Read Mayangna 1 Reyes 20 Bible Online

1 Reyes 20 - Mayangna bible

1 Reyes 20

¹Siria kingni Ben-adad, witing kalbauyang muihni balna duwadai kidika bitik uduhna, dawak king balna witing karak aslah kalalahna kidika 32 dai, dawak kalbaunin muihni, kārnina balna duduwa kidika bitik, dawak Samaria tawanni nuhni yakat awaihdakwi kalbabauna.

²Sihm mani yakat muih yakwi yul sihna Samaria tawanni nuhni yakat, Israel kingni Acab yakat: “Ben-adad aput yulwi: ‘Man ritsma balna kidika laih yang diki, yalma balna bik sihm, dawak walamabis tanit yayamni balna kidika bik.’ ”

⁴Israel kingni kidika yaklauwi nangnitlana: “King man yulnaman kaput, yang di dutayang balna kidika bitik laih man dima.”

⁵Yul duwi uina balna dai kidika watwi Acab yakat uina kaltatalna, dawak kalyuyulna: “Ben-adad yulwi: ‘Uman yang yul masihnayang, man ritsma kidika yanam, yalma balna dawak walamabis balna bik.

⁶Baisa kidika minit yakat yahan mani yang kalbauyang tunan balna dutayang kidika sihki ki ūmapas kidika bakatwi talnin, dawak man king āwaman kau muih wark kalalahwa bangkidika ūnina balna bitik, dawak witingna dukih diawa balna kidika bitik laih laihwi duduna karang.’ ”

⁷Kaput laih Israel kingni yaklauwi tawan kau muihbararak balna bitik yakat yulwak uiwak diyulna: —Manna sipki amanglanamna, adika alni laih dutni yāyamnin walwi, yang ritski balna, yalki balna dawak walakibis balna bitik witing yakat kalanik yulnayang bik.

⁸Tawan muihni balna bitik dawak muihbararak balna bitik kalyuyulna: —Man witing yakat kaldakawinih.

⁹Kaput dawak Acab yaklauwi Ben-adad muih sihna balna yakat diyulna: —Manna kingmana yakat kalyultanauh, witing tatuna yayulna balna kidika laih bitik yamki, kaunah waradika yayulwa kidika laih sip-awas ki. Sihna muihni balna kidika, witingna yul kidika duwi uina Ben-adad yakat,

¹⁰dawak Ben-adad yaklauwi yul kalsihna Acab yakat: “¡Dawan balna kidika parasni wah yayana karang, Samaria yakat sau yamni kidika watwarangkat yang uskit uiyang balna yakat tingkurus bung dianik witingna bitik yakat!”

¹¹Dawak Israel kingni yaklauwi yul kalsihna: “Baisa mani kaiwi kawas kau minit bayaknaman kapat laih yulwinih.”

¹²Ben-adad, kidika yulni dakana kidika minitni yakat witing laih king ūk balna karak witingna ū labanni kapat yamwi minit yakat pan tingni ihilna kidika dinit yakat diwabangdai. Kaput laih kalbauyang balna tanituna balna yakat diyulna: “¡Kalbaunin!” Witingna bitik laih ridi kakalna kalbauna atnin tawan nuhni niningyakat.

¹³Kaput laih prapit as Israel kingni Acab yakat kiwi kalyulna: —Dawan yulna: ‘Waihla balna mahni talaman, warmani man tingma yakat āki ki, bahang kaput laih man amanglama yang laih Dawan yang kidika.’

¹⁴—¿Dawak wais munah kalawak yang tingki yakat āwarangyah? —Acab yulwi dakana. —Dawan yulna, wawahma balna witingna kabamint tunan balna kau ilp diayawa kidika balna munah —prapit yaklauwi kaput kalyulna. —¿Dawak wais tatuna kalbauwarangyah? —Acab watwi yulwi dakana. Prapit yaklauwi kalyulna: —Man.

¹⁵Kaput laih Acab, wawahma balna sau sahyakna kau kabamint tunan muihni balna yakat ilp diayawa balna dai kidika yakat talwi bayakna, bahang kidika bitik kat 232 wawahma dai, dawak Israel muihni kalbauyang balna bitik kat 7,000 dai.

