu duwi iwi sarhwi, sihm arangnina kau pan sitna dai kidika kau dimuihni kidika buswi muih balna yakat bayahna. Kidika usnitkat Elías dangnit yakat kiuna, dawak witing dini yamyang kalna.