Read Mayangna 1 Reyes 4 Bible Online

1 Reyes 4 - Mayangna bible

1 Reyes 4

¹Salomón laih Israel bitik kingni dai.

²Dawak witing kabamintni pasyakat wark kalalahwa balna kidika laih adika balna dai: Sumalyang Sadoc walanibis Azarías;

³Sisa walanibis ahal balna, Elihoref dawak Ahías, yul kaiwi kalahna balna kat ulwa kidika muihni laih; Ahilud walanibis al Josafat dawak kaput bik laih king yaihnit yakat wauhtaya ulyang dai;

⁴kalbauyang balna taninatuna laih Joiada walanibis Benaía dai; sumalyang balna kidika laih Sadoc dawak Abiatar;

⁵wark tanituna nuhni kidika laih Natán walanibis Azarías dai, dawak sumalyang Natán walanibis Zabud kidika laih king yakat manah yul sumalyang[3] dai;

⁶Ahisar laih king ūni kidika witing tingni yakat dai, dawak Abda walanibis Adoniram laih muih balna yakat taihwi pakwak wark kalahnin kidika witing tingni yakat dai.

⁷Salomón witing kabamint tunan muihni 12 duwadai Israel bitik pasyakat, witingna warknina kidika laih king dawak walanibis balna bitik yakat di bitik uiwi diana atnin. Witingna bitik laih kurih as pasyakat waiku as as witingna di balna kidika duwi uina atnin dai king yakat.

⁸Kabamint muihni balna laih adika dai: Ben-hur, witing kidika laih Efraín asangnipas yakat dai;

⁹Ben-Decar laih Macaz yakat dai, Saalbim, Bet-semes, Elón dawak Bet- hanán;

¹⁰Ben-Hesed laih Arubot yakat, dawak Soco yakat bik, kaput bik laih Hefer sauni bitik yakat dai;

¹¹Ben-Abinadab, Dor sauni sahyakna kidika bitik yakat; witing yalni laih Tafat dai, Salomón walanibis yal;

¹²Ahilud walanibis al Baana kidika laih Taanac yakat dai, Meguido dawak Bet-seán kidika bitik yakat dai, kidika laih Saretán yaihnit kau kidika, dawak Jezreel kaupak sau niningkauh, Bet-seán kaupak Abel-mehola kat, dawak Jocmeam tanit yakau bik;

¹³Ben-geber, Galaad kau Ramot yakat, witing tingni yakat sakdai Galaad kau tawan balna kidika, bahang kidika laih Manasés walanibis Jair dini dai, dawak kaput bik laih Argob sauni sahyakna kidika bik dai, bahang kidika laih Basán yakat ki, kidika yakat kuduh tawan nunuhni 60 bangdai, kidika balna laih yamni itikwi awaihna dai, dawak dūrni kini balna kidika laih bras kau manah yamna dai;

¹⁴Ido walanibis Ahinadab kidika laih Mahanaim yakat dai;

¹⁵Ahimaas laih Salomón walanibis yal Basemat kidika duna dai, Neftalí yakat;

¹⁶Husai walanibis al Baana kidika laih Aser yakat dai, dawak Alot yakat bik;

¹⁷Parúa walanibis Josafat laih Isacar yakat dai;

¹⁸Ela walanibis al Simei laih Benjamín yakat dai;

¹⁹Uri walanibis al Geber laih Gad[4] sauni sahyakna yakat dai, Sehón sauni, amorreo balna kingnina, dawak Basán kingni Og. Dawak baisa minit yakat kabamintni balna kidika minitna yakat taninatuna nuhni as āna dai, kidika sauni bitik pasyakat.

²⁰Judá dawak Israel karak, kidika muihni balna bitik kidika muih mahni palni dai, kulwi talnin bik sip awasdai, sihm kuma kung kau kauhmak kapat dai. Kasnin balna bik mahni palni dai, dawak dinin balna bik sihm kapat dai, dawak alasna bik dai.