¹⁶Matunak kat kalahwi uina, bahang kidika awarni yakat Ben-adad dawak king 32 balna kidika karak wasak kalahwabangdai ū labanni yamwi minit yakat pan tingni balna ihilna dai kidika dinit yakat,

¹⁷tatuna uina kidika laih kabamint tunan muihni balna kau ilp diayawa wawahnima balna dai. Ben-adad yakat isningpapakna, ahal buas Samaria kidika kaupak kalalahna,

¹⁸dawak dipakna: “¡Kulnin aslah dunin yulni kalalahwapa, kidika awaskat kalbaunin yulni kalalahwa karang bik yang dukih yawi sangka laihta duaitanama!”

¹⁹Kabamint tunan muihni balna yakat ilp diayawa muihni balna kidika kalahwi uiwak usnitna yakat kalbauyang muihni balna kidika kalahwi uina.

²⁰Dawak witingna bitik waihninala kidika as as ihina, dawak sirio muihni balna kidika kikirana. Dawak Israel muihni balna yaklauwi uiwi uina, dawak Ben-adad, Sirio kingni laih aras kau kilwi kiri yaklana, aras kau kilwi kalbauyang muihni balna as as karak.

²¹Kaput laih Israel kingni kidika kiwi aniras balna dawak kalbaunin kārni balna bik duna, dawak sirio balna niningna yakat minit bayaknin nuhni as dai.

²²Kidika usnit kat prapit kidika Israel king muhni yakat kiwi kalyulna: —Yawa kalbauyang muihni balna dutaman kidika parasni yamtah, dawak yamni kulta talah man ais yamma kidika; kat kurih as bayakwak Siria kingni kidika watwi kaiwarangki makalbauna.

²³Siria muihni kalbauyang balna taninatuna balna yaklauwi kingnina yakat kalyuyulna: —Israel balna daninawan laih, asang nunuhni balna daninawan kidika ki; kidika bahang mamikitbayakna. Kaunah walang yakat kalbaudarang kat rahm palni laih minitna bayakdarang.

²⁴King waradika yamnam kidika laih, king balna kidika yakmuknamki, dawak kidika balna panina yakat kalbauyang balna taninatuna balna kidika ānam ki,

²⁵dawak kalbauyang muihni balna yamni parasni yamnin ki, sihm muhnilau sip-awas kalalahna balna dai kapat, aras dawak aras karak, kar dawak kar karak. Kaput laih witing niningna yakat kalbautanaki, dawak rahm laih witing yakat minitna bayakdarang. Ben-adad witing kidika yulni kalyuyulna kidika yakat dakawi yamna.

²⁶Kurih as bayakwak usnit kat, sirio muihni balna kidika talwi lana, dawak Afec yakat kiuna, Israel niningyakat kalbauna atnin.

²⁷Israel muihni kalbauyang balna kidika bik talwi bayakna, dawak kasninna dini balna bik diayana, dawak kalahwi uina sirio balna karak kalpakna atnin. Sirio muihni balna muhnitna yakat uiwi panina duduna, bahang witingna kidika laih kuts kaluduhna bu kidika kapat dai, kaunah Sirio balna laih pāni kidika bitik bunghdai.

²⁸Kidika yakat Papang pranipit as Israel kingni muhni yakat kiuna, dawak kalyulna: —Dawan aput yulwi: ‘Sirio muihni balna kidika yuyulna yang adika asang daniwan as yang, kaunah sau langni daniwan laih awasyang atwi yuyulna bahang, muih mahni sakkidika man tingma yakat āna awaki. Kaput laih man amanglama yang Dawan yang kidika.’

²⁹Ma tiaskaubu sirio dawak Israel balna karak witingna muhninalau panina duna bangdai, dawak ma tiaskaubu yakat mahka kalbabauna. Kidika mani yakat Israel balna yaklauwi sirio muihni kalkau uiwi kalbabauwa muihni balna kidika 100,000 ihina dai.

³⁰Dawak kalbauyang muihni ūk balna laih Afec tawanni nuhni yakat kiri uina dai, kaunah tawan daklana balna kidika asirio muihni kalbauyang 27,000 kiri yaklawi uina balna kidika minitna yakat bukwi taihwi īna dai. Ben-adad bik kiri tawan nuhni yakat kiuna, dawak payahnin pāni balna yakat yakmaldana dai.