²¹Salomón laih king nuhni palni dai Éufrates wasni kaupak filisteo balna saunina kat, dawak Egipto sauni kung kiwi kawa kat, kidika paskau king sauni balna bangkidika bitik minitna yakat, kidika balna bitik laih Salomón yakat tunan minit lalauwa dai, dawak bik witing tingni dinit yakat dai, sangka mani balna dai yakat.

²²Salomón ūni yakat ma as di kasnin balna witwa kidika laih adika dai: plawar tanit yamni kidika litro 6,600, dawak plawar satni ūk balna kidika laih litro 13,200 witwa dai,

²³turuh ahalmuk tanit salani balna kidika 10, turuh dibasta kaswi bararakna balna kidika 20, dawak sīp 100, kaput bik laih sana kapapat satni balna dawak lawani duduwa balna salalani kidika laih banawi kulwas dai,

²⁴kat Salomón laih witing Éufrates kaupak ma kilwa niningkauh sauni sahyakna kidika bitik witing tingni dinit yakat dai bahang, Tifsa kaupak Gaza kat, kaput bik laih kidika sauni sahyakna balna paskau king balna kidika laih witing tingni dinit yakat dai, dawak kidika sauni yaihnit kau balna kidika bitik laih yamni manah kalna dai bahang.

²⁵Salomón kidika sangka dai mani balna yakat Judá dawak Israel kidika, Dan kaupak Beerseba kat kidika isningnalak yalalahna dai, witingna bitik laih wainnina yanimak dawak aninina damni dinit yakat dai.

²⁶Baisa minit yakat Salomón duwadai aras balna panina tausin arungka,[5] aras balna kārnina kidika ānin, dawak kalbauyang balna aras kau kilwi kalbabauwa kidika laih tausin 12 duwa dai.

²⁷Kabamint tunan muihni balna tatuna kau ayangnina pakwadai kidika balna yaklauwi ais dunin balna kidika duwi uiwa dai king ūni yakat, angdika wainiku yakat witing dibukwa dai kidika, king Salomón dawak witing ūni paskau muih duwa sakkidika di bayahnin, kaput laih witingna dadawak di as bik dis atnin laih awasdai.

²⁸Di balna king ūni yakat duwi kiunin waininaku kiwi kawakat, witingna sisihwadai angkat cebada bangkidika pāni yakat, dawak aras balna kasninna sihr sihr kusuni bik.

²⁹Papang yaklauwi Salomón yakat sins nuhni dawak sinsni sirihni bik kalana dai, dawak di amanglanin tanka balna bik manas palni kalana, sihm kuma kungkau kauhmak mahni kapat,

³⁰kaput laih Salomón sinsni nuhni kidika minit bayakna dai Egipto muihni balna sinsnina dawak ma kilwa kau muihni balna kidika sinsnina bik.

³¹Witing laih tanit sins nuhni duna dai, muih al ūk dis dai witing kapat: Etán, Zera sulani, dawak Hemán, Calcol dawak Darda, Mahol walanibis, kidika balna bitik laih tanitna sinsni nuhni dai. Witing ayangni nuhni kidika, yaihnit kau sau ūk balna kidika bitik yakat dakakana dai.

³²Sins lani pararahni kidika tausin bās ulna dai, dawak yul dadamni bik 1,005 ulna dai.

³³Pan balna dawak dibasta balna kidika yulni bik yulbauna dai, Líbano suhunni balna kaupak dawak dibasta ū dangni kau ukuswa balna kat laih yulna dai; kaput bik laih yulbauna dai asangpas dini dawak tinglau balna yulnina bik, kaput bik uhu binina, bil satni balna dawak waspa dini balna yulnina bik yulbauna.

³⁴Nisan balna bitik kau, dawak sau kingni balna bitik witingna dakakana kat Salomón sinsni nuhni dawak sinsni sirihni kidika bik, witingna uiwa dai yulbauwak dakana atnin.