³¹Kaput laih kalbauyang balna tanituna balna kidika yaklauwi kalyuyulna: —Mayang taldi Israel kingni balna kidika ais pranimis yayamwa kidika yakat yayamwi; kaput bahang asna utuhni kat mahawi dadi madikimak yakat wah sitdi dadi Israel kingni muhni yakat mawang, bahang taldarang masangkika[26] iwas dawarangpa.

³²Kaput laih witingna asna utuhni kawi dawi dininamak yakat wah as sisitna, dawak kaput witingna Israel kingni muhni yakat uiwi yaklalauna, dawi kalyuyulna: —Ben-adad, king man kalma dinit yakat bukwi yulwi, witing sangnika kidika dakwinih. Dawak Acab yaklauwi nangnitnalana: —¿Baisa sangkayah? ¡Yang nikingyakat laih wirahki as kapat ki!

³³Ahal kidika witingna niningna yakat laih sain yamni as kapatdai, dawak kidika minitni yakat nangnitlalana: —¡Ben-adad laih king wirahni! —¡Kaput kat yawa duaitanauh! —Acab yaklauwi diyulna. Kaput laih Ben-adad kidika Acab muhni yakat kiuna, dawak Acab yaklauwi kārni yakat ilsakwi duwi kiuna.

³⁴Usnit kat Ben-adad yaklauwi kalyulna: —Papangki yaklauwi man papangma yakat tawan nunuhni balna dakyakna dai kidika maki; dawak man sipman Damasco yakat lalah warkni yamnam, yang papangki Samaria yakat duwadai kapat. —Yang nikingkauh laih madating yawama —kalatna Acab yaklauwi. Kaput laih Acab yaklauwi pramis as yamna Ben-adad karak, dapamna mahka kiuna atnin.

³⁵Kaput kaunah, muih al as prapit balna kidika paskaupak dai, bahang witing yaklauwi wanaihni as yakat kalyulna, Dawan yaklauwi pakwa kidika yamna atnin: —¡Plisma isparah kau yatustah! Kaunah as kidika yamnin yulwas dana.

³⁶Kaput dawak prapit kidika yaklauwi kalyulna: —Dawan yulni dakas danaman bahang, layan as maīna karang yang kaupak dakta alahwama kat. Kaput rahm kalahna, prapit kaupak dakwi kalahwa kat, layan as witing tanipas yakat kalahwi īna.

³⁷Kidika usnit kat prapit kidika muih al ūk karak kalpakna, dawak kidika yakat bik kalyulna witing muihni yakat tusna atnin, dawak kidika alni yaklauwi tusna prapit yaklauwi kalyulwa kaput.

³⁸Kaput laih prapit kidika kiwi king yakat tanitalna tapas yakat, witing minikpa yakat asna kau sit dawi.

³⁹Dawak king kidika bayakkiwakat prapit yaklauwi yul parasni sarahwi kalyulna: —King man dima yamyang adika witing kalbauna kiuna dai, dawak kalparna bangkidika paskaupak kalahwi silak muihni as duaina. Dawak yayulna kidika muihni kidik yang tingki yakat atnin, dawak yayulna, kidika muihni kirarangkat, yang sangkika kau launa awaki, kidika awaskat lalah dadasni 3,000 lautik kalaki.

⁴⁰Dawak king man dima yamyang adika di ūk ūk yamwalikkat, silak muihni dai kidika kirana. Israel kingni yaklauwi kalyulna: —Kidika laih man alas pāt muihni alahwanaman, dawak bik lāma kidika yamnaman.

⁴¹Kaunah prapit kidika sirihni palni witing muhni kau asna sitna kidika yakpamna, dawak king kidika amanglana kidika muihni laih prapit dai kidika.

⁴²Kaput laih prapit yaklauwi kalyulna: —Dawan yaklauwi aput yulwi: ‘Man lawa muih al as daunin yakna dai kidika dapamtang kirana dai bahang, man sangmaka kau lauma, dawak tawanma kidika laih witing sangnika kau launa karang.’

⁴³Kaput dawak Israel kingni kidika Samaria yakat kiuna, kulnin bukna dawak kulnin daukalna karak, kaput laih ūni yakat kawi kiuna dai.